"Tərbiyə almayan məmurlar..." - Jurnalistə hücum məsələsi böyüyür - Açıqlama

2021 12 02 15 02 554o4HcqsCOcKSzXMjGgBj fileDövlət Sərhəd xidmətinin zabiti, mayor Rövşən Cahangirovun xidməti vəzifəsini yerinə yetirən, hərbi helikopter qəzası zamanı həlak olmuş hərbçilərlə vida mərasimində çəkiliş aparmaq istəyən “Baku TV”nin əməkdaşlarına qarşı fiziki təzyiq göstərməsi ciddi tənqidlə qarşılanıb.
 
araz.az  Bakupost-a istinadən bildirir ki,Azərbaycan Mətbuat Şurasının yaydığı məlumatda qeyd olunur ki, bu hərəkət yolverilməzdir, jurnalistlərin sərbəst fəaliyyətinə maneçilik cəhdidir.
 
 
Məsələnin qanuni tərəfinə keçək ...
 
Azərbaycan Respublikasının Kütləvi informasiya vasitələri haqqında qanununda qeyd olunur ki, Azərbaycan Respublikasında kütləvi informasiya azaddır. Kütləvi informasiya azadlığı vətəndaşların qanuni yolla informasiya axtarmaq, əldə etmək, hazırlamaq, ötürmək, istehsal etmək və yaymaq hüququna dövlət tərəfindən təminat verilməsinə əsaslanır.
Qanunda da qeyd olunur ki, məlumat toplamaq hüququ dövlətimiz tərəfindən təminat altındadır. Yəni jurnalistin fəaliyyətinə mane olmaq cəhdləri qanunla da qadağan edilir.
"Məmurların heç də hamısı yaxşı tərbiyə almayıb..."
Məsələ ilə bağlı əməkdar jurnalist, teletənqidçi, professor Qulu Məhərrəmli Bakupost.az -a açıqlamasında bildirib ki, məmurların heç də hamısı yaxşı tərbiyə almayıb və onlar jurnalistlərdən xoşlanmayan təbəqədirlər:
“Bu, birinci dəfə baş verən hadisə deyil, çox güman ki, axırıncı hadisə də olmayacaq. Mənə elə gəlir ki, bu məmurlar, dövlət qulluqçuları, vəzifə tutan adamlar jurnalistlərin suallarına, davranışlarına qarşı maksimum dözümlü olmalıdırlar. Çünki jurnalistin əsas məqsədi məlumat almaq və onu yaymaqdır. Jurnalist ora öz şəxsi mənafeyi üçün ora getməyib, yəni, ictimaiyyəti məlumatlandırmaq üçün oradadır. Digər tərəfdən, öz həmkarlarıma qarşı olan təzyiqi pisləyirəm və bu cür davranışlar yolverilməzdir.
Bunu izah etmək lazımdır ki, qanunlar “jurnalistə öz fəaliyyətini icra etmək üçün şərait yaradılmalıdır” deyir. Eyni zamanda qeyd edim ki, həmkarlarımın məmurların qəzəbinə tuş gəlməmək üçün ehtiyat variantları olmalıdır. Anlamaq lazımdır ki, məmurların heç də hamısı yaxşı tərbiyə almayıb və jurnalistlərdən xoşlanmayan təbəqədirlər. Həmçinin nəzərə almaq lazımdır ki, bunların heç biri ictimai nəzarəti qəbul etmək istəməyənlərdir. Onların çoxu burda mənəm, Bağdadda kor xəlifə prinsipi ilə yaşayan insanlardır. Ona görə də jurnalistlər də bu detalları nəzərə alsalar, hər halda öz təhlükəsizliklərini qorumuş olarlar”.
 
