1 yaşlı uşaq və babasının ölümünə səbəb olan cərrah Elnur Həsənovla bağlı şok iddialar – MÜRACİƏT OLUNCAQ

1633946351 elnur hesenov

1 yaşlı övladını həkim səhvinə, etinadsızlığı və məsuliyyətsizliyinə görə itirən valideyn CƏZALANMA tələb edir.

araz.az  7NEWS.az -a istinadən xəbər verir ki, Ağstafa rayon Həsənsu kənd sakini Bayramlı Minar Sentyabr ayının 27-sində bir yaşlı ÖVLADINI və bu xəbərdən, həmçinin həkim məsuliyyətsizliyinə görə sarsılan, stress keçirən ATASINI elə həmin xəstəxanadaca itirib. Saytımıza açıqlamasında M.Bayramlı bu faciəyə səbəb olan həkimin cəzalanmasını istəyir: "Övladım Səyyad Bayramlının 17 Sentyabr tarixində cari həkim yoxlanışı nəticəsində ürək klapanında ciddi qüsur olduğu ortaya çıxdı. 1 il müddətində uşaqda qüsurla bağlı heç bir problem, göstərici olmadığı üçün bu müddət ərzində xəstəlikdən xəbərsiz olmuşuq. Elə bunu bildiyimiz günün sabahsı ayrı-ayrı 2 xəstəxanada yoxlanış və müayinələr etdirdik. Hər iki müayinə nəticəsində belə müəyyən edildi ki, əməliyyat olunmalıdır. Bir neçə özəl xəstəxanada çalışan həkimlərə üz tutduq, əməliyyat xərci imkan xaricində olduğu üçün hətta həkimlərin özləri bunu dövlət sığortası ilə etməyimizi tövsiyə etdilər. Rayon səhiyyə qurumuna müraciət etdik, onlar isə sığorta ilə ancaq Topçubaşov adına Elmi Cərrahiyə institutuna, şəxsən Elnur Həsənovagöndərə bilirik dedilər. Üz tutduq Topçuvaşov adına cərrahiyə istitutuna, Elnur Həsənovun qəbuluna. Açığı "həkimin” qəbuluna, sığortadan imtina etməsini xahiş etmək və özəl xəstəxanaya yönəltməkdə yardımçı olması üçün getmişdik, ancaq mövzunu izah etdikdə o, bizi inamverici sözləri ilə "başqa cərrahlar sizin övladınızı öldürəcək, onlar pula görə işləyənlərdir. Mən ayda 30-dan çox uşaq əməliyyatı edirəm və indiyə kimi heç bir mənfi nəticə olmayıb. Sizin uşağınızı isə 100% əmin edirəm sağ salamat sizə verəcəm.” deyərək bizi özünə inandırdı və biz əlavə heç bir həkimlə maraqlanmayaraq bu sözlər əsasında razılaşdıq. Yoxlanışdan sonra dərhal növbəti günü əməliyyat olmasını istədi. Halbuki digər klinikalarda ən azı bir həftə müalicə olduqdan sonra əməliyyata ala bilərik demişdilər. Bu "həkim” isə "Narahat olmayın, heç bir problem olmayacaq.” dedi. Əməliyyat öncəsi isə Elnur Həsənov "sığorta bu əməliyyatı qarşılamır, 5300 AZN ödəniş edəcəksiniz.” dedi. Əslində indi bildik ki, sığortadan da paralel olaraq bu əməliyyat üçün pul alınıb.

