İcra hakimiyyətləri ləğv edilsin! 14 quberniya…

apar

Bir müddət öncə millət vəkili Vahid Əhmədovun təklif etdiyi icra hakimiyyətlərinin ləğvi məsələsi yenidən gündəmə gəlib.

Sosial şəbəkələrdə Azərbaycan Prezidentinin 7 iyul fərmanı ilə ölkədə iqtisadi rayonların 14-ə çatdırıldığı vurğulanmaqla, inzibati ərazi vahidlərinin də bu prinsiplərə uyğun ola biləcəyi ilə bağlı müzakirə açılıb.

Qeyd edilir ki, icra hakimiyyətləri büdcəyə əlavə yük yaradır və yerli özünüidarəetmə orqanlarının inkişafına imkan vermir. Hökumət İH-ləri ləğv etməklə həm büdcəni əlavə yükdən xilas edə, paralel olaraq yerli bələdiyyələrin inkişafı ilə dövlət büdcəsinə əlavə daxilolmalara nail ola bilər.

İqtisadçı Natiq Cəfərli də eyni təşəbbüslə çıxış edib. O bildirib ki, İcra Hakimiyyəti Başçısı institutunun ləğvi və son yaradılmış iqtisadi rayonların həm də inzibati ərazi vahidinə çevrilməsi nəzərdən keçirilməlidir. Beləliklə, həm yerli özünüidarəetmə orqanları inkişaf edər, böyük şəhərlərdə mer seçilər, eyni zamanda büdcəyə yük olan əlavə strukturdan dövlət qurtulmuş olar.

Xatırladaq ki, Prezident İlham Əliyevin 7 iyulda imzaladığı fərmanla Azərbaycanda 12 iqtisadi rayon artırılaraq 14-ə çatdırılıb. Bunlar aşağıdakılardır:

1. Bakı iqtisadi rayonu (Bakı şəhəri);

2. Naxçıvan iqtisadi rayonu (Naxçıvan şəhəri, Babək, Culfa, Kəngərli, Ordubad, Sədərək, Şahbuz və Şərur rayonları);

3. Abşeron–Xızı iqtisadi rayonu (Sumqayıt şəhəri, Abşeron və Xızı rayonları);

4. Dağlıq Şirvan iqtisadi rayonu (Ağsu, İsmayıllı, Qobustan və Şamaxı rayonları);

5. Gəncə–Daşkəsən iqtisadi rayonu (Gəncə və Naftalan şəhərləri, Daşkəsən, Goranboy, Göygöl və Samux rayonları);

6. Qarabağ iqtisadi rayonu (Xankəndi şəhəri, Ağcabədi, Ağdam, Bərdə, Füzuli, Xocalı, Xocavənd, Şuşa və Tərtər rayonları);

7. Qazax–Tovuz iqtisadi rayonu (Ağstafa, Gədəbəy, Qazax, Şəmkir və Tovuz rayonları);

8. Quba–Xaçmaz iqtisadi rayonu (Xaçmaz, Quba, Qusar, Siyəzən və Şabran rayonları);

9. Lənkəran–Astara iqtisadi rayonu (Astara, Cəlilabad, Lerik, Lənkəran, Masallı və Yardımlı rayonları);

10. Mərkəzi Aran iqtisadi rayonu (Mingəçevir şəhəri, Ağdaş, Göyçay, Kürdəmir, Ucar, Yevlax və Zərdab rayonları);

11. Mil–Muğan iqtisadi rayonu (Beyləqan, İmişli, Saatlı və Sabirabad rayonları);

12. Şəki–Zaqatala iqtisadi rayonu (Balakən, Qax, Qəbələ, Oğuz, Şəki və Zaqatala rayonları);

13. Şərqi Zəngəzur iqtisadi rayonu (Cəbrayıl, Kəlbəcər, Qubadlı, Laçın və Zəngilan rayonları);

14. Şirvan–Salyan iqtisadi rayonu (Şirvan şəhəri, Biləsuvar, Hacıqabul, Neftçala və Salyan rayonları).

 

araz.az xəbər portalı.

