Azərbaycan Dillər Universitetinin məzunu Vüsal Hümbətzadənin Harvard Universitetinin təşkilatçılığı ilə onlayn formada keçirilən “Ekologiyamızı qoruyaq” adlı beynəlxalq layihə müsabiqəsində qələbə qazandığı barədə məlumatı araz.az dünən dəyərli oxucularının diqqətinə çatdırıb. Qeyd edib ki, siyahısı açıqlanan iştirakçıların sırasında Vüsal Hümbətzadə birincilik qazanıb. 

Həmin xəbərdən dərhal sonra, redaksiyamıza tələbə həmyerlimiz barədə daha bir qürurverici xəbər daxil olub. Məlumatlı mənbənin dediklərinə görə, Azərbaycan Dillər Universitetinin məzunu Asiya ölkələrinin beynəlxalq diplomatiya üzrə keçirilən bilik müsabiqəsində Azərbaycanı təmsil edən yeganə tələbə kimi, həm də bu beynəlxalq yarışda birinci yerin qalibi olub. Xəbəri Pakistan Müasir Dillər Universitetinin Mətbuat Xidməti də rəsmən təsdiqləyib.

Bildirmək istəyirik ki, indiyənədək heç bir tələbəmiz beynəlxalq diplomatiya sahəsində Asiya ölkələri üzrə keçirilən beynəlxalq yarışlarda birinci yerə çıxmayıb.

araz.az xəbər portalı olaraq bir daha qeyd edirik ki, Vüsal Hümbətzadə bir-neçə gün bundan əvvəl İsveçrənin ETH Sürix Universitetinə qəbul olub. Ümumiyyətlə, Harvard Universiteti dünya reytinqində birinci, ETH Sürix Universiteti isə, bu reytinq sıralamasında yeddinci yerdə qərarlaşıb. Tələbə həmyerlimizə uğurlar arzulayırıq!

Fərhad MƏMMƏDOV,

araz.az xəbər portalı.