Hacıbala Abutalıbovun oğlu adını dəyişdi

1518162275_hacibala.jpg


 Bakı Şəhər İcra Hakimiyyətinin başçısı Hacıbala Abutalıbovun oğlu İsrafil Abutalıbov adını dəyişib.

Araz.az xəbər verir ki, bu haqda Gununsesi.info məlumat yayıb. Xəbərə görə, artıq Abu Bəkr Abutalıbov olan mer oğlu İstanbulun Sultanahmet məhəlləsində dəyəri 20 milyon dollara olan otel alıb. O, Türkiyədə vətəndaşlıq statusu alıb, otelin yenilənməsi üçün daha bir neçə milyon xərcləyib. "Ajwa” adı ilə fəaliyyət göstərən oteldə Azərbaycan mətbəxini təklif edən ayrıca restoran da fəaliyyət göstərir. Abu Bəkr Abutalıbov "Ajwa” markası ilə ikinci otelini də Kapadokyada açacaq. 

 "Yeni Müsavat” yazır ki, İsrafil Abutalıbov adı illərdir ki, mətbuatın gündəmindən düşmür. 2006-cı ildə qəzetlər İsrafil Abutalıbovun öz bahalı avtomobilində İstiqlaliyyət küçəsindəki elit dükanların birinə girərək qəzəbli halda oradan biri 2 min dollar olan qadın paltarı aldığını, həmin paltarla maşınının şüşələrini və təkərlərini silib nümayişkaranə şəkildə cırdığını və zibil qutusuna atdığını yazırdı. Səbəb də o imiş ki, İsrafil bəyin rəfiqəsi o dükandan həmin paltarı almaq istəyib. Amma satıcılar ona paltarı əyninə geyib yoxlamağa icazə verməyib.

 

Lənkəran meşələrinin qənimi Söhrab Abbasovu kim himayə edir?

1518160717_zohrab-2.jpg


 Cənub zonasının sərvəti talanır, ETSN isə qazanc hayında

Araz.az bildirir ki, bir neçə gün öncə Realliq.net saytında dərc olunan – “Masallı, Lənkəran və Lerik meşələrində ağac soyqırımı davam edir - Ekologiya nazirliyi isə susur”-başlıqlı yazıdan sonra, redaksiyamıza çoxlu müraciətlər daxil olub. Saytın email ünvanına və sosial şəbəkədəki profilinə daxil olan müraciətlərdə qeyd olunur ki, ötən yazıda faktların çox az hissəsinə yer verilib. 

Yazıda – “Masallı rayonunun Xanalyon, Sığdaş, Kubin, Lənkəranın Osakücə, Tükəvilə, Qəqiran, Günəhır, Lerikin isə bir çox kənd ərazilərində yerləşən meşələrdə nadir ağaclar kəsilməkdədir. Cavan ağacların kəsilməsinin qarşısını almağa borclu olan Ekologiya və Təbii Sərvətlər Nazirliyinin Meşələrin inkşafı Departamenti və yerli şöbələri isə qanunsuzluğa göz yumaraq işbazların fəaliyyətindən yararlanmaqdadırlar.
Ekologiya və Təbii Sərvətlər Nazirliyi Meşələrin İnkişafı Departamentinin direktor əvəzi, Abbasov Söhrab Aydın oğlunun baş verənlərdə pay sahibi olduğunu demək çətindir. Lakin fakt odur ki, Söhrab müəllim biz bildiklərimizdən daha çox məlumatlıdır” – deyə qeyd olunurdu.
Vətəndaşlar, Talış dağlarının meşələrində ağac soyqırımının aşkar həyata keçirildiyini və qış fəslində qazsız olan kəndlərdə insanların evlərini odun peçləri ilə qızdırdığını bildirirlər. Məlumdur ki, insanlar soyuq qış aylarında odundan yanacaq kimi istifadə etməyə məcburdurlar. Lakin sosial problemin varlığı yaşıllıqların məhvinə əsas verməməli və dövləti qazsız olan kəndlərini yanacaqla təmin etməyə məhkum etməlidir.

Müraciətlərdə yazılır ki, ağacların kəsilməsi və odun halında satılması, Ekologiya və Təbii Sərvətlər Nazirliyinin Meşələrin inkşafı Departamentinin yerli şöbələrinin rəhbərləri və meşəbəyiləri ilə razılaşdırılır. Meşəbəyilərin hər maşına görə, aldığı rüşvət hesabına kəsilən ağacların satışı, nəzarət altında həyata keçirilir.

