Mərkəzi Bankın İdarə Heyətinə yeni üzv təyin edildi

taleh66Azərbaycan Mərkəzi Bankının İdarə Heyətinə yeni üzv təyin edilib.

Bununla bağlı parlamentin bu gün keçirilən plenar iclasında Taleh Kazımovun Azərbaycan Mərkəzi Bankı İdarə Heyətinin üzvü vəzifəsinə təyin edilməsi haqqında Milli Məclisin qərar layihəsi müzakirəyə çıxarılıb.

Məsələ barədə Milli Məclisin İqtisadi siyasət, sənaye və sahibkarlıq komitəsinin sədri Tahir Mirkişili məlumat verib. Komitə sədri Taleh Kazımovun iş təcrübəsi və peşə keyfiyyətləri barədə məlumatları deputatların diqqətinə çatdırıb. Onun ölkənin bank sistemindəki xidmətlərindən, əldə etdiyi nailiyyətlərdən bəhs edib.

T.Mirkişili Mərkəzi Bank və Milli Məclisin İqtisadi siyasət, sənaye və sahibkarlıq komitəsi arasında sıx əlaqələrin olduğunu, bir sıra məsələlərin həllində faydalı əməkdaşlıq etdiklərini qeyd edib və bunun gələcəkdə uğurla davam edəcəyini söyləyib.

Sonra məsələ səsverməyə çıxarılaraq qəbul edilib.

araz.az xbər portalı.

Elman Rüstəmov AMB İdarə Heyətinin üzvlüyündən azad edildi

elmanrustemov6Elman Rüstəmov Azərbaycan Respublikası Mərkəzi Bankı İdarə Heyətinin üzvlüyündən azad edilib.

Milli Məclisin bu gün keçirilən iclasında “Elman Rüstəmovun Azərbaycan Respublikası Mərkəzi Bankı İdarə Heyətinin üzvlüyündən azad edilməsi haqqında” qərar layihəsi səsə qoyularaq bir oxunuşda qəbul edilib.

araz.az xəbər portalı.

İlham Əliyevdən daşınmaz əmlakla bağlı fərman

ilhameliyev6665Prezident İlham Əliyev “Daşınmaz əmlakın dövlət reyestri haqqında” Qanun qüvvəyə minənədək əldə edilmiş və yaranmış daşınmaz əmlak obyektləri üzərində hüquqların əldə edilməsini təsdiq edən sənədlərin Siyahısı”nın təsdiq edilməsi barədə” fərmanda dəyişiklik edilməsi haqqında fərman imzalayıb.

araz.az  xəbər verir ki, fərmanda deyilir:

1. “Daşınmaz əmlakın dövlət reyestri haqqında” Azərbaycan Respublikasının Qanunu qüvvəyə minənədək əldə edilmiş və yaranmış daşınmaz əmlak obyektləri üzərində hüquqların əldə edilməsini təsdiq edən sənədlərin Siyahısı”nın təsdiq edilməsi barədə” Azərbaycan Respublikası Prezidentinin 2015-ci il 13 yanvar tarixli 439 nömrəli Fərmanında (Azərbaycan Respublikasının Qanunvericilik Toplusu, 2015, № 1, maddə 15, № 10, maddə 1136; 2016, № 7, maddə 1255; 2017, № 2, maddə 180) aşağıdakı dəyişikliklər edilsin:

1.1. 4-cü hissədə “Əmlak Məsələləri Dövlət Komitəsi” sözləri “İqtisadiyyat Nazirliyi” sözləri ilə əvəz edilsin;

1.2. 5-ci hissədə “Əmlak Məsələləri Dövlət Komitəsi” sözləri “İqtisadiyyat Nazirliyi yanında Əmlak Məsələləri Dövlət Xidməti” sözləri ilə əvəz edilsin;