"Jurnalistin informasiya almaq azadlığını təmin etmək hamının borcudur..."
Millət vəkili Fazil Mustafa da jurnalistlərə qarşı məmurların şiddət və aqressiv davranışlarının doğru olmadığını və jurnalistlərin informasiya almaq azadlığını təmin edilməli olduğunu qeyd edib:
 
“Jurnalistin informasiya almaq azadlığını təmin etmək hamının borcudur. Necə ki, informasiya almaq üçün siz jurnalist mənə zəng edirsiz və mən də müəyyən vaxtımı ayırıb sizin informasiya almaq azadlığınızı, peşə fəaliyyətinizi nəzərə alaraq cavab verməyi özümə borc hesab edirəm, bütün məmurlar da buna bir borc kimi baxmalıdırlar. Çünki hansısa bir statusa sahibsənsə orada mütləq müəyyən informasiyalar verməlisən. Təbii ki, bu hadisəni bütövlükdə həmin qurumun üzərinə yönəltmək doğru deyil. Çünki helikopter qəzasında 14 hərbçimiz şəhid olub, 2 hərbçimiz yaralanıb, vəziyyət olduqca kritikdir, hamı çaşqınlıq və kədər içindədir. Bu vəziyyətdə belə bir hadisənin olması xoşagələn deyil. Amma jurnalistlər tərəfindən də emosional vəziyyəti də nəzərə almaq məncə, yaxşı olar. Əgər sakit bir situasiyada və yaxud bir tədbirdə müsahibə almaq istəyən jurnalistə qarşı belə bir hadisə baş verirsə, buna daha fərqli yanaşmaq lazım olardı. Amma dünənki hadisə elədir ki, hamının ağır bir situasiyada olduğu bir vaxtdır. Təbii ki, jurnalistlər də həmin hissləri keçirir. Amma arada məsuliyyət fərqi var. Qurumun rəhbərinin məsuliyyəti ilə jurnalistin məsuliyyəti bu məsələdə eyni deyil. Əlbəttə, heç kimə jurnalistə qarşı kobudluq etməyə haqq vermir. Keçmiş jurnalist həmkarı ilə bağlı bu münasibətlərdə bir qədər yumuşaldıcı addımlar atılmalı idi. Yəni, üzrxahlıqla məsələni həll etmək olar. Çünki hadisəni situasiyaya görə qiymətləndirirəm və heç kimi xüsusi ittiham etmək istəmirəm. Amma yenə də jurnalistin peşə fəaliyyətinə mane olunmalı və kobudluq göstərilməli deyildi. Hər halda heç nə buna bəraət qazandırmağa imkan vermir. Bütün hallarda jurnalistlərə mane olmaq əslində özlərinin obyektiv mövqeyinin işıqlandırılmasına mane olmaqdır. Ona görə də jurnalistə hörmət qoymaq lazımdır. Jurnalistlər Azərbaycanın dəyərli kateqoriyadan olan insanlardır. Çünki doğru xəbərə hamının ehtiyacı var”.
"Əgər məmurun fəaliyyəti şəffaf, rüşvət və korrupsiyadan uzaq , mətbuatı, cəmiyyəti maraqlandıran suallara cavab vermiş olsa, heç vaxt güzgünü sındırmaz..."
Tanınmış jurnalist Seymur Verdizadə məmurların jurnalist həmkarlarına qarşı göstərdiyi aqressiyanı şiddətlə qınayıb:
“Mətbuat zamanın güzgüsüdür və hər kəsi olduğu kimi göstərir. Məmurlar necədirsə, biz də onları olduğu kimi göstəririk. Görünür, məmurların xislətində, xarakterində, fəaliyyətində eybəcər hallar çoxdur. Onlar güzgüdə eybəcər görünürlər, ona görə də güzgünü sındırmaqla məşğuldurlar. Jurnalist onların əməlinə güzgü tutur, məmurlar isə onların əməllərini, yarıtmaz fəaliyyətini o güzgüdə öz əskini tapmasını istəmirlər. Məhz ona görə mətbuata qarşı xüsusi aqressiya nümayiş elətdirirlər. Əgər məmurun fəaliyyəti şəffaf olsa, rüşvət və korrupsiyadan uzaq olsa, mətbuatı, cəmiyyəti maraqlandıran suallara cavab vermiş olsa, heç vaxt güzgünü sındırmaz. Asanlıqla o güzgünün qabağına çıxar və öz halına, görünüşünə baxa bilər. Amma məmur bilir ki, güzgünün qabağına çıxanda orada bədheybət və eybəcər bir məxluq görünəcək. Təbii ki, bunu hamıya aid etmirəm amma əksəriyyəti belədir. Ona görə güzgünün qarşısına çıxmaq istəmir və onun qarşısına güzgü tutan jurnalisti də vurmaq, döymək istəyir. Mətbuatla, jurnalistlərlə bu cür rəftarı şiddətlə qınayıram. Mətbuat xidmətinin rəhbəri cəmiyyəti məlumatlandırmaqdan ibarətdir. Mətbuat xidmətinin rəhbəri nazirliyin, komitə sədrinin, xidmət rəisinin mühafizəçisi deyil. Mətbuat xidmətinin rəhbəri öz vəzifəsini yerinə yetirə bilmədiyinə görə onun vəzifəsinə aid olmayan işlərlə məşğul olur. Hesab edirəm ki, məmurlar həm öz fəaliyyətində redaktələr etməli, həm də mətbuatla bağlı işə götürdükləri kadrları seçərkən diqqətli olmalıdırlar. Mətbuat xidməti nazirlərin, komitə sədrlərinin qohumları, dostları, baldızının uşaqları, qaynının qızları üçün vakant yer deyil. Təəssüflər olsun ki, mətbuat xidmətlərinə tanışlıq, şəxsi münasibət hesabına insanlar işə götürülürlər. Mətbuata qarşı bütün təzyiqləri qınayıram və məmurları mətbuatla normal əməkdaşlığa dəvət edirəm”.
araz.az xəbər portalı.