Realliq.net -ə daxil olan digər müraciətdə isə qeyd olunur ki, Lerik, Astara və Lənkəran meşələrində tikinti materialları üçün, nadir ağacların kəsilərək satılması prosesi davam edir. Maraqlıdır ki, qanunsuzluğa imkan yaradan Eyvaz Babayev, Şakir müəllim və digərləri Ekologiya nazirliyinin Meşələrin İnkşafı Departamentinin yerli şöbələrinin rəhbərləridir. Onu da bildirək ki, meşələrdə ağacların kəsilməsi və daşınması prosesi əsasən gecə saatlarında həyata keçirilir. Əməkdaşlarımız Lənkəran rayonunun Diryan, Gəqiran kəndlərində apardıqları araşdırmalar zamanı belə faktla üzləşiblər. Yol boyu ZİL, QAZ 54, Kamaz markalı yük maşınlarının kəsilmiş və parçalanmış ağacların daşınması gözdən yayınmayıb. Maşın sürücüləri ilə söhbətimiz zamanı onlar bildiriblər ki, kəsilmiş ağaclar satışa aparılır və kv-metrlə satılır. Maşın yükünün əsasını dəmirağac, palıd və vələs ağacları təşkil edib. Həmin görüntüləri növbəti yazıda təqdim edəcəyik. Odun satan yük maşını sahibləri Realliq.net –in əməkdaşına, ağacların kəsilib satılması üçün meşəbəyilərə rüşvət verdiklərini qeyd ediblər.

Daxil olan məlumatların araşdırılması zamanı ortaya çıxan faktlar narahatçılığa əsas verməkdədir. Talış meşələrinin soyqırıma məruz qoyan məmurların şəxsi maraqları, yüz illərlə əmələ gələn yaşıllıqların məhvinə səbəb olur. Hazırda fəlakətlə üzləşən meşələrin aqibətini düşünməyən Ekologiya nazirliyinin faktlara biganə münasibəti, özbaşınalığa şəraitin yaradılması kimi qiymətləndirilir.

Sualların cavabsız qalması,nazirliyin Meşələrin İnkşafı Departamentinin direktoru Söhrab Abbasova yaşıl işığın yandırılması deməkdir. Görünən həqiqət odur ki, Söhrab müəllimin fəaliyyətində ciddi qüsurlar olsada, onu himayə edənlər var və bu da yaranmış fəlakətin səbəblərinin önündə gəlir. Nazir Hüseynqulu Bağırovun rəhbəri olduğu qurumda, Söhrab Abbasovun ağacların soyqırımı ilə gəlir əldə etməsi sadə vətəndaşa məlum olduğu halda, səlahiyyət sahibinin xəbərsiz olması inandırıcı görünmür.
Prezident İlham Əliyevin meşələrin qorunması, ağacların kəsilməməsinə dair verdiyi tapşırıqlar S.Abbasovun himayədarlarını narahat etmir. Faktlar və yaranmış xoşagəlməz durumun qarşısının alınmaması, Talış dağlarının yaşıllığını və Lənkəran meşələrini məhvini sürətləndirir.

Cənub zonasının sərvətini talayanlar varlanmaq eşqinə həyata keçirdikləri soyqırımın günahkarlarının cəzalandırılması üçün tapşırıqların verilməsi vacib şərtə çevrilib. Realliq.net olaraq növbəti yazıda araşdırmalarımız zamanı əldə olunan faktlar və video çəkilişləri diqqətinizə çatdıracağıq. Ümid edək ki, vətəndaşlarımız və cənub zonasının ziyalıları, Tanrının onlara bəxş etdiyi sərvəti qorumaq üçün, aidiyyatı qurumlar qarşısında məsələ qaldıracaq və günahkarların cəzalandırılmasını tələb edəcəklər. Söhrab Abbasov və digər məmurları himayə edənlərin, ədalət mühakiməsinə cəlb edilməsi, Lənkəran, Masallı, Lerik və Astara meşələrinin qorunması deməkdir.
Mö.vzuya qayıdacağıq. Realliq.net

