Təhsil nazirindən müəllimlərin işə qəbulu imtahanlarında yaranmış narazılıqlara REAKSİYA

eminemrulla44"2021-2022-ci tədris ili üzrə müəllimlərin işə qəbulu imtahanlarında namizədlərə təqdim olunmuş test tapşırıqları haqqında sosial mediada yayılmış narazılıqlardan məlumatlıyıq".

araz.az-ın məlumatına görə, bunu təhsil naziri Emin Əmrullayev "Facebook" səhifəsində bildirib.

Nazir deyib ki, bunları nəzərə alaraq, ekspert komissiyası tərəfindən test tapşırıqlarının müxtəlif seanslar üzrə müqayisəli elmi-statistik təhlili aparılacaq: "Araşdırmaların nəticəsinə əsasən, növbəti 3 gün ərzində müvafiq qərarlar qəbul ediləcək və ictimaiyyətə açıqlanacaq".

araz.az xəbər portalı.

Əlilliyin təkrar təyin olunması ilə bağlı açıqlama

elil0

Prezident İlham Əliyevin yeni təsdiqlədiyi “Əlilliyi olan şəxslərin hüquqları haqqında” Qanunda dəyişiklik edilməsi barədə Qanun əlilliyi olan şəxslərə hümanist yanaşmanı özündə ehtiva edir.

Əmək və Əhalinin Sosial Müdafiəsi Nazirliyindən verilən məlumata görə, “Əlilliyi olan şəxslərin hüquqları haqqında” Qanuna dəyişiklik edilməklə, yeni maddə əlavə edilib. Maddəyə əsasən, əlillik müddəti bitdikdən sonra 6 ay ərzində əlilliyin təkrar qiymətləndirilməsi nəticəsində şəxsin əlilliyi yenidən müəyyən edildikdə, şəxs ötürülmüş müddət də daxil olmaqla, əlilliyi olan şəxs hesab ediləcək.

Yəni, əgər şəxsə əlillik müddəti bitəndən sonra 6 aya qədər dövr ərzində yenidən əlillik təyin edilərsə, yeni əlillik təyinatı onun əvvəlki əlillik müddətinin bitdiyi tarixdən rəsmiləşəcək. Beləliklə, ötürülmüş müddət nəzərə alınacaq və həmin müddət üçün də vətəndaşa əlilliyə görə sosial ödənişlər veriləcək.

 

araz.az xəbər portalı.

Vaksin vurdurmayanlar işdən çıxarıla bilər - Deputatdan XƏBƏRDARLIQ

vaksin

“Azərbaycan Respublikasında COVID-19 xəstəliyi əleyhinə 2021-2022-ci illər üçün Vaksinasiya Strategiyası”na uyğun olaraq ölkə üzrə peyvəndlənmə prosesi mərhələli şəkildə davam edir. Qeyd edək ki, Azərbaycanda vaksin vurdurmaq könüllü olsa da, artıq bir neçə ölkədə bu proses daha da sürətli aparılması üçün məcburi hala gətirilib. Maraqlıdır, Azərbaycanda da peyvəndlənmə məcburi ola bilərmi? Milli Məclisin Sosial siyasət komitəsinin sədri, həkim Musa Quliyev Azərbaycanda vaksinasiya prosesinin məcburi xarakater dayışa biləcəyi barədə mümkün ehtimalları modern.az-la bölüşüb. Onun sözlərinə görə, xarakterindən asılı olaraq, peyvəndlənməyən şəxslərin işdən azad olunması mümkündür:

“Azərbaycanda vətəndaşı peyvənd olunmağa məcbur etməyəcəklər. Sadəcə, işin xarakterindən asılı olaraq bəzi yerlərdə ola bilər ki, peyvəndlənməyən şəxslər işdən azad olunsunlar. Məsələn,  tibb, təhsil - bir sözlə, vətəndaşlarla ünsiyyətdə olan sahə işçilərinin vaksinasiyası vacibdir. Həmin sahə işçiləri şüurlu şəkildə bunu başa düşməlidir. Həm özlərini, həm də vətəndaşları qorumaq üçün vaksin vurdurmalıdılar”.