Övladımız Səyyad əməliyyat oldu. Əməliyyat uğurla keçdi deyən Elnur Həsənov gün yarım keçməmiş uşağı oksigendən ayırıb palataya göndərdi. Uşaq palataya gələndə həddindən artıq qızdırma içində olub və nəfəs almaqda çətinlik çəkib. Bunu görən anam təcili uşağı reanimasiyaya geri qaytarmağı tələb edib. "Məndən çox biləcəksiniz?!” deyən Elnur "həkim”, təkidi görərək uzun çəkişmə sonrasından uşağı reanimasiyaya qaytarmağa razı olub. Uşağı aparanda reanimasiyanın qarşısında övladımın gözlərinin yumulduğunu, qısa və gec-gec nəfəs aldığını görən yoldaşım "uşağa yardım edin!” desə də "Narahat olmayın, hər şey qaydasındadır.” deyərək onu rahatlaşdırmağa çalışıblar. Biz yəqin edirik ki, övladım elə həmin ərəfədə dünyasını dəyişib. Ancaq ölüm xəbərini təxminən 12 saat sonra, gecə saat 23:20 radələrində deyilib. Bu xəbəri eşidib təcili xəstəxanaya getdik orada nə həkim, nə də bu işdə məsul olan digər şəxslər yox idi. Nə qədər zəng etsək belə Elnur Həsənov telefonlara cavab vermədi və bizim bütün nömrələri blok etdi. Polis çağırdıq və polis belə zəng etdi ancaq nəticə eyni idi. Bir xəstədən məsul olan şəxs niyə belə bir şey etsinki? Məncə cavab bəllidir. Özünə cərrah adı verən Elnur Həsənov belə etinadsızlığını və məsuliyyətsizliyini ört-basdır etməklə kimə arxayındır? Həm sığortadan, həm xəstə yaxınlarından pul alan, dövlətin vətəndaşlara verdiyi imtiyazlardan öz şəxsi marağı üçün sui istifadə edən bu "biznesmen həkim”in insan həyatı üzərində qurduğu bu biznesə kim dəstək verir? Mən bir ata olaraq bu məsələni axıracan gedəcəyəm və növbəti balaları bunlar kimi cəlladlardan qorumaq üçün əlimdən gələni edəcəyəm. Qeyd edim ki, məsələ hal-hazırda prokuraturadadır və ekspertiza nəticələrini gözləməkdəyik. Ümid edirik, ekspertiza öz növbəsində doğru cavablar verəcək və həkim məsuliyyətsizliyi nəticəsində ölüm faktı aşkar olunacaqdır.

Bütün bu gərginliklər arasında mən həmin gün həkim məsuliyyətsizliyi nəticəsində növbəti ailə üzvümü də itirdim. Bu xəbərdən sarsılan atam Bayramov İbadət bütün bu məsələlərin gərginliyi arasında ağır infakt keçirdi. Xəstəxanadan ürək tutmasına görə nə qədər kömək istəsək belə səsimizə səs verən yarım saat sonra tapıldı. Bıyabırçılıq orasındadır ki, həmin xəstəxanaya təcili yardım çağırmalı olduq. Daha sonra yuxudan ayılan Topçubaşov xəstəxanasının növbətçi həkim kardioloqu gəldi, guya yoxladıqdan sonra "Xəstədə heçnə yoxdur, havaya çıxarıb gəzdirin dedi.” İnfakt olduğunu bilmədik ancaq hər ehtimala Republika xəstəxanasına maşın ilə apardıq ki, orada heç olmasa dəqiq yoxlanış olsun. Yoxlanış nəticəsində həkim bildirdi ki, çox ağır infakt keçirib. Və bu xəbərdən 10 dəqiqə sonra atamı da itirdik.

Bir gündə etinadsızlıq, vəzifələrini doğru yerinə yetirməyən həkimlər ucbatından ailəmin 2 üzvünü itirdim. Dövlətin qanunlarına qarşı addım atan, bu imtiyazlardan "öz cibi” üçün istifadə edən Elnur Həsənovla bağlı Səhiyyə nazirliyinə, 1-ci vitse prezident Mehriban xanıma və cənab Prezident İlham Əliyevə bu günlərdə müraciətimizi ünvanlayacağıq. Günahkarın yaxın zamanda cəzalanacağına ümid edirik və bütün valideynlərə bir valideyn olaraq belə həkimlərə özünüzü və ya yaxınlarınızı etibar etməmişdən öncə dərindən araşdırmağı tövsiyə edirik.”

7NEWS.az saytı olaraq mərhumların yaxınlarına səbr diləyirik. Müraciətlərinin nəticəsi olmağı üçün biz də əlimizdən gələni etməyə çalışacağıq. Ölkəmizdə bu kimi həkimlərin belə ölümə səbəb səhvlərinə son vermək üçün vətəndaş olaraq hər birimiz onları qınamalı və insan həyatı üzərində qurulan bizneslərini ifşa etməliyik.

7NEWS



araz.az xəbər portalı.

Azərbaycan və Ermənistan arasında "Qaragöl" mübahisəsi: Xəritələr və tərəflər nə deyir?

118791986befunkycollage5

Azərbaycan-Ermənistan sərhədində Qaragöl (Sevliç) ətrafında yaranan gərginlik beş aya yaxındır ki, davam edir.

Ermənistan Azərbaycan hərbçilərinin sərhədi pozduğunu, Azərbaycan isə torpaqları ''30 il işğal altında qaldıqdan sonra indi beynəlxalq səviyyədə tanınmış sərhədlərini bərpa etdiyini'' bildirir.

Ermənistan Baş naziri Nikol Paşinyan bəyan edib ki, Azərbaycan ordusu Ermənistan sərhədini keçərək Zəngəzur (Sünik) rayonundakı Qaragöl (Sevliç) ərazisi boyunca 3.5 kilometr irəliləyib.