"AZƏRİSTİLİKTƏCHİZAT" ASC: GÖZƏ GÖRÜNMƏYƏN DÖVLƏT ŞİRKƏTİ

istilik.1000x0.jpg


Dövlət şirkəti lüzumsuz xərclərə yol verir və beynəlxalq mühasibata keçməyə tələsmir

Araz.az xəbər verir ki, bu müddət öncə Hesablama Palatanın rəsmi saytında medianın o qədər də maraqlanmadığı və əhalinin yalnız 10-20%-nə xidmət göstərən “Azəristiliktəchizat” ASC-nin audit yoxlaması barədə məlumat yerləşdirilmişdir. Rəsmi olaraq, bu dövlət şirkəti ölkədə yeganə istilik təchizatı operatorudur. Amma insanlar artıq çoxdandır öyrəşiblər ki, istilik təchizatı gah aylarla yoxdur, gah da birdən-birə bərpa olunur. Müvafiq olaraq insanlar da istiliyi təmin etmək üçün alternativ üsullardan istifadə edirlər (düzdür son zamanlar bu sahədə müəyyən pozitiv işlər gedir və istilik təchizatı tədricən bərpa olunur).

Bu şirkətin fəaliyyəti barədə məlumatsızlıq (hətta bir çox insan bu şirkətə ödənişlərin necə aparılması barədə məlumata malik deyil) nəticəsində o “Azərsu” və ya “Azərişiq” kimi gündəmə tez-tez gəlmir. Şirkət deyəsən bundan istifadə edib hesabatlarını heç rəsmi saytında yerləşdirmək barədə fikirləşmir. Rəsmi saytında yerləşdirilən sonuncu hesabat 2011-ci ilə aiddir. Ona görə, birbaşa olaraq, şirkətdə indi nə baş verdiyini öyrənə bilmirik. Buna görə, Hesablama Palatasının auditi vasitəsilə ən azı şirkətin əsas göstəriciləri barədə məlumat əldə edirik.

Büdcədən dotasiyalar

Bir sıra dövlət şirkətləri kimi, “Azəristiliktəchizat” da dövlət büdcəsindən bu və ya digər formada subsidiya alır. Bunun əsas səbəbi şirkətin zərərə işləməsidir. Fəaliyyətinin başlandığı dövrdən şirkətin xərcləri daima gəlirlərindən çox olub. Amma adətən bu zərər subsidiya vasitəsilə ödənilib, indiki halda zərəri heç subsidiya vasitəsilə də ödəmək mümkün deyil.

Dövlət büdcəsi sənədlərindən əldə edilən məlumata görə, 2011-2016-cı illərdə şirkətə aşağıdakı məbləğdə dotasiyalar ayrılmışdır:

  • 2011 - 19.67 milyon manat;
  • 2012 - 20.19 milyon manat;
  • 2013 - 20.84 milyon manat;
  • 2014 - 21.56 milyon manat;
  • 2015 - 22.61 milyon manat;
  • 2016 - 18 milyon manat;

Göründüyü kimi, 2011-2016-cı illərdə şirkət dövlət büdcəsindən 123 milyon manat subsidiya vəsait əldə edib. Bəs bu subsidiyların gəlir və xərclərə münasibəti necədir? Hesablama Palatasının auditindən görünür ki, şirkətin zərəri şirkətin gəlirini dəfələrlə üstələyir. Belə ki, məlumata görə, 2015-ci ildə ASC-nin maliyyə hesabatına görə istilik təchizatı xidmətlərinin satışından gəlirləri ƏDV-siz 8109.0 min manat, faktiki xərcləri 46148.2 min manatdır (o cümlədən, 45702.1 min manat istehsal xərci, 446.1 min manat satışdankənar xərc). Maliyyə fəaliyyətinin nəticəsi üzrə faktiki zərəri 38039.2 min manat təşkil etdiyi halda, 2016-cı ildə faktiki gəlirlər ƏDV-siz 10839.2 min manat, faktiki xərcləri 50243.3 min manat (o cümlədən, 49699.1 min manat istehsal xərci, 544.2 min manat satışdankənar xərci) maliyyə fəaliyyətinin nəticəsi üzrə faktiki zərəri 39404.1 min manat təşkil etmiş, 2016-cı ildə gəlirlər 2015-ci ilə nisbətən 2730.2 min manat artdığı halda, xərclər 4095.1 min manat və ya gəlirlərin artımına nisbətən 1.5 dəfə çox artmış, nəticədə cəmiyyətin maliyyə fəaliyyətinin nəticəsi üzrə faktiki zərəri əvvəlki ilə nisbətən 1364.9 min manat və ya 3.6 % artmışdır.