1.3. həmin Fərmanla təsdiq edilmiş “Daşınmaz əmlakın dövlət reyestri haqqında” Azərbaycan Respublikasının Qanunu qüvvəyə minənədək əldə edilmiş və yaranmış daşınmaz əmlak obyektləri üzərində hüquqların əldə edilməsini təsdiq edən sənədlərin Siyahısı” üzrə:

1.3.1. 1.4-cü bənd aşağıdakı redaksiyada verilsin:

“1.4. rayon, şəhər, qəsəbə və kənd zəhmətkeş deputatları sovetləri və xalq deputatları sovetləri tərəfindən torpaq sahələrinin ayrılması barədə qəbul edilmiş qərarlar;”;

1.3.2. 2.2-ci bənddə “şəhər və rayon” sözləri “rayon, şəhər, qəsəbə və kənd” sözləri ilə əvəz edilsin;

1.3.3. 2.3-cü bənd aşağıdakı redaksiyada verilsin:

“2.3. kənd və qəsəbə yaşayış məntəqələrində (o cümlədən statusu dəyişdirilərək şəhərə (qəsəbəyə) çevrilmiş, habelə ləğv edilərək ərazisi şəhər və ya qəsəbələrin ərazisinə verilmiş kəndlərdə) 2001-ci il yanvarın 1-dək inşa edilmiş yaşayış evlərinə və (və ya) onların yerləşdiyi torpaq sahələrinə, eləcə də yaşayış evlərinin tikintisi üçün ayrılmış torpaq sahələrinə dair təsərrüfatbaşına kitablardan çıxarış;”;

1.3.4. 2.5-ci bənddə “Yaşayış” sözü “yaşayış” sözü ilə əvəz olunsun, həmin bənddən “yaxud” sözü çıxarılsın və həmin bəndə “əmri” sözündən sonra “, yaxud həyətyanı torpaq sahəsi barədə qaytanlanmış torpaq kitablarından (o cümlədən kolxoz və sovxoz torpaqlarına dair qaytanlanmış kitablardan) çıxarış” sözləri əlavə edilsin;

1.3.5. 2.6-cı bəndin sonunda nöqtə işarəsi nöqtəli vergül işarəsi ilə əvəz olunsun və aşağıdakı məzmunda 2.7-ci bənd əlavə edilsin:

“2.7. yerli icra hakimiyyəti başçısının qərarı əsasında yaşayış evinin tikintisi məqsədilə torpaq sahələrinin ayrılması barədə, yaxud müvafiq torpaq sahəsinin yerli icra hakimiyyəti başçısının qərarında nəzərdə tutulan şəxslər arasında bölüşdürülməsi barədə aidiyyəti inzibati ərazi dairəsi üzrə nümayəndə tərəfindən 2001-ci il yanvarın 1-dək verilmiş qərar.”.

2. Nazirlər Kabineti bu Fərmandan irəli gələn məsələləri həll etsin.

3. Yerli icra hakimiyyəti orqanları üç ay müddətində:

3.1. yerli icra hakimiyyəti başçısının qərarı əsasında yaşayış evinin tikintisi məqsədilə torpaq sahələrinin ayrılması barədə, yaxud müvafiq torpaq sahəsinin yerli icra hakimiyyəti başçısının qərarında nəzərdə tutulan şəxslər arasında bölüşdürülməsi barədə aidiyyəti inzibati ərazi dairəsi üzrə nümayəndə tərəfindən 2001-ci il yanvarın 1-dək verilmiş qərarlarla bağlı məlumatların (yerli icra hakimiyyəti başçısının və inzibati ərazi dairəsi üzrə nümayəndənin müvafiq qərarlarının surətləri, torpaq sahəsinin ayrıldığı şəxsin adı, soyadı, atasının adı, torpaq sahəsinin ölçüsü və ünvanı göstərilməklə) Azərbaycan Respublikasının İqtisadiyyat Nazirliyinə təqdim olunmasını təmin etsinlər;

3.2. müvafiq dövlət arxivinə təhvil verilməmiş qaytanlanmış torpaq kitablarının (o cümlədən kolxoz və sovxozun qaytanlanmış torpaq kitablarının) Azərbaycan Respublikası Milli Arxiv İdarəsinin tabeliyindəki dövlət arxivlərinə təhvil verilməsini təmin etsinlər.