Tofiq Yaqublu ilə bağlı DİN-ə müraciət olundu

tofiq22Daxili İşlər Nazirliyi yanında İctimai Şura Bakı şəhərində “Fəvvarələr” meydanında keçirilən aksiyada saxlanılan şəxslərə qarşı baş verənlərlə bağlı Nazirliyə müraciət edib.

Müraciətin mətnini Əliməmməd Nuriyev yayıb:

“Dekabrın 1-də Bakı şəhərində Fəvvarələr meydanı ərazisində müvafiq qaydada razılaşdırılmayan aksiyanın keçirilməsinə cəhdin qarşısının alınması zamanı bir qrup şəxsin saxlanılması ilə bağlı rəsmi məlumat yayılıb. Saxlanılan şəxslər arasında xəsarət alanların olması ilə bağlı gün ərzində sosial şəbəkələrdə foto və video materiallar yayılıb. Saxlanılan şəxslər arasında olan Tofiq Yaqublunun KİV-də yayılan görüntülərindən onun fiziki təzyiqə məruz qalması aşkar görünür.

Daxili İşlər Nazirliyi yanında İctimai Şura hesab edir ki, polis razılaşdırılmayan aksiyalar zamanı ictimai qaydanı qoruması və ictimai təhlükəsizliyi təmin edilməsi vəzifəsini yerinə yetirərkən insan hüquq və azadlıqlarının qorunması üçün zəruri tədbirlər görməlidir.

Azərbaycanın beynəlxalq aləmdə mövqelərinin möhkəmləndiyi indiki zamanda Tofiq Yaqubluya qarşı zor tətbiq edilməsi ölkəmizin nüfuzunu salınmasına hesablanmış davranış da ola bilər.

Daxili İşlər Nazirliyi yanında İctimai Şura baş verənlərin obyektiv və hərtərəfli araşdırılmasına, araşdırmanın nəticəsi ilə bağlı ictimaiyyətə geniş məlumat verilməsinə, günahkarların müəyyən edilərək cəzalandırılmasına çağırır”.

araz.az xəbər portalı.

Qadınların güzəştli şərtlərlə pensiya hüququ

Ruxsare Mammadova

                                                                           Rüxsarə MƏMMƏDOVA.