Gördüyümüz kimi, dövlət büdcəsindən ayrılan dotasiyalar şirkətin gəlirini təxminən 2 dəfə üstələyir. Eyni zamanda şirkət gəlirinin artmasına baxmayaraq, onun xərcləri daha yüksək templə artır. Bunun nəyə görə baş verdiyini daha dəqiq başa düşmək üçün, ən azından şirkətin gəlir və xərc strukturunu öyrənmək lazımdır. Amma yuxarıda dediyimiz kimi, şirkət bu barədə məlumatı ictimaiyəttə açıqlamır. Amma açıq mənbələrdə olan məlumata görə, bəzi məqamları dəqiqləşdirmək olar. Belə ki, gəlirin əsas mənbəyi əlbəttə ki, istilik enerjisinin satılmasıdır. ASC-nin məlumatına görə, indi şirkət 545 qazanxana vasitəsilə 5060 obyekti istilik enerjisi ilə təmin edir.

Tarif Şurasının təsdiqlədiyi tariflərə görə, şirkət istiliklə təchiz etdiyi hər kvadrat metrə görə 0.15 manat əldə edir. Gəlirin təxmini 60-70% (7.5 milyon manata kimi) bina evlərindən əldə edir. Şirkət 2016-ci ilin əvvəlinə 3568 binadan 170 min mənzilə istilik təchizatı xidmətləri göstərirdi. İndi təxmini bu göstərici 180 minə bərabər olmalıdır. Başqa sözlə şirkətin xidmətlərindən təxminən 810 min insan istifadə edir. Eyni zamanda bu binalardan 3250-si Bakıya aiddir. Başqa sözlə Bakıda yerləşən 6 min binadan təxmini yalnız 54% mərkəzləşdirilmiş istilik təchizatı ilə təmin olunub.

Şirkət həmçinin isti su təchizatı ilə də məşğuldur. Nazirlər Kabinetinin 18 noyabr 2016-cı il tarixli qərarına əsasən 2017-ci ilin yanvarın 1-dən isti su təchizatı xidmətlərinin qiymətləri dövlət tərəfindən tənzimlənmir. Müvafiq olaraq, şirkət öz tariflərini müəyyən ediblər. Rəsmi saytında yerləşdirdiyi məlumata görə, 1 aprel 2017-ci il tarixdən “Azəristiliktəchizat” ASC isti su təchizatı tariflərini əhali üzrə kb metrə 1.92 manat, qeyri-əhali istehlakçıları üzrə 3.1 manat müəyyən edib. Maraqlıdır ki, qiyməti müəyyən edərkən, şirkət alternativ (kombi, elektrik su qızdırıcıları və s.) imkanların mövcud olmasını nərəzə alaraq bu tarifləri müəyyən edib. 2017-ci ilə kimi isə, 1 kub metr isti su üçün şirkət 40 qəpik əldə edirdi. Düzdür mərkəzləşdirilmiş isti su Bakıda o qədər də tez rast gəlinən bir hal deyil. Şirkətin məlumatına görə yalnız yeni tariflər vasitəsilə özünü maliyyəşdirmədən yararlanmaq olar. Elə çıxır ki, əvvəllər bu dövlət şirkətinin belə məqsədi olmayıb.

Qeyri-effektiv xərcləmələr

Yeri gəlmişkən, şirkətin fəaliyyəti xərclər ilə bağlı olduğuna görə, xərclərin strukturunu təhlil etmək maraqlı olardı. Təssüf ki, Hesablama Palatası yalnız istehsal və qeyri-istehsal bölgüsünü göstərib. Amma Dövlət satılnamalar reyestri vasitəsilə başqa xərclərin müəyyən hissəsini göstərmək mümkündür. Şirkət 2015-ci ildə 51, 2016-ci ildə 20 və 2017-ci ilin 8 ayında 18 tender keçirib. Keçirilən tenderlərin əsasında, biz əsas 8 istiqamət üzrə xərcləri müəyyən edə bilərik.