Ermənistan indiyə kimi Qaragöl ərazisinin ona məxsus olduğunu bəyan edib, rəsmi Bakı ilə sülh danışıqlarına başlaması üçün irəli sürdüyü şərtlər arasında Azərbaycan hərbçilərinin bu əraziləri tərk etməsi tələbi də var.


Azərbaycan isə "heç kimin ərazisini pozmadığını" və "öz ərazilərində olduğunu" deyir.

Bəs, mübahisəli ərazi kimə məxsusdur və necə bölüşdürülməlidir?

Fərqli xəritələr

Ermənistan və Azərbaycanda səslənən iddialardan belə məlum olur ki, bu ərazinin kimə məxsus olması ilə bağlı istinad edilən xəritələr fərqlidir.

Lakin beş aya yaxındır davam edən gərginlik fonunda tərəflər hələ də sərhədləri cızmaq üçün istinad etdikləri xəritələri ictimaiyyətə açıqlamayıblar.

BBC News Azərbaycanca müxbirləri Azərbaycan və Ermənistan arxivlərində, bəzi elmi müəssisələrdə saxlanan xəritələri araşdırarkən SSRİ dövründə hazırlanmış və müxtəlif illərdə çap olunmuş, sərhədləri üst-üstə düşməyən xəritələr aşkar edib.

Ermənistan deyir ki, sovet xəritələrinə görə, Qaragölün yalnız 30 faizi Azərbaycan ərazisinə aid olmalıdır.

Sovet İttifaqı Silahlı Qüvvələri Baş Qərargahının 1942-ci ilə aid koordinatları olan və 1973 il tarixli xəritəsinə görə, Qaragöl gölünün böyük bir hissəsi Ermənistan ərazisinə düşür.


SSRİ Baş Kartoqrafiya və Geodeziya İdarəsi tərəfindən tərtib olunan, 1963-cü ilə aid "Azərbaycan SSRİ Atlası" kitabında göstərilən xəritədə də Qaragöl (Sevliç) Azərbaycan-Ermənistan sərhədində görünür. Həmin xəritədə tərəflərə düşən payı müəyyən etmək mümkün olmasa da, gölün iki ölkə tərəfindən paylaşıldığı görünür.

SSRİ Baş Kartoqrafiya və Geodeziya İdarəsi tərəfindən 1948-52-ci illərdə hazırlanmış və 1970-ci ildə yenilənmiş xəritədə Qaragöl (Sevliç) gölünün böyük hissəsinin Ermənistan, bir hissəsinin isə Azərbaycan ərazisinə düşdüyü görünür.

1992-ci ildə nəşr olunan Azərbaycan SSR-nın atlasında Qaragölün böyük hissəsi Azərbaycana düşür.

1939-cu ildə Ermənistan SSR Coğrafiya Cəmiyyətinin nəşriyyatı tərəfindən çap olunan Ermənistan SSR-nin xəritəsində isə gölün bütövlükdə Ermənistan ərazisinə düşdüyü göstərilir.

Azərbaycan Milli Elmlər Akademiyasının Coğrafiya İnstitutundan BBC News Azərbaycancaya onlarda 1938-39-cu illərə aid xəritələrin olmadığı deyilib.

"1970-ci illərin xəritələrinə əsaslanmaq lazımdır"

Azərbaycan Milli Elmlər Akademiyasının Coğrafiya İnstitutunun şöbə müdiri Mirnuh İsmayılov deyir ki, sərhədlərin müəyyənləşdirilməsi zamanı yeni yox, köhnə - SSRİ dövründə tərtib olunmuş xəritələrə əsaslanılmalıdır.

O söyləyir ki, SSRİ dövründə xəritələr hər respublikanın Ali Soveti tərəfindən təsdiq edildikdən sonra SSRİ Ali Soveti tərəfindən təsdiqlənirdi.

"1990-cı illərdə həm ermənilər, həm də biz müstəqillik əldə etdik. O dövrdən sonra həm onlar, həm də biz xəritə tərtib etdik və sərhədlərdə müəyyən deformasiyalar yarandı. Ona görə də 1990-cı illərdən sonra tərtib olunmuş xəritələrdən istifadə edilməsi doğru deyil. Bunlar mütləq nəzərə alınmalıdır".

O hesab edir ki, SSRİ dövründə Baş Kartoqrafiya və Geodeziya İdarəsinin 1970-ci illərdə tərtib etdiyi xəritələrə əsaslanmaq lazımdır.

"Qaragöl gölünün sərhədi, sahil xəttinin bir hissəsi bizdədir, bir hissəsi erməni tərəfdə. Hətta bu məsələdə o vaxt müəyyən problemlər var idi, Qaragöl qoruğu yaratdılar. Qoruq iki respublika arasında müştərək qoruq elan olundu. 1987-ci ildə hər iki ölkənin Ali Soveti bunu təsdiq etdi. Belə olan halda, gölün bir hissəsi bizim, bir hissəsi onlarındır. Ermənistan Ali Sovetinin arxivindəki sənədlərə baxsınlar".

