Səlim Müslümov Maliyyə Nazirliyinə külli miqdarda ziyan vurub

selim88Sabiq əmək və əhalinin sosial müdafiəsi naziri Səlim Müslümovun cinayət işi üzrə zərərçəkmiş qismində Maliyyə Nazirliyi tanınır.

araz.az  Pravda.az-a istinadən bildirir ki, ittiham aktında göstərilib ki, keçmiş nazir Maliyyə Nazirliyinə külli miqdarda ziyan vurub.

Hazırda cinayət işinin ibtidai istintaqı yekunlaşaraq baxılması üçün Bakı Ağır Cinayətlər Məhkəməsinə göndərilib.

İş hakim Faiq Qəniyevin icraatına verilib. Məhkəmənin hazırlıq iclasının vaxtı yaxın gülərdə açıqlanacaq.

Qeyd edək ki, Səlim Müslümov Azərbaycan əmək və əhalinin sosial müdafiəsi naziri vəzifəsində işlədiyi müddətdə nazirliyin fəaliyyət istiqamətləri üzrə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsinə dair faktlar Dövlət Təhlükəsizliyi Xidmətində araşdırılıb.

Toplanılan materiallar əsasında başlanılan cinayət işi üzrə Səlim Müslümovun xidməti vəzifələrinin icrası ilə əlaqədar özü üçün qanunsuz üstünlüklər əldə etmək məqsədilə qulluq səlahiyyətlərindən tamah niyyəti ilə qulluq mənafeyinə qəsdən zidd olaraq istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsinin tələb edilərək alınmasına əsaslı şübhələr müəyyən edilib.

Həmçinin Səlim Müslümovun nazirliyin Dövlət Əmək Müfəttişliyi Xidməti tərəfindən ölkə ərazisində istehsal, sosial-məişət və iaşə təyinatlı obyektlərin inşası və yenidən qurulması zamanı əməyin mühafizəsi tələblərinə əməl olunması, onların istismara buraxılmasına razılığın verilməsi, əməyin mühafizəsi tələblərinə uyğunluğu ilə bağlı müəssisələrdə aparılmış yoxlamaların nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub.

Eyni zamanda, Daxili nəzarət şöbəsi tərəfindən ərazi strukturlarında aparılmış yoxlamaların nəticələri ilə bağlı onun həmin nazirliyin müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyən edilib. Səlim Müslümov Azərbaycan Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib.

Daha sonra səhhətindəki problemlərlə bağlı sabiq nazir ev dustaqlığına buraxılıb

araz.az xəbər portalı.

Azərbaycanın dostu Çak Norris

 

2022 07 19 691348 norrisHeç unutmaram, II Qarabağ müharibəsi zamanı bəzi  qərəzli Qərb media mənsubları əleyhimizə təbliğat aparanda dünya şöhrətli aktyor, ssenarist, döyüş sənətləri ustası əfsanəvi Çak Norris gözlənilmədən Azərbaycana dəstək videosu paylaşmışdı. Gəncliyimizin kumiri ərazilərimizin erməni işğalından ildırım sürətilə azad edilməsindən vəcdə gələrək belə demişdi:

“Qarabağ, sən artıq öz həqiqi ailənlə xoşbəxtsən! Sizə  həmişəlik təhlükəsizlik şəraitində yaşamağı və hər şeyin ən yaxşısını arzulayıram!”

Bir vaxtlar favoritim olan Çak Norris döyüş filmlərinin ya gənc, ya da orta yaşlı qəhrəmanı idi. Sən demə, tarixə bizim qələbə ilimiz kimi düşən 2020-ci il Çak Norrisin də 80 yaşının tamam olduğu il imiş.