Azərbaycan Respublikasının qanunvericiliyində qadınlara aid bir sıra hüquqlar təsbit edilib.

araz.az  Benefisiar Hüquqi Yardım Mərkəzinə istinadən bildirir ki,  bunlardan biri də “qadınların güzəştli şərtlərlə pensiya hüququ” məsələsidir. Əmək pensiyasının təyin olunmasının ümumi qaydasında fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verdikdə sığorta stajından asılı olmayaraq, bu pensiya təminatına imkan vermədikdə isə azı 25 il sığorta stajı olduqda yaşa görə əmək pensiyası hüququ vardır. Pensiya təminatı ilə bağlı yaş həddi 62 il 6 aydır. Yəni şəxsin əmək pensiyası hüququ qazanması üçün ya 28 800 pensiya kapitalı, ya da azı 25 il sığorta stajı olmalıdır.

Əmək pensiyasının minimum məbləği hazırda 200 manatdır. Bu məbləğ hər il dəyişə bilər.

Pensiya kapitalı dedikdə müvafiq olaraq fərdi hesabın sığorta hissəsində qeydə alınan və fərdi hesabın yığım hissəsində toplanan vəsaitlərin məbləğidir.

Fərdi hesabın sığorta hissəsi dedikdə isə əmək pensiyasının sığorta hissəsinin hesablanması üçün nəzərə alınan, sığortaolunanlar üzrə ödənilmiş məcburi dövlət sosial sığorta haqlarının 90 faizinin və xüsusi hesabdakı vəsaitin qeydə alındığı subhesabdır.

Qeyd etdiyimiz ümumi qayda  ilə yanaşı qadınlar üçün pensiyanın təyin olunmasında müəyyən güzəştlər də vardır.

Güzəştli şərtlərlə pensiya hüququ kimlərə şamil edilir?

Çoxuşaqlı qadınlara münasibətdə

Belə ki, 5 və daha çox uşaq doğub onları 8 yaşınadək tərbiyə etmiş qadınların yaş həddi hər uşağa görə 1 il azaldılmaqla yaşa görə əmək pensiyası hüququ vardır.

Sağlamlıq imkanları məhdud şəxsə qulluq edən qadınlara münasibətdə 

Sağlamlıq imkanları məhdud uşağını 8 yaşınadək tərbiyə etmiş anaların yaş həddi 5 il azaldılmaqla yaşa görə əmək pensiyası hüququ vardır.

Həmçinin axırıncı iş yerindən asılı olmayaraq yeraltı işlərdə, incəsənətin xüsusi sahələrində, həmçinin əmək şəraiti xüsusilə zərərli və ağır olan işlərdə çalışan, sığortaolunan qadınlar 55 yaşına çatdıqda azı 20 il sığorta stajına malik olduqda və bu müddətin azı 10 ilini həmin işlərdə çalışmışlarsa, fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verdikdə əmək şəraitinə görə güzəştli şərtlərlə yaşa görə əmək pensiyası hüququ vardır.  

Mülki aviasiya uçuş və uçuş-sınaq heyətində işlə əlaqədar vəzifələrdə çalışan qadınların azı 20 il sığorta stajı olduqda, səhhətinə görə uçuş işindən azad olunmuş qadınların azı 15 il sığorta stajı olduqda və fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verdikdə  yaşa görə əmək pensiyası hüququ vardır.

Cəzaçəkmə müəssisələrində, istintaq təcridxanalarında və azadlıqdan məhrum edilmiş şəxslər üçün nəzərdə tutulmuş müalicə müəssisələrində müvafiq icra hakimiyyəti orqanı tərəfindən təsdiq edilmiş işlərin və peşələrin siyahısı üzrə məhkumlarla və həbsdə olan şəxslərlə işləyən qadınlar 55 yaşına çatdıqda yaşa görə əmək pensiyası hüququ yaranır.

Güzəştli şərtlərlə əmək pensiyası hüququ yaranan vətəndaşlar əmək pensiyası təyinatı üçün nə etməlidirlər?

Müvafiq sənədlərlə birlikdə Azərbaycan Respublikasının Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun yerli orqanlarının inzibati binalarına, həmçinin “ASAN xidmət” mərkəzlərinin inzibati binalarına müraciət edə bilərsiniz.

araz.az xəbər portalı.