Azərbaycanın Ekologiya Nazirliyinin saytında deyilir ki, Qaragöl və onun ətraf ərazisi "tarixən Azərbaycan torpağı olmuş və 30 ilə yaxın davam edən işğal prosesindən sonra hazırda tamamilə işğaldan azad edilmişdir".

Həmin məqalədə İşıqlı Qaragölün (Azərbaycanda Qaragöl daha çox "İşıqlı Qaragöl" adlandırılır) "Azərbaycanın Laçın rayonu ilə Ermənistanın Gorus rayonu sərhədində" yerləşdiyi və "sərhəd gölü" hesab edildiyi qeyd olunur.

Bundan başqa, məqalədə 1987-ci ildə Azərbaycan və Ermənistanın sovet respublikalarının direktiv orqanlarının qərarı ilə yaradılmış Qaragöl Dövlət Təbiət Qoruğunun "respublikalararası dövlət qoruğu" elan edildiyi vurğulanır.

Azərbaycan Prezidentinin İşlər İdarəsinin Siyasi Sənədlər Arxivi BBC News Azərbaycancanın "Qaragöl" qoruğunun ərazi bölgüsünü müəyyən edən sənədləri araşdırmaq barədə sorğusuna cavab olaraq bildirib ki, 1981-1991-ci illərə aid sənədlərə 2029-cu ilədək "məxfilik məhdudiyyəti qoyulub".

"Sovet dövründən əvvəl "qəti sərhəd olmayıb"

Ermənistan Milli Aqrar Universitetinin dosenti, tarix elmləri namizədi Hamo Sukiasyana görə, sərhəd problemi Azərbaycan, Ermənistan və Rusiya nümayəndələrinin iştirakı ilə həll olunmalıdır.

"Hər iki tərəf üçün məqbul olan əsas kimi Sovet İttifaqı dövrünün son xəritələrində təsvir olunan vəziyyət qəbul olunmalıdır. Həmin xəritələrə görə, gölün üçdə ikisi Ermənistan, üçdə biri Azərbaycan ərazisinə düşür.

Məsələnin siyasi tərəfinə qarışmaq istəmirəm, lakin hazırda sərhəd pozulub - Azərbaycan əsgərləri, bilməzdənmi, bilərəkdənmi, Sovet inzibati ərazi bölgüsünə görə, sərhəd xəttini keçib öz ərazilərindən xeyli irəliyə gəliblər".

Hamo Sukiasyan deyib ki, sovet dövründən əvvəl "qəti sərhəd" olmayıb:

"Rusiya çar hakimiyyəti dövründə ərazi Yelizavetpol quberniyasının bir hissəsi olan Zəngəzur mahalına daxil olub. Və bu, etnoqrafik inzibati vahid deyildi, çar Rusiyasının bir hissəsi idi. Zəngəzurda təxminən bərabər sayda ermənilər və müsəlmanlar yaşayırdı".

Hamo Sukiasyan əlavə edib ki, 1920-ci illərdə Zəngəzur mahalında Sovet Azərbaycanı və Sovet Ermənistanı arasında sərhəd xətti təsdiqlənəndə, Qaragölün ya bütövlüklə, ya da böyük hissəsinin Ermənistan ərazisində yerləşdiyi görünür.

"Məsələn, 1930-cı illərin xəritələrində, o cümlədən Moskvada - Daxili İşlər Xalq Komissarlığı tərəfindən çap olunmuş bu xəritədə - görürük ki, Sevliç (Qaragöl) bütövlüklə Sovet Ermənistanı sərhədi daxilindədir.

Sonrakı illərin sovet xəritələrində görürük ki, gölün böyük hissəsi - təxminən üçdə ikisi Sovet Ermənistanı, təxminən üçdə biri - Azərbaycanın sərhədindədir. Bu, onunla şərtləşdirilir ki, hər iki tərəfin, heyvandarlığın inkişafı üçün, xüsusilə, qoyun sürülərini dağ otlaqlarına çıxaranda suya ehtiyacı vardı",- tarixçi BBC News Azərbaycancaya bildirib.

O hesab edir ki, müstəqil dövlət olaraq, Ermənistan və Azərbaycan gec-tez sərhəd xəttini çəkməlidir.

Hamo Sukiasyanın fikrincə, iki ölkə arasında münasibətlər nə qədər stabil olarsa, sərhədlərin dəqiqləşməsi bir o qədər asan baş tutar: "Lakin indiki kimi münaqişə vəziyyətində sərhədlərin demarkasiyası məsələsinin öz həllini tapması çox çətindir".