Azərbaycanın haqlı mövqeyini müdafiə elədiyinə görə daha artıq rəğbət bəslədiyim aktyorun hazırkı yaşam hekayəsini vərəqləmək üçün internetə baş vurdum. Qarşıma çıxan bir xəbərdən bildim ki, sən demə, dünya şöhrətli aktyorun Azərbaycana sevgisi çoxdan varmış. 7 il bundan öncənin, 2015-ci ilin may ayının xəbəridir: “Azərbaycan Peşəkar Karate Federasiyasının baş katibi, dünya çempionu Vüsal Abdullazadənin verdiyi məlumata görə, dünyanın məhşur aktyor və idmançısı Çak Norris milli komandamıza Amerika Açıq Çempionatında iştirak üçün dəvət göndərib. Və bütün xərcləri öz üzərinə götürüb”.

Çak Norris uzun illər ərzində onlarla məşhur filmdə rol alıb, lakin “Əyilməz Uoker” serialındakı Kordell Uoker obrazı ona böyük şöhrət qazandırıb. Bu obrazına görə Norris  Hollivudun ən güclü kişisi statusunu qazanıb.

Aktyorun pərəstişkarları və tələbələri sosial şəbəkələrdə onun barəsində çoxlu pozitiv, yumorlu deyimlər dövriyyəyə buraxırlar. Məsələn, “Əyilməz Uoker” serialını izləyənlər internet fenomeni olan aktyor haqda belə bir zarafat yazırlar: “Çak Norris trenajorda məşq edən zaman trenajor daha çox əzələ yığır”. Onun 80 illik yubileyi ərəfəsində yayılmış ən məşhur zarafatlardan biri isə belə olub: “Çak Norris 80 yaşa yox, 80 yaş Çak Norrisə çatıb”.

Çak Norris necə idmançı oldu?

Karlos Ray Norris (Çakın əsl adı belə olub) 1940-cı ildə Oklahomada kasıb bir ailədə dünyaya gəlib. Onun şəxsiyyət kimi formalaşmasında ordudakı fəaliyyəti mühüm rol oynayıb. Gələcək idmançı Hərbi Hava Qüvvələrinin sıralarında Cənubi Koreyada xidmət çəkərkən döyüş sənətləri ilə dərindən məşğul olub və ilk qara kəmərini də orada qazanıb.

Ordudan tərxis edildikdən sonra Norris özünün idman məktəbini açıb, yeniyetmə və gənclərə karate dərsləri keçir. Onun tələbələri arasında Elvis Preslinin həyat yoldaşı Prisilla, aktyor Stiv Makkuin kimi məşhur şəxslər də olub. Yeri gəlmişkən, Çak taekvondo üzrə səkkizinci dərəcəli qara kəmər alan ilk amerikalılardandır.

Norrisin döyüş sənətləri üzrə fövqəladə qabiliyyəti Hollivudun qapılarını onun üzünə açır. O, Hollivudda bütün zamanların ən yaxşı döyüşçüsü Brüs Li ilə tanış olur. “Əjdahanın qayıtması” filminin çəkiliş meydançasında Çak Norris Brüs Li ilə döyüş səhnələri yaradır. Filmdə iki nəhəngin döyüşü savaş filmlərinin şedevr səhnələrindən sayılır. Çak həmin filmin çəkilişi zamanı aktyor dostu Brüs Li ilə necə zarafatlaşdığını müsahibələrinin birində belə xatırlayır:

“Həmin vaxt mən dünya çempionu idim. Brüsdən zarafatla soruşdum:

- Səncə, bu döyüşdə hansımız qalib gələcəyik?

Brüs Li burnunu çəkərək məzəli bir ciddiyyətlə dedi:

- Əlbəttə, mən! Axı filmin ulduzu mənəm! 

Mən də elə həmin məzəli tövrlə dedim:

- Görürəm ki, sən artıq dünya çempionunu məğlub etmək istəyirsən.

Brüs Li yenidən öz məzəli intonasiyasına qayıdaraq:

- Xeyr, mən dünya çempionunu məğlub etmək yox, öldürmək istəyirəm! - söylədi”.

