Azərbaycanda, eləcə də Qafqazda ilk dəfə tədris olunan "İdman jurnalistikası" Magistr Proqramına qəbul başlayıb

idman=jj.jpgCari ilin sentyabr ayından başlayaraq, Azərbaycan Dövlət Bədən Tərbiyəsi və İdman Akademiyasında bir sıra yeni ixtisasların, o cümlədən, “İdman jurnalistikası” magistr ixtisasının tədrisinə start verilib. Bu barədə araz.az saytına məlumat verən mənbə bildirib ki, hazırda adını çəkdiyimiz tədris müəssisəsi bu ixtisas üzrə 2018-2019-cu akademik dərs ili üçün növbəti qəbulu elan edib.
Məlumatda bildirilir ki, “İdman jurnalistikası” üzrə magistr ixtisasına qəbul olmaq istəyənlər, I imtahan mərhələsində iştirak etmək üçün, 12 fevral tarixinədək Dövlət İmtahan Mərkəzinin http://eservices.dim.gov.az/erizemag/erize saytından qeydiyyatdan keçməlidirlər.


Qəbul imtahanın I mərhələsindən yetərli bal toplayan namizədlər, II mərhələyə müraciət edə biləcəklər. İmtahanın II mərhələsi Azərbaycan Dövlət Bədən Tərbiyəsi və İdman Akademiyası tərəfindən həyata keçiriləcək.
Məlumat üçün onu da bildirək ki, “İdman Jurnalistikası” magistr ixtisasının yaradılmasında əsas məqsəd, bu sahədə beynəlxalq səviyyədə rəqabətə davamlı kadrların yetişdirilməsidir.
Bu təhsil proqramı Böyük Britaniyanın Şeffild Hallam universiteti ilə əməkdaşlıq çərçivəsində birgə hazırlanıb. “İdman jurnalistikası” proqramına media sahəsində tanınmış beynəlxalq ekspert Den Meyson rəhbərlik edir. Tədris prosesi ingilis dilində, beynəlxalq təcrübəyə malik yerli və ya xarici mütəxəssislər tərəfindən həyata keçirilir. Bu da, namizədlərə ingilis dili biliklərini daha da inkişaf etdirmək imkanı verir.
Bu magistr proqramında təhsil alacaq magistrantlar, onlar üçün xüsusi yaradılmış Multimedia Mərkəzində PR, audio və video jurnalistika, online media, idman jurnalistikasının özəllikləri və s. ilə yaxından tanış olmaq imkanı əldə edirlər.
Bütün bunlarla yanaşı, “İdman jurnalistikası” ixtisasına qəbul olunan magistrantlar proqram çərçivəsində Böyük Britaniyaya səfər edəcək, əsas təlim modullardan birini Şeffild Hallam universitetində keçəcəklər.
Emil CAMALOV,
araz.az saytının xüsusi müxbiri.

Əlaqəli xəbərlər