Nikol Paşinyan: "Azərbaycan razılaşmamıza əməl etsə və barəsində danışdığımız şərtləri yerinə yetirsə, bəli, mən o sənədi imzalayaram"

Sergey Lavrov Ermənistan-Azərbaycan sərhədindəki gərginliklə bağlı: "Oturdular, sakitcə bu vəziyyəti necə həll etmək barədə danışıqlara başladılar"

"Moskva hamıdan yaxşı bilir"

Azərbaycan parlamentinin Müdafiə, təhlükəsizlik və korrupsiya ilə mübarizə komitəsinin və hakim YAP üzvü Elman Məmmədov BBC News Azərbaycancaya deyib ki, müstəqillik əldə edənədək SSRİ tərkibində olan respublikalar arasındakı sərhədlər SSRİ müəyyən edib.

O, iki ölkə arasında sərhədlərin müəyyənləşdirilməsi işinin sonuncu dəfə 1977-ci ildə aparılmasına diqqət çəkib.

Cənab Məmmədov vurğulayıb ki, Azərbaycan-Ermənistan arasındakı sərhədlərə dair xəritə və sənədlər Azərbaycan və Ermənistandan başqa Rusiyada, BMT və digər müvafiq qurumlarda mövcuddur.

"Maraqlı orasındadır ki, o sənədlərin arxivi bu gün vasitəçilik missiyasını boynuna götürən, eyni zamanda ATƏT-in Minsk qrupunun üzvü olan Rusiyanın paytaxtındadır və indi kim kimin ərazisinə müdaxilə edir, kim kimə qarşı ərazi iddiası qaldıra bilər, bunu Moskva hamıdan yaxşı bilir".

Millət vəkili söyləyib ki, Azərbaycan "heç bir dövlətin, o cümlədən Ermənistanın ərazisinə daxil olmayıb" və hazırda sovet dönəmindən Azərbaycan SSR-ə aid əraziləri xəritə və sənədlər üzrə bərpa edir.

Rusiya Azərbaycanla Ermənistan arasında demarkasiyaya kömək etməyə hazırdır, Rusiyanın xarici işlər naziri Sergey Lavrov bir müddət əvvəl deyib. O bildirib ki, indiyə kimi "heç kəs heç vaxt bununla məşğul olmayıb" və onlar tərəflərə təklif edirlər ki, bu işə başlasınlar: "Biz onlara bu işdə kömək etməyə, kartoqrafiya materialları və konsultasiya xidmətləri təqdim etməyə hazırıq," - Lavrov əlavə edib.

Amma rusiyalı nazir tərəflərə hansı illərə aid xəritə təqdim edilə biləcəyini açıqlamayıb.

"Mübahisəli ərazilər"

Azərbaycan və Ermənistan arasında mübahisə predmeti təkcə Qaragöl ərazisi deyil.

Azərbaycan Milli Elmlər Akademiyasının Coğrafiya İnstitutunun şöbə müdiri Mirnuh İsmayılov deyir ki, Azərbaycan-Ermənistan arasında Qazax, Şurnux və Naxçıvan istiqamətində "mübahisəli ərazilər var".

Onun sözlərinə görə, bu məsələlərdən bəziləri həllini tapsa da, digərləri hələ də qalmaqdadır:

"Naxçıvan ərazisində bizim Ermənistan ərazisinə düşən kəndimiz var idi, Kərki kəndi, ordan bizimkilər qaçqın düşmüşdülər. Qazax ərazisində müəyyən yerlər var ki, onlar kiminsə istəyilə Ermənistana verilib. Bu ərazilərin qanuni verilib-verilmədiyi yoxlanılmalıdır. Bundan başqa, Qazax tərəfdə kəndlər anklav kimi Ermənistan ərazisində yerləşir.

Məsələn, Aşağı Əskipara Ermənistan ərazisindədir. Biz ora getmək üçün Ermənistan ərazisindən istifadə etməliyik. Bu kəndlər bərpa olunmalı, bizə verilməlidir".

Mirnuh İsmayılov deyir ki, 1969-ci ildə tərtib olunmuş, SSRİ Nazirlər Sovetinin nəzdində olan Geodeziya və Kartoqrafiya Baş İdarəsinin 1968-ci ildə çap etdiyi Ermənistan SSR-in fiziki xəritəsinə əsasən, Şurnuxdan keçən yol Azərbaycan ərazisinə girir, sonra Ermənistana gedir. "Bizim sərhədçilərimiz yolun bizim əraziyə giriş və çıxış hissəsində durur. Hətta işğal dövründə bu kənd böyüyüb gəlib yolun o biri tərəfinə. Yəni, bilməyiblər, bələdiyyədən alınan sənədlə öz ərazilərini lazımsız yerə böyüdüblər, bizim ərazilərimizdən otlaq kimi istifadə ediblər".

