PA-nın şöbə müdiri daha bir partiya sədri ilə görüşdü - Nələr müzakirə edilib?

edalet veliyevjpg 1588319500Prezident Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev Azərbaycan Milli Hərəkat Partiyasının (MHP) sədri Samir Cəfərovla görüşüb.

araz.az xəbər verir ki, görüşdə bir sıra məsələlər, o cümlədən ölkədə iqtidar-müxalifət dialoqu, COVİD-19-a qarşı mübarizə tədbirləri və Azərbaycan-Ermənistan sərhədində son hadisələr müzakirə olunub.

İlk növbədə Ə. Vəliyev Ermənistan silahlı qüvvələrinin Ermənistan-Azərbaycan sərhədinin Tovuz rayonu istiqamətində törətdiyi hərbi təxribata toxunub. Qeyd olunub ki, ordumuzun layiqli cavabı nəticəsində düşmən məqsədlərinə nail ola bilməyib.

Digər tərəfdən, bildirilib ki, mövcud sağlam siyasi mühitin nəticəsi olaraq 43 siyasi partiya birlikdə, 4 siyasi partiya isə ayrı-ayrılıqda Ermənistanın hərbi təxribatını pisləyib və ölkəmizin bütövlüyü naminə Ali Baş Komandan ətrafında sıx birləşdiklərini bəyan ediblər.

Siyasi dialoqun nəticəsi kimi son bir neçə ay ərzində ölkədə 4 yeni siyasi partiyanın dövlət qeydiyyatına alınması, 3 siyasi partiyanın təsis sənədlərində edilmiş dəyişikliklərin yenidən qeydiyyata alınmasını və 2 yeni siyasi partiyanın təsis qurultaylarının keçirilməsini müsbət hal kimi qiymətləndirən S. Cəfərov yaxın bir dövrdə MHP-nin də qurultayının keçirilməsini planlaşdırdığını qeyd edib.

Görüş zamanı tərəflər pandemiyaya qarşı mübarizə çərçivəsində ölkə başçısı tərəfindən zamanında verilən qərarların respublika ərazisində virusa yoluxma sayının azalmasına və əhalinin sağlamlığını maksimum qorumasına xidmət etdiyi barədə fikir mübadiləsi aparılıb.

Eyni zamanda ikitərəfli görüş zamanı pandemiya dövründə bir çox sektorun karantin rejimi çərçivəsində fəaliyyətini dayandırması nəzərə alınaraq, əhalinin sosial rifahının yaxşılaşdırılması istiqamətində dövlət tərəfindən vətəndaşlara sosial və iqtisadi yardım paketlərinin hazırlanması məsələsinə də toxunulub. Bu istiqamətdə atılan addımların Azərbaycan hökumətinin daim xalqın yanında olduğunu sübutu kimi qiymətləndirilib.

Sonda ölkədə iqtidar-müxalifət dialoqunun davam etdirilməsinin zəruriliyi qeyd olunub.

araz.az

Əlaqəli xəbərlər