“Nar” Qaxda yenilənmiş mağazasını təqdim etdi

WhatsApp Image 2021 05 26 at 16.26.53 1“Nar” paytaxtla yanaşı regionlarda da mərkəzlərini yeniləməklə müştərilərinə tam yeni satış və xidmət təcrübəsi təqim etməyə davam edir.

"Nar"dan  araz.az-a daxil olan məlumata görə, mobil operator Qax şəhəri H. Əliyev prospekti 346 ünvanında yerləşən mağazasını yeni konseptə uyğunlaşdıraraq, müştərilərin ixtiyarına verib.Qeyd edək ki, “Nar” mağazasında ziyarətçilərə nömrələrin satışı, bərpası, eyni zamanda dublikatının çıxarılması da daxil olmaqla, müxtəlif növ xidmətlər təqdim edilir. Yenilənmiş “Nar” mağazasında, həmçinin mobil telefonların, müxtəlif cihazların və aksesuarların satışı da həyata keçirilir. Bir sözlə, yenilənmiş “Nar” mağazasında müştərilərin müasir üslubda məlumat və xidmət alması təmin edilib.                                                                      

Qeyd edək ki, “Nar” abunəçilərinə üstün və fərqli müştəri xidməti təcrübəsi təqdim etmək məqsədilə,  mağazalarında yeni konseptin tətbiqini bütün ölkə boyu davam etdirməkdədir. Mobil operatorun paytaxt və regionlar üzrə yeni konsepsiyada təqdim etdiyi mağazalarının sayı 24 olub. Sizə yaxın olan satış və xidmət mərkəzlərinin ünvanları haqqında ətraflı məlumatı nar.az/map internet səhifəsindən öyrənə bilərsiniz.

“Azerfon” şirkəti (“Nar” ticarət nişanı) 21 mart 2007-ci ildə fəaliyyətə başlayaraq qısa bir müddətdə Azərbaycanda telekommunikasiya və mobil rabitə sahəsinin aparıcı şirkətlərindən birinə çevrilib. “Nar” ticarət nişanı Azərbaycanın zəngin mədəni və tarixi irsinin çağdaş həyatla bağlılığının rəmzi olaraq seçilib. “Nar” ölkədə ilk dəfə olaraq 3G texnologiyasını təqdim edib və geniş 4G şəbəkəsini abunəçilərinin istifadəsinə verib. “Nar” şəbəkəsi hazırda ölkə ərazisinin 91%-ni əhatə edir və 8780-dan artıq baza stansiyası ilə 2,3 milyondan çox abunəçiyə yüksəkkeyfiyyətli xidmət göstərir. Mobil operator şəbəkə keyfiyyətinin davamlı təkmilləşdirilməsi strategiyası çərçivəsində səs keyfiyyətinin nəzərəçarpacaq dərəcədə artımını və səsin təmiz ötürülməsini təmin edən “HD-Voice” (High Definition Voice) xidmətini təqdim edib.306CC52C 4DD3 4F11 97B3 2699618D4FC4

araz.az xəbər portalı.

“Azəristilik” sədri kimdir? Milyonlar necə yeyilir?

yasar hesenov1 1Artıq 18 gündür Bakı da daxil olmaqla, Azərbaycanın aran rayonlarında qış rejiminə keçilib və evlərə istilik gəlməlidir. Ancaq vəziyyətdən heç də hamı razı deyil və yaxud əksəriyyət ciddi şəkildə narazıdır.

araz.az  Axar.az -a istinadən xəbər verir ki, mənzillərdə istilik gözləyən və “Azəristiliktəchizat” ASC rəsmilərinin bir ay əvvəldən “çoxdan hazırıq” sözlərinə inanan sakinlərin bütün ümidlərini qurum ilk gündəncə məhv etdi, 15 noyabrda mənzillərə istilik verilmədi.

Sorğuya cavab olaraq isə “Azəristiliy”in “hərşeyşünası” - Abonent və Müştəri Xidmətlərinin rəisi Rafiq Əliyev (bu adı yadda saxlayın) elan etdi ki, bəs, qazanxanalar indi işə salınır.