BBC

NATO-nun baş sındırdığı məsələni Azərbaycan necə həll etdi- SENSASİON DETAL

media c300 1633938716 v3uaj8s9zhyg47efi65c 620x326
 
Hazırda Vətən Müharibəsinin təcrübəsi bir çox inkişaf etmiş ölkələrin orduları tərəfindən öyrənilir. HATO və KTMT də istisna deyil. NATO daha geniş imkanlara və döyüş təcrübəsinə malik olsa da, son 20 il ərzində rəqibi KTMT-nin HHM sisteminin yarılması onun üçün həll olunmayan məsələlər sırasında prioritet vəzifə olaraq qalmaqdadır.
 
araz.az  Azvision.az-a istinadən bildirir ki, KTMT-ni öz təhlükəsizliyini təmin edə bilməyən, müasir ordu yaratmağa nail olmayan və buna görə də Rusiyanın orbitində toplaşmağa məcbur qalan dövlətlərin klubu da adlandıra bilərik. Bu çarəsiz ölkələrin siyahısına uzun illərdir ki, Ermənistan başçılıq edir. KTMT Rusiyanın NATO-nun Şərqə doğru genişlənmısini mümkün qədər əngəlləmək məqsədilə yaradılan hərbi təşkilatdır. Odur ki, KTMT-də söz sahibi olan Rusiya hansısa üzv ölkənin təhlükəsizliyinin təmin edilməsi vəzifəsini prioritet hesab etmir. Üzv dövlətlər isə daha çox Rusiyanın özündən qorunmaq və Kremlin imkanlarından yararlanmaqla təhlükəsizliklərini təmin etmək məqsədilə bu bloka daxil olublar.

Blokun genişlənməsi Rusiya büdcəsinə müəyyən qədər ziyan vursa da, Kremlin hərbi-siyasi maraqlarına cavab verir. Rusiya hazırda Özbəkistanın yenidən KTMT-yə daxil edilməsi üçün çox çalışır, amma bunun nəticə verəcəyi real görünmür. Çünki rəsmi Daşkənd son illərdə hərbi sahədə Türkiyə və Pakistanla əməkdaşlığa üstünlük verir. Özbəkistan hazırda Ermənistan ordusunun Azərbaycan tərəfindən darmadağın edilməsi fonunda KTMT-nin hərbi blok kimi əhəmiyyətsiz olduğunu da yaxşı anlayır. Başqa sözlə desək, Rusiyanın KTMT-ni genişləndirmək səyləri nəticə vermir. Vətən Müharibəsinin nəticələri isə həm KTMT sıralarında seyrəlməyə, həm də NATO-nun Azərbaycana marağının daha da artmasına gətirib çıxara bilər. İddianın birinci hissəsini izah etmək üçün 6 il əvvələ qayıtmalıyıq.


Ermənistan 2015-ci ilin dekabrında Rusiya ilə “Hava Hücumundan Vahid Müdafiə Sistemi”nin yaradılması haqqında saziş imzalamaqla özünün işğal siyasətini zəmanət altına aldığını düşünürdü. İrəvan bu razılaşma çərçivəsində Rusiya ilə hava hücumundan müdafiə və hava məkanına nəzarət sistemlərinin vahid idarəetmə altında fəaliyyətini və real vaxt rejimində məlumat mübadiləsi aparılmasını nəzərdə tuturdu. KTMT-nin Qafqaz bölgəsində vahid regional hava hücumundan müdafiə sisteminin yaradılması haqqında sazişin bir hissəsi olaraq, Rusiya Ermənistanı müasir rabitə və avtomatlaşdırılmış idarəetmə sistemlərilə təchiz etməyi də öhdəsinə götürmüşdü. Ermənistanın hava hücumundan müdafiə sistemini gücləndirməli olan əlavə zenit-raket qurğularının İrəvana pulsuz ötürülməsi də təmin edilirdi. Amma sadalananların heç biri Ermənistanı başına endiriləcək “Dəmir Yumruq”dan xilas etmədi.
Baş verən hadisələrin fonunda KTMT üzvü olan bəzi ölkələrin, əsasən Orta Asiya ölkələrinin və Ermənistanın bu təşkilatda üzvlüklərini davam etdirmələri üçün heç bir tutarlı əsasları qalmır. Özbəkistanın atdığı addımlar və KTMT-yə təkrar qoşulmaq təklifinə rədd cavabı verməsi də iddiamızı qismən tamamlayır.