Xərclərin böyük hissəsi istehsal prosesi ilə bağlı olmasına baxmayaraq, şirkətin fəaliyyəti effektivlikdən uzaqdır. Dövlət şirkətinin anbarında qalığı olan malların təkrar alınması nəticəsində vəsaitlər zəruri olmayan istiqamətlər üzrə sərf olunub. Eyni zamanda Hesablama Palatasına görə, “qarşıdakı il və növbəti illər üzrə büdcə vəsaitinə təlabatın müəyyən edilməsi üçün hər bir istehlakçı qrupu və xidmət növü üzrə satılacaq istilik enerjisinin və isti suyun kalkulyasiya obyektləri üzrə məhsul vahidinin (1 m2yaşayış sahəsi, 1 m3 isidilən həcm və 1 misti su) istehsal və satış maya dəyəri müəyyən edilməmiş” və müvafiq olaraq zərəri hər bir istehlakçı qrupu və xidmət növü üzrə bölüşdürülməmişdir. Başqa sözlə şirkət hətta satdığı istiliyin maya dəyirini və hansı istiqamətlərdə problemin olmasını da müəyyən edə bilməyib. Eyni zamanda isidilən yaşayış sahəsi və tikinti həcmi barədə uçot göstəriciləri ilə abonent və müştəri xidmətləri tərəfindən təqdim edilən məlumatlar arasında uyğunsuzluqlar olub. Bir çox hallarda abonentlərə gələn borclar reallığı əks etdirmir. Nəticədə bununla bağlı mənasız debitor və kreditor borclar yaranır. Eyni zamanda yaşayış sahələrinin isidilməsi üzrə xidmət vahidinə normadan artıq istilik enerjisi sərf edilib. Belə ki, əgər cəmiyyətin öz istehsalı olan istilik enerjisi üzrə 2015-ci ildə 11.68% və 2016-cı ildə 11.95% miqdarında texnoloji itki normaları təsdiq edildiyi halda, hər il üzrə 12.6% miqdarında itki qeydə alınıb.

Hesablama Palatası öz hesabatında qeyd edib ki, dövlət büdcəsindən ayrılan vəsaitdən istifadə zamanı lüzumsuz xərclərə yol verilib, xüsusən nəqliyyat vasitələri və aqreqatlara artıq yanacaq sərf edilib. Nəticədə bu ilin avqustunda “nəqliyyat vasitələrinin hərəkətinə məsafədən internet üzərindən nəzarətin həyata keçirilməsi üçün avadanlıqların alınması, quraşdırılması və servis xidmətinin satınalınması” üzrə tender keçirilib. Tenderin qalibi “Merkuri-İ 68” MMC olub. Başqa sözlə, bu istiqamətdə olan xərclərə müəyyən nəzarətin həyata keçirilməsi qərar verilib. Amma 2016-ci ildə də “qazanxanalarda quraşdılımış temperatur və təzyiq sensorlarına internet üzərində məsafədən nəzarət edilməsi” üzrə tender keçirilmişdir. Hesablama Palatasına görə, bunun heç bir effekti olmamışdır.

ASC beynəlxalq mühasibatlığa keçməyib

Xərc istiqamətlərindən göründüyü kimi, şirkət audit xidmətlərinə heç də önəm vermir. Hesablama Palatasına görə, dövlət şirkətində Beynəlxalq Mühasibat Uçotu Standartlarına uyğun uçot aparılmamış və hətta maliyyə nazirliyinin təsdiq etdiyi “Aktivlərin və öhdəliklərin inventarizasiyası Qaydaları”na əməl edilməyərək öhdəliklərin inventarizasiyası tam aparılmamış, bu səbəbdən də iddia müddəti və vaxtı keçmiş debitor və kreditor borcların ləğvi istiqamətində tədbirlər görülməmişdir. Faktiki olaraq, hətta Hesablama Palatası əldə etdiyi hesabatdan şirkətin vəziyyəti və onun öhdəlikləri barədə məlumatı əldə edə bilməyib. Amma bəzi öhdəliklər barədə məlumatı biz "Azərbaycan Respublikasında kommunal xidmətlərin (elektrik və istilik enerjisi, su və qaz) inkişafına dair Strateji Yol Xəritəsinin icra vəziyyəti"nin yarımillik monitorinq və qiymətləndirmə hesabatından öyrənə bilərik. Belə ki, orada yerləşdirilən məlumata görə, "Azəristiliktəchizat" ASC üzrə 2017-ci ilin mayın 1-nə "Azəriqaz" İB-yə 89,532 mln. manat borc öhdəliyi mövcuddur. Maraqlıdır ki, bu borcun ödənilməsi barədə heç söhbət belə getmir. Belə ki, "Azəristiliktəchizat" ASC-nin nümayəndəsinin sözlərinə görə, eyni vəziyyət 2015-ci ildə baş vermişdir və o zaman, problem hökumət səviyyəsində həll olundu. İndi də, şirkətin zərər ilə işləməsini nəzər alaraq, nümayəndənin sözlərinə görə, bu problem dövlət səviyyəsində həll olunmalıdır.