4. Milli Arxiv İdarəsi:

4.1. bu Fərman qüvvəyə mindiyi günədək, habelə bu Fərmanın 3.2-ci bəndinə uyğun olaraq yerli icra hakimiyyəti orqanları tərəfindən müvafiq dövlət arxivlərinə təhvil verilmiş qaytanlanmış torpaq kitablarının (o cümlədən kolxoz və sovxozun qaytanlanmış torpaq kitablarının) elektron məlumat bazasının yaradılmasını və həmin bazaya İqtisadiyyat Nazirliyinin çıxışına imkan yaradılmasını altı ay müddətində təmin edib bu barədə Azərbaycan Prezidentinə məlumat versin;

4.2. bu Fərmanın 4.1-ci bəndi icra olunanadək qaytanlanmış torpaq kitablarından çıxarışların sorğu əsasında İqtisadiyyat Nazirliyinə kağız daşıyıcıda təqdim olunmasını təmin etsin.

5. İqtisadiyyat Nazirliyi daşınmaz əmlak üzərində hüquqların dövlət qeydiyyatı ilə bağlı bu Fərmandan irəli gələn məsələlərin həlli üçün zəruri tədbirlər görsün. 

araz.az xəbər portalı.

Milli Məclis məlumat yaydı

milli99Aprelin 1-də Milli Məclisin İqtisadi siyasət, sənaye və sahibkarlıq komitəsinin üzvləri İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidmətinin nümayəndələri ilə görüşüblər.

Milli Məclisin Mətbuat və ictimaiyyətlə əlaqələr şöbəsindən verilən məlumata görə, tədbiri açan parlamentin İqtisadi siyasət, sənaye və sahibkarlıq komitəsinin sədri Tahir Mirkişili bugünkü görüşdə rəqabət mühitinin gücləndirilməsi, inhisarçılıq fəaliyyətinin qarşısının alınması tədbirləri, inflyasiya və süni qiymət artımları ilə mübarizə, dövlət satınalmalarındakı vəziyyət kimi mövzular ətrafında fikir mübadiləsi aparılacağını bildirib.

O, mövzuların kifayət qədər aktual olduğunu və parlamentin həm plenar, həm də komitə iclaslarında, eyni zamanda seçici və vətəndaşlarla görüşlərdə bu məsələlərin qaldırıldığını qeyd edib.

Komitə sədri rəqabətlə bağlı qanunvericiliyin müasir tələblərə uyğunlaşdırılmasından danışıb, həmçinin dövlət satınalmaları haqqında qanunvericiliyin təkmilləşdirilməsi, praktika və vərdişlərin dəyişdirilməsi zərurətinə toxunub.

Sonra Antiinhisar və İstehlak Bazarına Nəzarət Dövlət Xidmətinin rəisi Məmməd Abbasbəyli ötən dövrdə xidmətin antiinhisar və haqsız rəqabət, dövlət satınalmalarına, keyfiyyət infrastrukturuna nəzarət, istehlakçıların hüquqlarının müdafiəsi kimi ümumi fəaliyyət istiqamətləri üzrə gördüyü işlər, əldə edilən nəticələrdən danışıb.

Xidmət rəisi sosial əhəmiyyətli əsas ərzaq məhsullarının dəyər zəncirindəki ticarət əlavələrinin müəyyənləşdirilməsindən, inflyasiya proseslərinin cilovlanması tədbirlərindən, təbii inhisarçılara dövlət nəzarətinin gücləndirilməsi, telekommunikasiya sahəsində, o cümlədən internet xidmətləri ilə bağlı aparılan optimallaşma işlərindən bəhs edib.