16 noyabrda Bakının bir çox ərazisinə istiliyin çatmamasına R.Əliyev səbəb olaraq qazanxanalarda suyun yeni-yeni qızmağa başladığını, yaxın saatlarda mənzillərə veriləcəyini bildirdi.

17 noyabrda isə həmən bu “Azəristiliy”in ictimai siması, sifəti, üzü olan və hər sözü ilə bu simanın necəliyini ifadə edən R.Əliyev rəsmi şəkildə bəyan etdi ki, biz Bakıya birdən-birə istilik verə bilmərik ki? Tədricən, yavaş-yavaş binalara istilik veriləcək.

Bu sözləri və əlbəttə ki, bu əməli heç bir idarə rəsmisi öz peşəsinə sığışdırmamalıdır. 15 noyabrdan istiliyin verilməsi barədə NK-nın qərarı var - ya icra edəcəksən, ya da rədd olub gedəcəksən! O qərarda Bakının “tədricən”, “yavaş-yavaş”, “bala-bala” qızdırılması barədə göstəriş-filan yoxdur. Bakının bütün əhalisi 15 noyabr 00:00-dan – yəni 14 noyabr gecəsindən istilik almalı idi, ancaq “Azəristiliy”in sayəsində 15 noyabrda qazanxanalar “işə düşdü”, yalnız 18 noyabra qədər Bakının əhəmiyyətli hissəsini istiliklə təmin edə bildilər.

Və partlamalar başladı

20 noyabra qədər bir neçə məhəllə və ərazilər istisna olmaqla, Bakı istiliklə təmin edilmişdi. Ki, “Azəristiliy”in “kövrəkliyi” üzə çıxdı: hər gün bu neft-qaz ölkəsinin paytaxtında böyük bir ərazidə istiliyin verilməsi dayanır və bir çox hallarda günlərlə bərpa edilmir. Səbəb isə boruların partlaması, hər üç gündən bir “magistral xətt” adlı “günahkarın” özünü yaxşı aparmaması və sıradan çıxmasıdır. Bu magistral xətt nədirsə, o, yalnız iki gün dözə bilir, sonra onun təmirinə ən azı 3-5 gün zaman gedir.

“Azəristiliktəchizat” ASC-nin özü də Xətai rayonunda, Xudu Məmmədov küçəsində yerləşir. Bu ASC-nin öz yerləşdiyi rayonda istilik sözün tam mənasında bərbaddır. Rayonun əsas hissəsi istiliyi 18 noyabrda alıb, 20 noyabrda isə kəsilib – rəsmi açıqlamaya görə, magistral xəttdə qəza baş vermişdi. Qəzanın aradan qaldırılması 3 gün çəkdi və 23 noyabrdan istilik bərpa olundu.

28 noyabrdan isə yenidən “magistral xətt”də qəza baş verib. 30 dekabrda Rafiq Əliyev – yuxarıda xatırlatdığımız sima – elan etdi ki, təmir başa çatıb və istilik yaxın saatlarda veriləcək.

2 dekabrdır, havalar soyuyub, hələ də təmir gedir, hələ də istilik bərpa olunmayıb!

“Azəristilik” yay aylarında istilik xətlərinə niyə nəzarət etmir? Dövlətdən ayrılan vəsaitlər hara gedir?

“Azəristiliy”ə ayrılan dotasiyalar

Bu dövlət qurumu 2005-ci ildə yaranıb. Hər il bu quruma dövlət büdcəsindən cari xərclər üçün külli miqdarda vəsait ayrılır.

İnternet resurslarından əldə etdiyimiz məlumata görə, bu qurum haqda 2013-cü ildə hazırkı vitse-spiker, həmin zaman deputat olan Adil Əliyev maraqlı açıqlama yayıb. O bildirib ki, 2012-ci ildə büdcə layihəsinə ölkə ərazisində istilik sistemi üzrə yaranan zərərin ödənilməsində istilik sistemi və təchizati obyektlərinin istismarına və təmirinə 31,6 milyon manat ayrılıb. 2011-ci ildə isə ayrılan vəsait 19 milyon manat olub. Ümumilikdə 2005-2010-ci illərdə isə istilik sisteminə üst-üstə təxminən 77 milyon manat ayrılıb”.