Beləliklə, ictimaiyətdən bir qədər uzaq olan dövlət şirkətində, Hesablama Palatasına görə, heç normal səviyyədə maliyyə hesabatı da tərtib olunmur. Nəticədə hər il dövlətə 40 milyon manata yaxın zərər dəyir. Maraqlıdır ki, bu zərərin azalması üçün də heç bir addım atılmır. 2017-ci ilin əvvəlində təklif olundu ki, “Azəristiliktəchizat” ASC-yə tariflərdə azadlıq verilsin və eyni zamanda “Azəriqaz” tərəfindən onlara satılan qaz endirim ilə satılsın. Amma bir neçə aylıq danışıqlardan sonra belə bir qərara gəlindi ki, tariflərin müəyyən edilməsində tam azadlıq verilsə, o zaman tariflər birdən-birə kəskin artacaq (deyəsən ASC-yə inam yoxdur). Endirimə gəldikdə isə, “Azəriqaz” məlumat verib ki, qaza olan tariflərin qalxmasına baxmayaraq, onlar əlavə gəlir əldə edə bilməyiblər və buna görə, endirim ilə satmaq məqsədə uyğun deyil. http://opengovernment.az

Bakıda məmurların binasında qalmaqal - mənzil fırıldağı, milyonların mənimsənilməsi-FOTO

bina.jpg


 Bakıda dövlət tərəfindən vəzifəli şəxslərə verilən mənzillər ətrafında sensasion qalmaqal yaranıb. Məlum olub ki, binaların komendantları mənzil sahibləri ilə əlbir olub, vətəndaşlardan böyük məbləğlərdə dələduzluq yolu ilə pul alıblar. 

Araz.az-a daxil olan məlumatda deyilir ki, bir mənzil bəzən 10-15 adama satılıb, təxminən 5 milyon vəsait mənimsənilib. İşin maraqlı tərəfi odur ki, mənzilləri "dövriyyəyə” buraxılan şəxslərin hamısı vəzifə sahibləridir. Zərəçəkənlər iddia edir ki, bu məmurlar komendantlarla əlbir olublar. 
 

Qalmaqal Bakı şəhər İcra Hakimiyyətinin (BŞİH) 1993-cü ildə tikintisinə başladığı, İsmayıl Qutqaşınlı 3 ünvanında yerləşən binaya görədir. Belə ki, BŞİH-in keçmiş rəhbəri Rafael Allahverdiyev həmin ildə tikintisinə başlanılan binadan qurumun işçilərinə mənzillər verilməsi ilə bağlı sərəncam imzalayıb. Sərəncamla mənzillərin orderləri bir neçə şəxsə paylanılıb. Bu şəxslər arasında onun özünə yaxın olan şəxslər də olub. Lakin bina tam tikilib qurtarmayıb. Bina üçün ayrılan vəsait tükənibmi, yeyilibmi dəqiq bilinməsə də, yan-yana olan 2 binanın tikintisi biri 4-cü mərtəbədə, digəri isə 7-ci mərtəbədə dayandırılıb. 

Daha sonra binanın tikintisi Mənzil Kooperativi tərəfindən davam etdirilib. Binanın tikintisi başa çatıb və 2000-ci illərdə buradakı mənzillərin satışına başlanılıb. Məsələlər də bundan sonra başlayıb...