O, rəqabətin inkişafı və inhisarçılığın qarşısının alınması üzrə Milli Strateji Proqramdan, Rəqabət Məcəlləsinin hazırlanması, dövlət satınalmaları haqqında, daxili ticarət haqqında qanunvericiliyin təkmilləşdirilməsi, bu sahələr üzrə təklif olunan yeni yanaşmalar barədə məlumat verib.

Sonra müzakirə olunan mövzular üzrə komitə sədri Tahir Mirkişili, komitə sədrinin müavini Əli Məsimli, deputatlar Rüfət Quliyev, Aydın Hüseynov, Etibar Əliyev, Mahir Abbaszadə, Vüqar Bayramov, Məşhur Məmmədov çıxış ediblər.

Qarşılıqlı fikir mübadiləsi şəraitində keçən görüşdə deputatlar məhsulların bazarlara çıxışının çətinliklərindən, keyfiyyət standartlarının tətbiqinin genişləndirilməsindən, telekommunikasiya sahəsindəki qiymətlərin optimallaşdırılmasından söz açıblar.

Millət vəkilləri inhisarçılıq və süni qiymət artımları ilə mübarizə, sağlam rəqabət mühitinin inkişaf etdirilməsi, dövlət satınalmaları sahəsində tenderlərin keçirilməsinin təkmilləşdirilməsi, elektronlaşmanın artırılması, yerli istehsalçı şirkətlərin bu tenderlərdə iştirakı ilə bağlı maneələrin aradan qaldırılması kimi məsələlər barədə fikirlərini bildiriblər.

araz.az xəbər portalı.

Əkrəm Həsənov: “Mərkəzi Bankın uçot dərəcəsini artırması heç bir dəyişikliyə səbəb olmayacaq”

Ekrem2“Mərkəzi Bankın uçot dərəcəsini artırması heç bir dəyişikliyə səbəb olmayacaq. Bu, gözdən pərdə asmaq üçündür. Guya Mərkəzi Bank hansısa fəaliyyətlə məşğuldur. Uçot dərəcəsi Mərkəzi Bankın digər banklara verdiyi faiz dərəcəsidir. Yəni, normal iqtisadi bank sistemində uçot dərəcəsi çox əhəmiyyətli alətdir. Misal üçün, ABŞ Federal Ehtiyat Sisteminin uçot dərəcəsini dəyişməsi nəinki ABŞ-a, bütün dünya ölkələrinə təsir edir. Çünki uçot dərəcəsi inflyasiya təhlükəsi olan zaman artırılır. Belə olan halda, uçot dərəcəsi artırıldıqda kreditləşdirmə məhdudlaşır”.

araz.az bildirir ki, bunu iqtisadçı ekspert Əkrəm Həsənov deyib.

O bildirib ki, Azərbaycanda Mərkəzi Bank bütün banklara kredit vermədiyi üçün sağlam rəqabət yoxdur: "Avropa və ABŞ-da isə Mərkəzi Bank bütün banklara həmin faiz dərəcəsi ilə kredit verir. Ona görə də uçot dərəcəsinin dəyişməsi bankların da vətəndaşlara verdiyi kreditlərin faizlərinə təsir göstərir. Ölkədə isə Mərkəzi Bank yalnız bir neçə banka kredit verir. Ona görə də uçot dərəcəsini ya artır, ya da endir, onsuz da, bazara təsir etmir. Təsəvvür edin, kartofun kilosunu 1 qəpikdən, yəni çox ucuz satışa çıxarıram, amma kimsə gəlib məndən kartof almaq istəyəndə, deyirəm ki, “yox, mən kartofu yalnız tanışlarıma və qohumlarıma verirəm”. Eynilə, Mərkəzi Bankın iş prinsipi də buna bənzəyir, çünki kreditlər bütün banklara bərabər verilmir. Sadəcə olaraq, Mərkəzi Bank ildə bir dəfə xatırlatma edir ki, guya hansısa işlə məşğuldur. Reallıqda isə, heç bir işlə məşğul deyil”.

araz.az xəbər portalı.

4 -dən səhifə 55

Əlaqəli xəbərlər