İddianın “NATO-nun Azərbaycana marağı daha da arta bilər” hissəsini izah etmək üçün isə cəmi 1 il əvvələ qayıtmalıyıq. 44 günlük döyüş əməliyyatlarının ilk günlərindən Ermənistan ordusunun Qarabağ ərazisində yerləşdirilən və Qarabağa yaxınlaşmağa cəhd edən bütün HHM sistemləri, o cümlədən, “S-300” hava hücumundan müdafiə komplekslərinin Xankəndidən şimalda yerləşən mövqe rayonları Azərbaycan ordusunun intensiv atəş zərbələri altına düşdü. Azərbaycan Silahlı Qüvvələrinin kamikadze və zərbə PUA-ları əməliyyatların ilk həftəsi ərazində Ermənistanın HHM sistemini darmadağın etdilər. “S-300” kompleksinin atıcı qurğusuna və digər müasir sistemlərə endirilən “Harop” zərbələri mütəxəssislər tərəfindən Ermənistanın HHM sistemi üçün “Sonun başlanğıcı” kimi dəyərləndirildi. Hər gün düşmənə məxsus həm HHM, həm də REM vasitələrinin kütləvi şəkildə zərərsizləşdirilməsi Azərbaycanın Həqbi Hava Qüvvələrinə və Dövlət Sərhəd Xidmətinə məxsus pilotlu/pilotsuz vasitələrinin havada mütləq üstünlük əldə etməsi ilə nəticələndi.

NATO-nun formal olaraq KTMT, faktik olaraq Rusiya tərəfindən yaradılan “Vahid Hava Hücumundan Müdafiə Sistemi”ni yarmaq üçün 20 il baş sındırdığı bir problemin həllini Azərbaycan Ordusu 44 günlük Müharibədəki praktiki fəaliyyətləri ilə nümayiş etdirdi. Buna aid çoxlu vizual görüntülər də mövcuddur.


KTMT blokunun HHM sisteminin zəif nöqtələrini tapmaq üçün NATO-nun hər il külli miqdarda vəsait xərclədiyi kimsəyə sirr deyil. KTMT-nin HHM sistemini yarmaq isə NATO-nun daimi prioritet vəzifəsidir. Azərbaycanın pilotlu və pilotsuz aviasiyanı qarşılıqlı əlaqədə tətbiq etməklə KTMT-nin “Vahid Hava Hücumundan Müdafiə Sistemi”ni Vətən Müharibəsinin ilk həftəsi ərzində darmadağın etməsi Qərb mütəxəssisləri üçün hələ də müəmma olaraq qalır. Odur ki, hazırda NATO Azərbaycan təcrübəsini öyrənmək imkanı əldə etməyə çalışır. Blok Azərbaycan tərəfinin digər sahələrdəki döyüş təcrübəsi ilə də yaxından maraqlanır. Alyansın ali hərbi nümayəndələrinin oktyabrın 4-dən 8-nə qədər Tiflisdə Azərbaycan, Türkiyə və Gürcüstan hərbi qulluqçularının iştirakı ilə keçirilən “Eternity-2021” komanda-qərargah təlimlərini onlayn formatda izləmələri də NATO-nun regiona, xüsusilə də KTMT-yə “ustad dərsi” verən Azərbaycana marağının artması ilə izah olunur.

 

araz.az xəbər portalı.

AZƏRBAYCAN MƏTBUAT ŞURASINDA MEDİA VƏ SİYASƏT MÖVZUSUNDA TƏDBİR KEÇİRİLƏCƏK

metbuat surasi

Bu gün Azərbaycan Mətbuat Şurasında «Media və siyasi proseslərə baxış: peşə etikası və mövcud reallıqlar» mövzusunda tədbir keçiriləcək.

araz.az bildirir ki, tədbirdə qəzet və sayt rəhbərləri, siyasi analitiklər, siyasi proseslərdən yazan peşəkar jurnalistlər iştirak edəcək.

Qeyd edək ki, 44 günlük Zəfər müharibəsindən sonra bölgədə həm də yeni siyasi reallıqlar yaranmışdır. Odur ki, jurnalistlər bu reallığı elə işıqlandırmalıdır ki, Azərbaycan və dünya ictimaiyyəti bölgədə cərəyan edən proseslər barədə dolğun informasiya ala bilsin.

 

araz.az xəbər portalı.