 


2016-cı ildə 120 min manat verərək binadan ev alan Ramiz Kazımovun BakuPost-a verdiyi məlumata görə, buradakı BŞİH-in order verdiyi 10 mənzilin ətrafında böyük fırıldaqlar həyata keçirilib. Saxtakarlıq qurbanı olan vətəndaş bildirir ki, evi 2016-cı ildə alıb, tam təmir etdiyi mənzilində yaşadığı 2 ilə yaxın müddətdə heç kim onları narahat etməyib. Lakin ötən il bir nəfər əlində sənədləri ilə birlikdə gəlib qapını döyüb və mənzilin ona məxsus olduğunu deyib: "Biz 2016-cı ildə Mənzil Kooperativinin möhürü ilə, protokolla, maliyyə arayışı ilə, evin sahibinin notariusda təsdiqlənmiş ərizəsi ilə evi almışıq. Təmir etmişik. 2 ilə yaxın da yaşamışıq. Evin elektrik enerjisini, suyunu, bütün kommunal xidmətlərini öz adıma keçirmişəm və elə də ödəmişəm. Ailəmlə qanuni şəkildə də mənzilə qeydiyyata düşmüşəm. Lakin günlərin bir günü bir nəfər qapını döydü və ondan sonra işin üstü açıldı. Məlum oldu ki, bu ev məndən əvvəl 4 nəfərə satılıb. Lakin iş bununla da bitmir. Evin BŞİH tərəfindən order verilmiş sahibi də var: Rafael Allahverdiyevin o vaxt köməkçisi olmuş Mirəyyub Mirsultanov. M. Mirsulatnov ara qarışan vaxt orderi keçirib həyat yoldaşının adına. Yəni ev özünün yox, yoldaşının adınadır”.

R. Kazımov deyir ki, qonşuluğunda yaşayan 10-a yaxın ailə də eyni problemdən əziyyət çəkir: "Binada komendant işləyən 2 şəxs bu 10 evi təxminən 50-55 nəfərə satıb. 5 milyona yaxın pul yığıb. Bu işlərin üstü açılandan sonra isə 1 komendant həbs olunub, digəri isə Rusiyaya qaçmağa nail olub. Evlərin orderli sahibləri isə məhkəməyə müraciət edib. Evlərini istəyirlər. Amma adama deyərlər ki, ev 30 ilə yaxındır verilib, necə olub ki, bir dəfə gəlib evinizlə maraqlanmamısınız? Bu adamların evləri 5-10 nəfərə satılıb, evdə qeydiyyatıyla yaşayan ailələr var, amma bu BŞİH-in keçmiş işçiləri indi çıxıb ortaya və evə iddia irəli sürürlər”.

 

Zərərçəkən iddia edir ki, BŞİH-in sözügedən binadan ev almış vəzifəli şəxsləri komendantlarla əlbir olublar və evlərdən gələn pulları birgə yeyiblər: "Baxın, 2 binada ümumilikdə 110 mənzil var. Amma digər mənzillərlə bağlı heç bir problem yoxdur. Nə fırıldaq olubsa, bu 10 mənzillə bağlı olub. Komendantlar bu qədər özbaşınaydısa, elə digər mənzilləri də 5-10 nəfərə satardı. Amma cürət etmyiblər. Yəni evlərin sahibləri onlara bu cəsarəti verməyib. Digər 10 mənzilin sahibləri isə komendantlarla əlbir olublar. Düşünüblər ki, evi kimə satsalar da, orderli sahibləri bunlardır, əvvəl-axır iddia irəli sürüb alacaqlar. Yoxsa adam 30 il ərzində niyə bir dəfə də olsa öz evinə gəlib baxmasın? Bunlar mənzillərinin açarlarını veriblər komendanta, deyiblər nə istəyirsiniz edin, aramızda bölüşdürək. Hara fırladırsan fırlat, yenə də gəlib bu 1-ci şəxslə komendantın birgə işləməsini göstərir”.

 

R. Kazımov deyir ki, bina BŞİH-in balansında deyil və qurum bu binanı tanımır: "Bina Mənzil Kooperativi tərəfindən alındığı üçün BŞİH də bu binanı tanımır. Ona görə də mənzillərə "kupça” ala bilmirik, qaz çəkdirə bilmirik. Əgər BŞİH bu binanı tanımırsa, qurumun sabiq işçisinin orderi niyə hüquqi əsas kimi götürülür?”