Adil Əliyev “Azəristiliktəchizat”ın rəhbəri Yaşar Həsənova müraciət də etmişdi:

“Cənab Yaşar Həsənovun nəzərinə çatdırmaq istəyirəm ki, mənim seçicilərimin (Adil Əliyev Nərimanov rayonundan seçilib – red.) hələ də istilik məsələsi həll olunmamış qalıb və mən onların millət vəkili kimi rəsmi müraciətimi bu rəqəmlərin yoxlanması üçün Hesablama Palatasına və Korrupsiyaya Qarşı Mübarizə İdarəsinə təqdim etməyə hazırlaşıram”.

2013-cü ildən 2021-ci ilə qədər Azəristilik ASC-yə büdcədən əlavə nə qədər dotasiya ayrıldığı bəlli deyil, bununla bağlı sorğu vermişik və rəqəmlər əldə etdikdə, mütləq bu yazı da yenilənəcək.

Ancaq təxmin etmək olar ki, ilbəil Azəristilik ASC-yə ayrılan vəsait də artıb: 6 il ərzində (2005-2010) 77 milyon, 2011-də 19, 2012-də 31,6 milyon və s. ardıcıllığı əsasında dotasiyanın ildən-ilə artdığını düşünmək olar. Nəticədə isə heç bir əsaslı təmir yoxdur; əvəzində isə yalnız qəzaların sayı artır...

“Azəristiliy”in tenderlərində qalib gələn kimdir?

Açıq mənbələrdən əldə etdiyimiz məlumata görə, “Azəristiliktəchizat” Açıq Səhmdar Cəmiyyəti tərəfindən nəticəsi 10.01.2020-ciil tarixdə elan olunmuş xüsusi texnika, maşın və mexanizmlərin icarəsinin satınalınması üzrə 237.250.8 manat məbləğində müqavilə “EL-Rado” MMC ilə bağlanıb.

Elə həmin tarixdə modul tipli qazanxanaların daşınması və quraşdırılmasının satınalınması üzrə 21.600 manat məbləğində müqavilə də “EL-Rado” MMC ilə bağlanıb.

Kommersiya qurumunun hüquqi şəxslərin dövlət reyestrinə daxil edilmiş məlumatlarda “EL-Rado” MMC-nin 09.04.2019-cu il tarixdə Sumqayıt şəhərindəki 2 saylı Ərazi Vergilər Baş İdarəsində dövlət qeydiyyatına alındığı göstərilir. MMC-nin nizamnamə kapitalı 10 manat, hüquqi ünvanı Abşeron rayonu, Məmmədli qəsəbəsi, Kürdəxanı yolu, qanuni təmsilçisinin isə Elnur Muxtar oğlu Cəmilli olduğu göstərilib.

“Azəristiliktəchizat” Açıq Səhmdar Cəmiyyəti tərəfindən 14.01.2020-ci il tarixdə keçirilən, məsafədən nəzarət ölçü sistemləri və elektrotexniki avadanlıqlarının satınalınması üzrə tenderdə qalib “Elektrogas” Məhdud Məsuliyyətli Cəmiyyəti olub və 264.707.12 manat məbləğində müqavilə bağlanıb.

“Azəristiliktəchizat” Açıq Səhmdar Cəmiyyəti ilə “Elektrogas” MMC arasında 30.09.2019-cu il tarixdə qazanxana və istilik şəbəkələri üçün müxtəlif markalı nasos və ehtiyyat hissələrinin satınalınması üzrə 294.136.42 manat, istilik təsərrüfatlarında nəzarət ölçü cihazları və avtomatika avadanlıqları və onların ehtiyat hissələrinin satınalınması üzrə 112.587.22 manat, qaz sayğacları, qaz avadanlıqları və onların ehtiyat hissələrinin satınalınması üzrə isə 159.809.76 manat dəyərində müqavilələr bağlanıb.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “Elektrogas” Məhdud Məsuliyyətli Cəmiyyəti 13.08.2018-ci il tarixdə Sumqayıt şəhərindəki 2 saylı Ərazi Vergilər Baş İdarəsində dövlət qeydiyyatına alındığı göstərilir. MMC-nin nizamnamə kapitalı 20 manat, hüquqi ünvanı Yasamal rayonu, General Akim Abbasov ev 1C, m. 22, qanuni təmsilçisinin isə Elnur Muxtar oğlu Cəmilli olduğu göstərilib.