Ombudsman Ermənistanın Gəncəni ikinci dəfə atəşə tutmasının ildönümü ilə bağlı bəyanat yaydı

sebine

Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva Ermənistan silahlı qüvvələrinin Azərbaycanın Gəncə şəhərini ikinci dəfə ağır artilleriya qurğularından atəşə tutması nəticəsində insan tələfatı və dağıntıların baş verməsinin ildönümü ilə bağlı bəyanat verib.

araz.az-ın xəbərinə görə, bəyanatda deyilir: “11 oktyabr 2020-ci il tarixində gecə saat 02 radələrində Ermənistan silahlı qüvvələri ikinci dəfə Azərbaycanın hərbi əməliyyatların aparıldığı bölgədən uzaqda yerləşən Gəncə şəhərinin mərkəzi hissəsində yerləşən çoxmənzilli yaşayış binalarını qadağan edilmiş, hədəfi seçə bilməyən silahlardan hesab edilən “Scud-B” ballistik raket sistemindən istifadə edərək Ermənistan ərazisindən atəşə tutub. Nəticədə uşaq, qadın, ahıllar da daxil olmaqla, onlarla insan həlak olub və yaralanıb, çoxsaylı mülki infrastruktur obyektlərinə ciddi ziyan dəyib.

Ermənistan məqsədli şəkildə mülki əhalini hədəf seçməklə beynəlxalq humanitar hüquq normalarını, xüsusilə də IV Cenevrə Konvensiyasının, “Silahlı münaqişə zamanı mədəni sərvətlərin mühafizəsi haqqında” Haaqa Konvensiyasının müddəalarını, eyni zamanda 2020-ci il 10 oktyabr tarixində elan edilmiş humanitar atəşkəs rejimini kobud şəkildə pozub.

Ombudsman olaraq, Gəncə şəhərinin mülki obyektlərinin Ermənistan silahlı qüvvələri tərəfindən mütəmadi olaraq atəşə məruz qalması, çoxsaylı insan tələfatı, insan hüquq və azadlıqlarının kütləvi şəkildə pozulması faktları ilə bağlı dərhal nüfuzlu beynəlxalq təşkilatlara və dünya ictimaiyyətinə müraciət ünvanlanmışam.

Eyni zamanda, tərəfimdən Gəncə şəhərində növbəti faktaraşdırıcı missiya həyata keçirilib, Ermənistanın növbəti hərbi hücumu zamanı həlak olmuş, yaralanmış, dağıntılardan zərər çəkmiş şəxslərin pozulmuş hüquqlarına dair faktlar yerində araşdırılıb və müvafiq hesabat beynəlxalq təşkilatlara təqdim edilib”.

Bəyanatda vurğulanır ki, beynəlxalq təşkilatlara ünvanlanan etiraz bəyanatlarında və faktaraşdırıcı missiya hesabatlarında təkzibolunmaz sübutlar əks olunub: “Buna baxmayaraq, hərbi əməliyyatlar zamanı törədilmiş bu kimi insan hüquq və azadlıqlarının kütləvi şəkildə pozulması faktlarına hələ də beynəlxalq hüquqi qiymət verilməyib.

Gəncə şəhərinin ikinci dəfə ağır artilleriya qurğularından atəşə tutulması nəticəsində insan tələfatı və dağıntıların baş verməsinin birinci ildönümü ilə əlaqədar bir daha beynəlxalq ictimaiyyətə səslənir, beynəlxalq humanitar hüquququn norma və prinsiplərinin Ermənistan tərəfindən kobud şəkildə pozulması faktlarına beynəlxalq hüquqi qiymətin verilməsinə və bu cinayət əməllərinə görə məsuliyyət daşıyan Ermənistan hərbi-siyasi rəhbərliyinə qarşı müvafiq cəza tədbirlərinin görülməsinə çağırıram”.

Bəyanat BMT-nin Baş Katibinə, BMT-nin Təhlükəsizlik Şurasına, BMT-nin İnsan Hüquqları üzrə Ali Komissarına, BMT-nin Qaçqınlar üzrə Ali Komissarına, BMT-nin İnsan Hüquqları Şurasına, YUNİSEF-in, YUNESKO-nun, Avropa İttifaqının, Avropa Şurasının, ATƏT-in rəhbərlərinə, Beynəlxalq və Avropa Ombudsmanlar İnstitutlarına, Asiya Ombudsmanlar Assosiasiyasına, İslam Əməkdaşlıq Təşkilatına və bu quruma üzv dövlətlərin Ombudsmanlar Assosiasiyasına, İslam Əməkdaşlıq Təşkilatının Müstəqil Daimi İnsan Hüquqları Komissiyasına, Avropa Uşaq Hüquqları Ombudsmanları Şəbəkəsinə, Beynəlxalq Sülh Bürosuna, müxtəlif ölkələrin ombudsmanlarına və milli insan hüquqları institutlarına, Azərbaycan Respublikasının xarici ölkələrdəki və xarici ölkələrin respublikamızdakı səfirliklərinə, Azərbaycanın diaspor təşkilatlarına göndərilib.

 

araz.az xəbər portalı.

17 -dən səhifə 1861

Əlaqəli xəbərlər