İşlə bağlı məhkəməyə müraciət edilib. Məhkəmə isə mənzillərin orderli sahiblərinin tərəfindən çıxış edir: "Hakim deyir ki, sən 2016-cı ildə bu evə köçmüsən, ondan əvvəlki tarixlərdəki işi qaldıra bilməzsən. O necə olur ki? Bu nə hüquqdur anlamıram. Məhkəməni də "görüblər”, hakim də onların tərəfindədir. Evlərin orderli sahibləri deyir ki, komendant bizə evdə kirayənişin qaldığını bildiriblər. Ayba-ay da 1000 manat pul ödəyirdi bizə. Bəs elədirsə, bu adamlar niyə maraqlanmayıb ki, evində qalan kimdir? Axı biz evi çöldən də təmir etmişik. Təmiri də görmürdü bu adamlar?
 

Məhkəmədə deyirəm ki, əgər siz orderi almısınızsa, bu order üçün pul verilməliydi, o maliyyə arayışını göstərin. Deyir, qəbz yoxdur. Məhkəmə də əvvəlki işləri qaldırmğa imkan vermir, qərar çıxarır. Deyirəm, möhtərəm hakim, evi mənə satan adam burada yoxdur, möhür vuran adam yoxdur, onlar dindirilməyib. Siz necə olur ki, qərar çıxarırsınız? Heç nə demirlər. İş də beləcə qalıb...”

Zərərçəkənlər məsələ ilə bağlı aidiyyəti qurumlara müracət ediblər, lakin bir nəticə hasil olmayıb. (Bakupost.az)

Evi olmayanlara ŞAD xəbər: Prezidentdən vətəndaşlara güzəştli mənzillə bağlı vacib fərman

1518110726_screenshot_2.jpg


 Vətəndaşlara bundan sonra güzəştli mənzilləri Nazirlər Kabineti tərəfindən veriləcək

Araz.az bildirir ki, Azərbaycan Respublikası Prezidenti İlham Əliyev Azərbaycan Respublikası Prezidentinin 2016-cı il 16 noyabr tarixli 1113 nömrəli Fərmanı ilə təsdiq edilmiş "Azərbaycan Respublikasının Prezidenti yanında Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”nda dəyişiklik edilməsi haqqında Fərman imzalayıb.
Fərmanda deyilir:
Azərbaycan Respublikası Konstitusiyasının 109-cu maddəsinin 32-ci bəndini rəhbər tutaraq qərara alıram:

Azərbaycan Respublikası Prezidentinin 2016-cı il 16 noyabr tarixli 1113 nömrəli Fərmanı (Azərbaycan Respublikasının Qanunvericilik Toplusu, 2016, № 11, maddə 1820; 2017, № 5, maddə 821, № 11, maddə 2006) ilə təsdiq edilmiş "Azərbaycan Respublikasının Prezidenti yanında Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”nın 2.4-cü bəndində "Agentlik” sözü "Azərbaycan Respublikasının Nazirlər Kabineti” sözləri ilə əvəz edilsin.
Qeyd edək ki, mövcud olan qanunvericiliyə əsasən Mənzillərin əvəzləşdirilməsi onun sahibinin Agentliyə, habelə mənzili əldə etdiyi cəmiyyətə əsaslandırılmış yazılı müraciəti ilə həyata keçirilir və bu məsələyə Agentlik tərəfindən növbədənkənar olaraq, "İnzibati icraat haqqında" Azərbaycan Respublikasının Qanunu ilə müəyyən edilmiş qaydada baxılır, mənzillərin əvəzləşdirilməsinə yol verilən halları Agentlik müəyyən edirdi.
Bundan sonra Mənzillərin əvəzləşdirilməsi onun sahibinin Agentliyə, habelə mənzili əldə etdiyi cəmiyyətə əsaslandırılmış yazılı müraciəti ilə həyata keçiriləcək və bu məsələyə Nazirlər Kabineti tərəfindən növbədənkənar olaraq, "İnzibati icraat haqqında" qanun ilə müəyyən edilmiş qaydada baxılacaq. Mənzillərin əvəzləşdirilməsinə yol verilən halları Nazirlər Kabineti müəyyən edəcək.sputnik

14 -dən səhifə 46

Əlaqəli xəbərlər