Norrisin peşəkar aktyorluq karyerası

1990-cı illərdə Çak Norrisin baş rolda oynadığı “Əyilməz Uoker” serialı aktyora dünya şöhrəti qazandırır. Doqquz mövsümü əhatə edən hit serial 1993-cü ildən 2001-ci ilə qədər yayımlanır.

2000-ci illərin əvvəllərində də Norris bir çox filmlərdə rol alır, “Fövqəltəbii”, “Prezidentin adamı” və “Prezidentin adamı: Qumdakı xətt” filmlərində xüsusilə yaddaqalan obrazlar yaradır. Hətta “Şeytan yuvası” adlı dəhşət filmində belə rol alan Çak daim idman məşqlərinə gedir, heç vaxt formadan düşmür.

2012-ci ildə aktyor altı illik fasilədən sonra ilk dəfə “Ələkeçməzlər - 2” filmində çıxış edir. Həmkarı Silvestr Stallonenin sözlərinə görə, Norrisin bu layihədə iştirakı son dərəcə müəmmalı idi, çünki qocaman aktyor yeni filmə çəkilib-çəkilməməklə bağlı uzun müddət düşünməli olmuşdu. Nəhayət, o, bir şərtlə - yalnız dava-qırğınsız macəra filmində iştirak edəcəyinə əmin olduqdan sonra filmdə rol almağa razılaşır. Çak həmin filmdə Yalquzaq ləqəbli Con Bukeri çox təsirli oynadığına görə tamaşaçılar filmi çox vaxt “Tənha Canavar”, yaxud “Yalquzaq” adlandırırlar.

O həm də ssenarist və prodüser kimi fəaliyyət göstərir. Məsələn, “Loqanın savaşı” filminin prodüseri Çak Norris, ssenari müəllifi isə Çakın qardaşı Aron Norrisdir. Çak Norris “Əyilməz Uoker” teleserialının da ssenari müəlliflərindən biridir.

Hazırkı fəaliyyəti

Aktyorluq karyerası artıq onun üçün arxa plana keçib. Norris xeyli müddətdir bir çox dini xeyriyyə cəmiyyətlərinin, fondların fəal üzvüdür. Aktyor “World Net Daily” saytının ABŞ-da xristianlığın təbliğinə həsr olunan müvafiq bölümünə rəhbərlik edir.

1990-cı ildə Çak xanımı ilə birlikdə “Kick the Drugs Out of America” Fondunu yaradır. Təşkilat uşaq və yeniyetmələri müxtəlif döyüş sənətlərinə yönləndirməklə onları zərərli vərdişlərdən yayındırır. İndiyədək həmin məktəbdən 80 mindən çox insan yararlanıb.

Çak Norris aktiv siyasi mövqeyi ilə də seçilir. Ustad idmançı ABŞ-ın Respublikaçılar Partiyasının fəal dəstəkçilərindəndir. 2012-ci ildə Amerika xalqına videomüraciətində o, prezident Barak Obamanın ikinci müddətə seçilməsinin ABŞ üçün fəlakət olacağını söyləmişdi.

Hollivud ulduzu özünü ədəbiyyatda da sınayıb. Onun “Qara kəmər” bestselleri dünyada ən çox satılan kitablardandır. Siyasi mövzuda yazdığı “Vətənpərvərlik: Amerikanı problemlərdən necə xilas etməli”, elmi - fantastik janrda qələmə aldığı “Ədalət atlıları” və “Ədalətə təhdidlər” kitabları oxucular arasında populyardır.

Şəxsi həyatı

Çak Norris beş uşaq atasıdır. Deyilənə görə, iyirmi il sonra ona məlum olub ki, sən demə, nikahdankənar altıncı övladı da varmış. Sosial mediada paylaşdığı fotolara əsaslansaq, Çak bu illər ərzində çox dəyişməyib. O, idman zalına tez-tez baş çəkir, sosial platformalarda sağlam həyat tərzini təbliğ edir. Özünün “Facebook” səhifəsində aktyor hələlik qocalmaq fikrindən uzaq olduğunu bildirərək yazır: “Qocalığı qovmaq üçün bundan yaxşı fürsət yoxdur”. 