Deputat deyib ki, ilin sonuna kimi vaksinasiya prosesini sürətli davam etdirsək, məhdudiyyətlərə ehtiyac olmayacaq:

“Ola bilər Azərbaycanda vaksinasiya prosesinin daha da sürətli aparılması üçün bir sıra məhdudiyyətlər tətbiq olunsun. Amma hələ ki bizdə vaksinasiya prosesi normal davam edir. Hesab edirəm ki, bu ilin sonuna qədər vaksinasiya prosesini belə uğurlu davam etdirsək, məhdudiyyətlərə və məcburiyyətlərə ehtiyac qalmaz.

Amma monitoriq aparılsa və ya Nazirlər Kabineti yanında Operativ Qərargah bəzi sahələrdə vaksinasiyanın aparılmasına mütləq qaydada qərar versə, bunu məqbul hesab etmək olar. Çünki dünya təcrübəsi bunu göstərir ki, vaksinasiya olunmayan şəxslər həm özləri, həm də ətrafdakılar üçün təhlükə mənbəyi kimi qalır”.

Azərbaycanda əhalinin vaksinasiyası 2021-ci il yanvar ayının ortalarından başlayıb.

Hazırda ölkəmizdə Çin istehsalı olan “Sinovac” (və ya “Koronavac”), Rusiya istehsalı olan “Sputnik V”, Britaniya və İsveçrənin birgə istehsalı olan “AstraZeneca”, ABŞ və Almaniyanın birgə istehsalı olan “Pfizer” vaksinlərindən istifadə edilir.

Rəsmi məlumata görə, dünənə kimi Azərbaycanda vurulan vaksinlərin ümumi sayı 4 108 514, birinci mərhələ üzrə vaksinasiya olunanların ümumi sayı 2 475 180, ikinci mərhələ üzrə vaksinasiya olunanların ümumi sayı isə 1 633 334 təşkil edir.

 

araz.az xəbər portalı.

Azərbaycanda karantin rejimi sərtləşdirilir?

1598682060poliskarantin0506201

Dünya üzrə koronavirusa yoluxma sayı artıb, yazını hazırladığımız zaman bu say 187 642 740 nəfər təşkil edirdi.   Virusdan ölənlərin sayı 4 049 289, sağalanların sayı isə  171 597 756 nəfər olub. Virusa yoluxma sayına görə ilk beşlikdə olan dövlətlər ABŞ (34 732 753 nəfər), Hindistan (30 874 376 nəfər), Braziliya (19 089 940 nəfər), Fransa (5 812 639 nəfər) və Rusiyadır (5 783 333 nəfər).

Azərbaycanda da koronavirusa yoluxan 337 254 nəfərin 4 984-ü ölüb, 330 762 xəstə sağalıb. Son statistikaya əsasən infeksiyaya 156 yeni yoluxma faktı qeydə alınıb, 37 nəfər müalicə olunaraq sağalıb. Göründüyü kimi, son günlər yoluxma sayı iki rəqəmlidən üç rəqəmliyə keçib. Bizdə də yoluxma artan temp üzrə gedirmi? Bu gedişat təkrar qapanmaya səbəb ola bilərmi? Bəzi ölkələr artıq yenidən sərt karantin rejimini tətbiq edib.

Yeri gəlmişkən, Rusiya Səhiyyə Nazirliyinin yoluxucu xəstəliklər üzrə baş mütəxəssisi, professor Vladimir Çulanov bildirib ki, daha çox törəmə qabiliyyətli virus variantlarının ortaya çıxması istisna edilmir: “Yüksək ehtimalla deyə bilərik ki, yayılma baxımından digərlərinə nisbətdə üstünlüklərə malik ştammların olması mümkündür. Çox güman ki, bu, virusun məhz yoluxdurmağa ehtiyacı var. Bizi öldürməsi onun üçün sərfəli deyil, ona görə də bu virus daha çox yoluxdurucu olmaq məqsədi daşıyır”.

Professor qeyd edib ki, koronavirusun təhlükəsiz virus olduğu barədə fərziyyələr ortadan qaldırılmalıdır: “COVİD-19-un ölüm nisbəti qripdən on qat daha yüksəkdir. Dünyada artıq dörd milyondan çox insan bu xəstəlikdən ölüb. Bundan əlavə, COVİD-19 getdikcə qarşılaşdığımız fəsadlarla xarakterizə olunur”.