İşçilər Yasamal İcra Hakimiyyətindən narazılıq edir: "Maaşlarımız verilmir, ancaq MKİS-də çoxlu sayda saxta iş ştatı mövcuddur..."

yasamal icrajpg 1626525694

Yasamal rayon Mənzil Kommunal və Texniki Xidmət Sahələrinin tabeliyində çalışan işçilərlə bağlı əmək qanunvericiliyinin pozulduğu iddia olunur.

araz.az Report-a istinadən xəbər verir ki, işçilərə əmək müqavilələrinin mətni göstərilmir, qanunsuz olaraq, şənbə, bazar və qeyri-iş günlərində məcburi işə çağırılırlar:

“Süpürgəçilər səhər saat 5-dən axşam 6-a qədər işlədilir. Həmin işçilərə məzuniyyət və məzuniyyət pulları verilmir. İşə vaxtından artıq işləməyə görə də maaşlarına heç bir əlavələr edilmir. MKİS-də çoxlu sayda saxta iş ştatı mövcuddur. Müxtəlif insanların adı süpürgəçi kimi qeydiyyata salınır, onlara rəsmi staj yazılır və bunun əvəzində MKİS rəhbərliyi həmin şəxslərə yazılan əmək haqları kartlarının sahibinə çevrilir. Bu pullar bir neçə şəxs arasında bölüşdürülür".

Şikayət məktubunda Yasamal Rayon İcra Hakmiyyətinin də adı çəkilir.

Habelə, qeyd edilib ki, Mənzil Kommunal və Texniki Xidmət Sahələrində minlərlə işçi adı getsə də, əslində real iş bir neçə yüz adam tərəfindən görülür və yoxlamalar zamanı real işçilər müxtəlif məkanlarda peyda olmağa məcbur edilirlər:

"Çox az sayda işçi xüsusi fərqləndirici gödəkçələrlə təmin edilib. Qanunla nəzərdə tutulmuş maaş artımı və güzəştlər barədə də işçilər xəbərsizdirlər, hazırda günün müxtəlif saatlarında süpürgəçiləri işə çağırırlar, 19, 21, 64, 56, 22, 32, 24 nömrəli MKİS-lərdə işçilərə maaş yarıbayarı verilir”.

Məsələ ilə bağlı Yasamal MKİS-in şöbə rəisi Cavid Həşimov "Report"a bildirib ki, qeyd olunan iddialar həqiqəti əks etdirmir:

“Yasamalda bir çox MKİS var. Mən maaş və digər məsələlərlə bağlı dəqiq məlumat verə bilmərəm. Çünki bu hər biri ayrı-ayrı şöbələrin işidir. Amma işçilərin hamısına vaxtı çatan kimi məzuniyyətlər verilir. Gələn ilə saxlanıla bilməz. Şikayət ərizəsini araşdırmadan məsələ ilə bağlı hər hansı dəqiq fikir bildirə bilmərəm. İşçilər səhər 5-də işə çağırılırsa, bunu yerində araşdırmalıyıq. Şikayətdə deyilənlərin həqiqətə uyğun olub-olmadığını araşdırmadan nə hə deyə bilərəm, nə də yox”.

Yasamal Rayon İcra Hakmiyyətindən isə məsələyə münasibət öyrənmək mümkün olmayıb.

 

 

araz.az xəbər portalı.

Milli Xalça Muzeyi Anlaşma Memorandumu imzalayıb

 

WhatsApp Image 2021 07 17 at 22.46.40

Azərbaycan Milli Xalça Muzeyindən araz.az-a daxil olan məlumata görə, muzey Rusiya Federasiyası Çeçenistan Respublikasının Milli Muzeyi ilə Anlaşma Memorandumu imzalayıb. Sənədi hər iki muzeyin direktorları – Şirin Məlikova və Zalina Mamayeva imzalayıblar. İmzalanma mərasimi Ş. Məlikovanın Qroznı şəhərinə ezamiyyəti zamanı baş tutub.

Qeyd edək ki, Azərbaycan Milli Xalça Muzeyi ölkəmizin Çeçenistan Respublikasının muzeyləri ilə əməkdaşlıq edən ilk muzeyidir. Bu Memorandum da, iki ölkə arasında mədəniyyət sahəsində əməkdaşlığın inkişafı və genişləndirilməsi məqsədi daşıyır. Belə ki, bundan sonra, muzey işi sahəsində tədqiqatlar aparılacaq, elmi işçilərdən ibarət nümayəndə heyətlərinin səfərləri təşkil ediləcək, həmçinin metodiki ədəbiyyat mübadiləsi və birgə sərgi layihələri reallaşdırılacaq.
Bu sənəd Azərbaycan -- Rusiya mədəni əlaqələrinin inkişafına daha bir töhfədir.WhatsApp Image 2021 07 17 at 22.46.46

araz.az xəbər portalı.

14 -dən səhifə 1652

Əlaqəli xəbərlər