Bu yazını Vətənimiz üçün dost-düşməni sınadığımız bir məqamda uzaqdan da olsa Azərbaycanın yanında olduğunu bildirən sevimli aktyora vəfa borcu kimi yazdım.

Murad KÖHNƏQALA

Sürücülər 5 manata görə kondisionerləri qoşmurlar -AÇIQLAMA

1658226091 1658224427343

Sumqayıt şəhərində fəaliyyət göstərən marşrut avtobuslarının əksəriyyətində kondisioner problemi yaşanır. 

araz.az  Sumqayit.tv-yə  istinadən bildirir ki, bu haqda Sumqayıt şəhər sakinləri məlumat verib. Onların iddiasına görə avtobusların əksəriyyətində kondisionerlər işləmir. Baxmayaraq ki, həm havalar çox isti  keçir, həm də müdiriyyət tərəfindən avtobusların pəncərələrinə kondisionerlərin işlək olması ilə bağlı məlumat dərc olunaraq yapışdırılıb. Sürücülərin əksəriyyəti isə demək olar ki, bu cür halları nəzərə almır və kondisionerləri yandırmır. Belə hallardan biri də şəhərimizdə fəaliyyət göstərən dövlət qeydiyyat nömrəsi 50 AE 856 olan 10A avtobus marşrutunda müşahidə olunub. Bu da sərnişinlər arasında haqlı narazılığa səbəb olub. 
Məsələ ilə bağlı Sumqayıt şəhər Nəqliyyat Departamentinin rəis müavini Tofiq Saydumov ilə əlaqə saxladıq. Nəqliyyat rəsmisi məsələyə belə münasibət bildirib: “Düzü, mən məzuniyyətimlə əlaqədar Sumqayıt şəhərində deyiləm. Bu səbəbdən məsələ ilə bağlı məlumatlı deyiləm. Lakin bu problemlə bağlı deyə bilərəm ki, sürücülər 4-5 litr yanacağa görə kondisioneri yandırmırlar. Sumqayıt şəhər marşrutlarının 99%-də kondisionerlər işlək vəziyyətdədir. Hətta 10A marşrutu 7 metrlik yeni avtobuslardır. Bu üzdən hamısında kondisioner işləməlidir. Kondisioneri qoşmayan sürücülər 5 manat artıq pul qazansınlar deyə şərəfsizlik edir. Amma dediyim kimi hal hazırda işdə olmadığım üçün sizə bununla bağlı dəqiq məlumat verə bilmirəm.”
 
araz.az xəbər portalı.

Səsi sonra çıxacaq kəşfiyyat səfərləri: "Titrəyiş"in episentri isə İrəvan olacaq...

