Bakıda maskalılar evlərə hücum edir: polis hərəkətə keçmir, əhali silah alır

Müşfiqabad qəsəbəsində oğurluq hallarının artması, kriminal durumun ürəkaçan olmadığı barədə məlumat vermişdik.
Hətta Bakının bu qəsəbəsində artıq oğruların maskalı və soyuq silahla evlərə basqın etdiyini də bildirmişdik. Ev sahibləri evdə olduğu halda açıq-aşkar edilən bu basqınla bağlı polis hələ də hərəkətə keçməyib.

Axar.az xəbər verir ki, maskalı oğrular aprelin əvvəllərində qəsəbədəki mənzillərdən birinə gecə saat 3 radələrində qapını döyərək girməyə cəhd etmişdilər. Ev sahibinin DİN-in 102 Qaynar xəttinə zəng etməsi belə quldurları qorxutmamışdı. Onlar evə soxulmaq üçün pəncərəni qırmağa çalışmışdılar.

Hadisəni araşdıran Abşeron Rayon Polis İdarəsi hələ ki, heç bir nəticə əldə etməyib. Ümumiyyətlə, Müşfiqabad qəsəbəsində illərdir oğurluq hadisələrinin üstü açılmır. Bu isə oğrulara artıq daha həyasız davranmaq, quldurluq etmək fürsəti verir.

Problemin böyüməsinə həm də Müşfiqabad qəsəbəsinin 3 rayonun – Abşeron, Qaradağ və Binəqədi – ərazi vahidlərinə bölünməsi də şərait yaradır. Belə ki, oğurluq hadisəsi zamanı həmin evin hansı polis idarəsinin hansı polis bölməsinə düşdüyü müzakirəsi başlayır. Bəzən isə zərərçəkənlər bu üç rayonun arasında gedib-gəlməkdən usanırlar.

Mütəxəssislərin sözlərinə görə, Müşfiqabadın hazırkı inzibati bölgüsü kriminal ünsürlərin əl-qol açmasında rol oynayan əsas faktlardandır. Bu qəsəbənin əhalisinin 50 mini adlamasına baxmayaraq, hələ də burda polis bölməsi fəaliyyət göstərmir. Çünki 3 rayon ərazisində əsir-yesir qalan bir qəsəbə ilə bağlı hansı idarənin məsuliyyət daşıdığı bilinmir.

Məsələ ilə bağlı saytımıza danışan keçmiş polis rəisi Mahmud Hacıyev bildirib ki, Müşfiqabad böyük qəsəbə olsa da, ərazisi 3 rayon arasında bölündüyündən, polis bölməsi fəaliyyət göstərmir:

“Müşfiqabad böyük qəsəbədir. Onun bir hissəsi Abşeron, bir hissəsi Qaradağ, bir hissəsi isə Binəqədi rayonuna düşür. Belə məqamlarda vətəndaşların da, polis idarələrinin də üstünə böyük məsuliyyət düşür. Yaxşı olar ki, hər sahə rəisi özünün mobil və iş telefon nömrəsini, ad soyadını müəyyən yaşayış evlərinə, binalara vursun. Vətəndaş hadisə baş verəndə kimə və hansı nömrəyə zəng edəcəyini bilsin.

Məsələn, Nizami rayonunda bu üsuldan istifadə edilib. 10 bloklu, 9 mərtəbəli bir neçə binanın girişinə “sizin sahə rəisiniz” başlıqlı məlumatlandırıcı vərəq yapışdırılıb və nömrələri də qeyd edilib. Müşfiqabad kimi böyük qəsəbələrə də bunu tətbiq etmək lazımdır. Bu, xüsusilə son vaxtlar həmin ərazidə artan oğurluq hallarına görə daha geniş formada tətbiq edilməlidir”.

Qeyd edək ki, Müşfiqabad qəsəbəsi üçün Abşeron Rayon Polis İdarəsinin 40-cı polis bölməsi cavabdehdir ki, o da Sulutəpə ərazisində yerləşir. Sulutəpə qəsəbəsinin əhalisinin son vaxtlar necə sürətlə artdığını və bölmənin qəsəbədən 20 km məsafədə yerləşdiyini nəzərə alsaq, oğurluq hadisələrinin niyə araşdırılmadığı və yaxud barmaqarası yanaşıldığı üzə çıxar.

Qaradağ və Binəqədi rayon Polis idarələrinin isə ümumiyyətlə yaxınlıqda heç bir bölməsi fəaliyyət göstərmir.

Bu cür anlaşılmazlıq səbəbindən əhali böyük təşviş içindədir. Hətta bu qəsəbədə artıq “silahlanma yarışı” başlayıb. Sakinlər özlərini basqınçılardan müdafiə etmək üçün ov tüfəngləri almağa başlayıblar.

Qəsəbə sakinləri müxbirimizlə söhbətlərində Daxili İşlər naziri Ramil Usubovdan başqa ümid yerlərinin olmadığını, ondan kömək istədiklərini, lazım gələrsə, bunun üçün imza toplayacaqlarını bildiriblər.

Mövzuya qayıdacağıq.

araz.az xəbər portalı.