Bu Elnur Cəmilli kimdir? Niyə külli miqdarda tenderləri “Azəristilik”dən yalnız onun şirkətləri udur?

“Aktualinfo” saytı daha bir maraqlı faktı da tirajlayıb. Bu faktlar tirajlandıqdan sonra bu il tenderin qalibi dəyişib.

“Azəristilik” qazanxana və istilik şəbəkələrinin istismarı üçün layihə üzrə müəyyən edilmiş müxtəlif markalı nasos, mühərriklərin satınalınması üzrə 43 660 manat məbləğində satınalma müqaviləsi 18.11.2021-ci il tarixdə “Tikinti bərpa firması” MMC ilə bağlanıb.

Dövlət Vergi Xidmətinin 19 noyabra olan məlumatlarında “Tikinti bərpa firması” MMC-nin 124 297.28 manat vergi borcu olduğu göstərilir. “Dövlət satınalamları haqqında” Qanunda isə vergi borcu olan şirkətin tenderdə iştirakını qadağan edir.

“Azəristiliktəchizat” ASC-nin sözügedən MMC ilə iki ayda 543 851 manat məbləğində satınalma müqaviləsi bağladığı məlum olub: Birini qeyd etdik – 43 660 manatlıq. İkinci - istilik təchizatı sistemlərinin təmiri və bərpası üçün lazım olan müxtəlif material və ehtiyat hissələrinin satınalınması üzrə 222 962 manat məbləğində satınalma müqaviləsi 12.10.2021-ci il tarixdə bağlanıb; üçüncü - qazanxana və istilik şəbəkələrinin istismarı üçün layihə üzrə müəyyən edilmiş nəzarət ölçü cihazları və avtomatika avadanlıqları və onların ehtiyat hissələrinin satınalınması üzrə 277 229.2 manat məbləğində satınalma müqaviləsi isə 20.09.2021-ci il tarixdə.

Kommersiya qurumunun hüquqi şəxslərin dövlət reyestrinə daxil edilmiş məlumatlarında “Tikinti bərpa firması” MMC-nin İqtisadiyyat Nazirliyi yanında Dövlət Vergi Xidmətinin 3 saylı Ərazi Vergilər İdarəsində 03.03.2011-ci il tarixdə dövlət qeydiyyatına alındığı bildirilir. Nizamnamə kapitalı 10 manat olan MMC-nin hüquqi ünvanı Quba rayonu, Quba şəhəri, məh. 16, qanuni təmsilçisinin isə Cəfərov Rafiq İmamqulu oğlu olduğu göstərilir.

Bağlanmış müqavilələrdən də göründüyü kimi “Azəristiliktəchizat” Açıq Səhmdar Cəmiyyəti tərəfindən keçirilmiş tenderlərdə satınalmalar haqqında qanunun tələbləri pozulub.

İki il ardıcıl Elnur Cəmilli, daha sonra isə iki aya yarım milyondan çox Rafiq Cəfərov.

Hər ikisində də pozuntularla...

Açıq mənbələrdə bu faktlar yetərincədir və hər kəs azacıq əziyyət çəkməklə bunlarla tanış ola bilər. Maraqlıdır ki, “Azəristilik” heç vaxt bu ittihamlara cavab verməyib.

Yeri gəlmişkən, qurumun rəhbəri Yaşar Həsənov 2005-ci ildən – qurum yarandığı gündən bu ASC-yə rəhbərlik edir...

araz.az xəbər portalı.

19 -dən səhifə 1936

Əlaqəli xəbərlər