 
kodes4
 
ABŞ-ın Mərkəzi Kəşfiyyat İdarəsinin direktoru Uilyam Börnsin gözlənilmədən İrəvana səfər etməsi və ölkə rəhbərləri ilə görüşlər keçirməsi diqqətçəkən hadisədir. MKİ rəhbərləri hər saat xarici ölkələrə səfər etmirlər. Maraqlıdır ki, ABŞ kəşfiyyatının şefinin ardınca Rusiya Xarici kəşfiyyat İdarəsinin rəisi Sergey Narışkin İrəvana gəlir və o da bəzi görüşlər keçirir. S.Narışkin gəlişinin Börnsin səfəri ilə bağlı olmadığını, amma Börnisin gəlişinin onun səfəri ilə bağlı olmasının mümkünlüyünü vurğulasa da, aydındır ki, Rusiya MKİ rəhbərinin gəlişindən xeyli narahat olub. Dünyanın aparıcı və üz-üzə dayanan iki kəşfiyyat orqanının bir-birinin ardınca İrəvan səfərləri 70-ci illərin Beyrutunu xatırladır.
Sovet kəşfiyyat orqanları ilə məxvi əməkdaşlıq edən xarici vətəndaşlardan birinin o vaxtkı Beyrut üçün sonralar xatirələrində yazdıqları, indiki İrəvanla eynidir: “ 70-ci illərin əvvəllərində Beyrut dünya casusluğunun mərkəzi idi. Özünə hörmət edən hər bir kəşfiyyat xidməti orda rezidenturasını saxlayırdı. Orada adi insanlar yox idi - yalnız casuslar vardı. Hər şey və hər kəs satılırdı və alınırdı. Orada dünyanın aparıcı ölkələrinin kəşfiyyat xidmətlərinin maraqları üst-üstə düşürdü. Amerikalıların çox güclü mövqeləri var idi. Həmişə olduğu kimi, onlara qarşı sovet kəşfiyyatçıları dayanırdı”
Hazırda belə bir situasiya Ermənistanda mövcuddur. XX -ci əsrin 70-ci illərində Beyrutdakı vəziyyət XXI-ci əsrin iyirminci illərində İrəvanda təkrar olur. Sərhədlərinə nəzarət, vətəndaşlarının giriş-çıxışlarının başqa ölkənin sərhədçiləri tərəfindən yoxlanması, dəmir yoluna bütünlüklə, iqtisadiyatının 40 faizindən çoxuna başqa ölkənin nəzarət etdiyi dövlətin müstəqilliyi formal xarakter daşıyır və belə dövlətlər satellit ölkələr sayılır. Satellit ölkələr xarici kəşfiyyatlar üçün rahat məkan hesab olunur.., İrəvan kimi.
MKİ rəhbəri görüşləri Paşinyan və Armen Qriqoryanla keçirsə də, Narışkin Ermənistan Təhlükəsizlik Xidmətinin şefi Abazyanla görüşür və çox güman ki, amerikalıların guya perspektiv təxribatları barədə ona xəbərdarlıq edib. Həm də yalnız Birləşmiş Ştatların təxribatlarını deyil, eyni zamanda Ermənistanda Kanada səfirliyinin açılması ilə bağlı rəsmi Ottavanın səfirliyin açılmasını Ermənistanı Rusiya təsirindən qorumaq və Kremli çəkindirmək məqsədi daşıdığını bildirməsinə mənfi reaksiyasını çatdırıb. Rəsmi xəbərlərdə kəşfiyyat məlumatlarının mübadiləsi barədə deyilənlər onu təsdiqləyir ki, Ermənistanın xüsusi xidmət orqanları da müstəqil deyil və şimaldan gələn təlimatlar əsasında fəaliyyət göstərib, göstərir və bu istiqamətdə davam edəcək. Narışkinin mətbuat konfransında Ermənistanın kəşfiyyat orqanının yaxın gələcəyə müstəqil qurum kimi fəaliyyət göstərməsinə münasibət bildirərkən - “indiyədək ümumi vəzifələri böyük miqyasda birgə həyata keçirdiklərini” və yeni yaranacaq quruma zəruri metodoloji köməyi əsirgəməyəcəklərini vurğulaması göstərir ki, ermənilərin ən məxvi seyflərinin açarları Rusiyanın əlindədir.
Bu səfərlər bölgədə intensiv ciddi siyasi proseslərin baş verdiyi ərəfədə baş verdi. Azərbaycan ilə Avropa İttifaqı arasında enerji sahəsində Strateji Tərəfdaşlığa dair Anlaşma Memorandumu”nun imzalanması, Tehranda bu gün Rusiya, Türkiyə və İran prezidentlərinin görüşü, Brüsseldə keçirilən Azərbaycan-Avropa İttifaqı Əməkdaşlıq Şurasının 18-ci iclası və kəşfiyyat liderlərinin səfəri ərəfəsində də Azərbaycan və Ermənistan XİN rəhbərlərinin vasitəçisiz Tbilisidə ikitərəfli görüşü. Xüsusi olaraq vurğulamq lazımdır ki, Tbilisidəki görüşü olduqca vacib siyasi hadisədir. Ona görə yox ki, görüşdə hansısa razılaşma olub və bu görüş iki ölkə arasında münasibətləri sürətlə normallaşdıracaq. Sadəcə, nə Rusiyanın, nə də Avropanın vasitəçiliyi olmadan ( ən azı rəsmi informasiyalarda və siyasi şərhlərdə kiminsə vasitəçiliyi barədə heç bir məlumat yoxdur) görüşün Tbilisidə keçirilməsi tərəfləri kənar şərt  və təsirlərdən azad etmiş olur. Bu kənar təsir tam ortadan götürülməsə də, ikitərəfli görüşlərin nə Moskavada, nə də Brüsseldə baş tutmaması sülh prosesini sürərləndirə biləcək amillərdən biridir. ABŞ və Avropa bu görüşü təqdir edir, Kremldən rəsmi mövqe bildirilməsə də, Rusiya siyasi şərhçiləri narazılıqlarını dilə gətirirlər. Yeri gəlmişkən, delimitasiya üzrə ikitərəfli komissiyanın da Moskvada və Brüsseldə deyil, Qırmızı körpüdə görüşməsinin daha tez real nəticələrə səbəb olacağını əvvəllr də qeyd etmişik.
 Sonda qeyd edək ki, iki super dövlətin kəşfiyyat idarələrinin rəhbərləri bir-birinin ardınca İrəvana gəlibsə.., deməli yaxın vaxtlara əhəmiyyətli siyasi, hərbi gedişlərin şahidi ola bilərik. Kəşfiyyatçılar adətən sakit gəlib-gedərlər, amma bu gəlişin səsi sonra çıxır və bu səsin episentri İrəvanda olacaq. Gözləyək. Azərbaycan bu səfərləri nəzərə almalıdır, sürprizlər gözlənilməsə də, hazırlıqlı olmağın faydası var.
İlham İSMAYIL.

“AKADEMİYA ÜÇÜN ƏN UYĞUN NAMİZƏDLƏRDƏN BİRİDİR” – “Arif Həşimova qarşı ittihamlar mənə inandırıcı gəlmir”

c9402dfb 615b 4547 b014 1b5bcb1a9c94

Ötən gün Milli Məclisin sədr müavini Adil Əliyevin mətbuatda gedən açıqlamaları ciddi rezonans doğurub.

Belə ki, Azərbaycanda “5-ci kolon”la bəzi müxalif qüvvələrin dövlətçiliyimizə qarşı ittifaq qurduğunu deyən vitse-spiker, Ramiz Mehdiyevin təxribatçı əməllərinə görə vəzifəsindən uzaqlaşdırıldığını, lakin kreslosunu öz adamına buraxdığını bildirib: "Bu, açıq şəkildə ifadə olunmasa da, Ramiz Mehdiyevin vəzifədən uzaqlaşdırılmasına səbəb, təxribatçı əməlləri idi. Bu adam əlində olan səlahiyyətlərindən istifadə edərək əksər dövlət strukturlarına özünə bağlı kadrları yerləşdirib. Ramiz Mehdiyev PA-dan qovulduqdan sonra da rahat dayanmadı. AMEA-nın prezidenti işlədiyi zamanlar tez-tez köhnə məmurları öz ətrafına toplayıb onları təlimatlandırdığına dair məlumatlar var. Sonda AMEA-dakı yerindən də uzaqlaşdırıldı. Kreslosunu isə öz adamına buraxdı. Düzdür, hələ ki, Arif Həşimov AMEA-nın prezidenti vəzifəsinə təyin olunmayıb, sadəcə bu vəzifənin icraçısı kimi fəaliyyət göstərir, amma onun da Ramiz Mehdiyevin təlimatı ilə işlədiyi bəllidir. Görünür, buna görə də indiyədək rəsmən AMEA prezidenti vəzifəsinə gətirilməyib".

araz.az  AzPolitika.info-ya istinadən xəbər verir ki, bu mövzuyla bağlı Milli Məclisin üzvü, BQP başqanı Fazil Mustafa    bildirib ki, Arif Həşimov kifayət qədər savadlı, öz sahəsində ciddi mütəxəssis hesab olunan insanlardan biridir: "Bir neçə beynəlxalq konfransda onun məruzələrini dinləmişəm. Ona görə də əminliklə deyə bilərəm ki, A.Həşimov elektrofizika və energetika sahəsində Azərbaycanın ən savadlı mütəxəssislərindən biridir. O, Azərbaycan elminə kifayət qədər böyük töhfələr verib. Mən onun kiminsə adamı olması iddialarını doğru hesab etmirəm. Çünki o, müstəqil bir elm adamıdır. Xatırladım ki, A.Həşimovu bir ara əsassız şəkildə akademiyadan uzaqlaşdırmışdılar. Lakin həmin sahədə hazırlıqlı mütəxəssis olmadığından, onu yenidən bu işə qaytardılar. Bu isə A.Həşimovun kiminsə adamı olmasından daha çox elm adamı olduğunu göstərir".

F.Mustafa qeyd edib ki, A.Həşimovun akademiya sistemində olması alimlərə qarşı daha ədalətli münasibətin formalaşmasına kömək edəcək: "A.Həşimovun AMEA-ya gəlişindən sonra bu sahədə normallaşma baş verdi. Akademiyadakı şəxslər də onun rəhbərliyini normal qarşıladılar. Açığı, ona qarşı hansı əsaslarla bu cür ittihamların irəli sürüldüyünü bilmirəm. Ancaq onu tanıdığım üçün bu iddilar mənə inandırıcı gəlmir. Hesab edirəm ki, A.Həşimov akademiya üçün ən uyğun namizədlərdən biridir".

Deputat əlavə edib ki, Ramiz Mehdiyev 25 ildən çox Prezident Administrasiyasının rəhbəri olduğundan, bütün qurumlarda ona yaxın adamların olması mümkündür: "Vəzifədə olan insanların hamısının hansısa formada müxtəlif adamlarla münasibəti var. Vaxtilə hazırda həbsdə olan bir sıra nazirlərlə, vəzifəli şəxslərlə işləyənlərin bəziləri daha sonra yuxarı vəzifələrə təyin olunublar. Ona görə də belə məsələlərdə həmin şəxslərin dövlətə bağlılığına baxmaq lazımdır. Bu sahədə kimin dövlətə, dövlətçiliyə, Prezidentə qarşı hansısa fəaliyyəti varsa, bunun konkret faktlarda ifadəsi daha doğrudur. Yoxsa, “o bunun adamıdır, bu onun adamıdır” kimi ittihamlar başlasa, o zaman gərək ölkədə normal adam qalmasın".

"Ancaq təbii ki, Adil bəyin qeyd etdiyi təhlükə mövcuddur. Hakimiyyət içində müəyyən qruplar var ki, müəyyən islahatların həyata keçirilməsinə maneçilik törədirlər. Ona görə də bu məsələni daha da konkretləşdirib həmin adamları aşkara çıxararaq, zərərsizləşdirmək lazımdır. Amma bu işi elə aparmaq lazımdır ki, dövlətə bağlı kadrlarımız qaralama kampaniyasının qurbanı olmasınlar. Bir daha qeyd edirəm ki, kiminsə hansısa sahədə dövlətçiliyimizə qarşı fəaliyyəti varsa, bunu ümumiləşdirmədən, konkret şəkildə ortaya qoymaq lazımdır ki, gələcəkdə dövlətimiz bundan zərər görməsin", - deyə deputat qeyd edib.

araz.az xəbər portalı.

24 -dən səhifə 2245

Əlaqəli xəbərlər