İnfeksionist-hepatoloq Mərdan Əliyev son epidemioloji vəziyyətlə bağlı “Yeni Müsavat”a danışıb: “Hansı ölkədə ”Delta" ştammı yayılıbsa, orada qapanmalara gedilir. Çünki onun yoluxma sürəti daha çoxdur. Bizdə “Delta” ştammının olub-olmamasını yoxlamaq üçün genetik analiz lazımdır. Bu da yalnız Hematologiya İnstitutunda mümkündür, indi hazırda orada yoxlama işləri gedir. Biz hələ dəqiq bilmirik ki, bizdə bu ştammla bağlı vəziyyət nə yerdədir. Buna görə gözləyirik, yoluxma sayı ilə bağlı rəqəmlərə diqqət edirik. Toylar da yeni başlayıb, növbəti mərhələdə biləcəyik, yoluxmanın sayında artım olacaq, ya yox. Təbii ki, sürətli artım olarsa, karantin qaydalarının sərtləşdirilməsinə gedilə bilər. Amma hazırkı rəqəmlərlə olmayacaq. Üzü payıza doğru qapanmalara gedilə bilər. Çünki payız fəsli yoluxmanın artmasına əlverişli şərait yaradır".

Bununla belə, infeksionist hesab edir ki, əvvəlki kimi sərt karantin qaydaları tətbiq edilməyəcək: “Buna ehtiyac da görmürəm. Bizdə birinci, ikinci dalğada olduğu kimi sərt qaydalar olmayacaq. Ola da bilməz. Çünki burada həm vaksinasiya öz işini görür, həm də yoluxub sağalanlar var. Təbii immunizasiya baş verib. Əhalinin böyük hissəsi də yoluxub, sağalıb. Burada söhbət həm rəsmi, həm də qeyri-rəsmi yoluxmalardan gedir. İnsanların bir qismi yoluxub sağalıb, bir qismi də peyvənd olunub. Çox az bir qismi qalıb ki, peyvənd olunmayıb və yoluxmayıb. Yoluxmalar əsasən bu insanların hesabına olacaq. Həmin əhali hissəsinin sayı az olduğu üçün epidemioloji vəziyyət əvvəlki kimi olmayacaq, qapanmalar da əvvəlki kimi olmayacaq. Yenə də maska taxmaq, sosial məsafə saxlamaq, fərdi gigiyena qaydalarına riayət etmək yenə də tələb olunacaq. Əgər artmaların sayı çox olarsa, payızda metronun bağlanması  gözlənilə bilər. İctimai nəqliyyat yenə həftə sonları bağlana bilər. Amma həftəiçi də avtobusların sayı artırılmalıdır və maskalardan istifadəyə nəzarət olunmalıdır ki, yoluxma sayında artmaya səbəb olmasın. Toylara da müəyyən qədər məhdudiyyət qoyula bilər. Məsələn, 50 nəfərdən ibarət mərasimə icazə verilə bilər”.

Almaniya-Azərbaycan Radioloji və Neyroradioloji Cəmiyyətinin sədri, tibb elmləri doktoru Nuran Abdullayev COVİD-lə bağlı son elmi yeniliklər barədə məlumat verib: “Norveçdə Long COVİD ilə bağlı yeni tədqiqat dərc edilib. Tədqiqatda gənc yaşda virusa yoluxub xəstəxanaya yerləşdirilməyə ehtiyac olmayan şəxslərdə xəstəlikdən 6 ay sonra: 28%-i iybilmənin itməsindən, 21%-i xroniki yorğunluqdan, 13%-i təngnəfəslikdən, 13%-diqqət pozğunluğundan və 11%-i isə yaddaş pozğunluğundan əziyyət çəkib.

Almaniyanın Heidelberg şəhərində Long COVID ilə bağlı olan çox önəmli elmi tədqiqat göstərir ki, 5 ayda simptomları hələ də qalan şəxslərin çoxu bu simptomları düz 1 il daşıyır. Beynin virusun təsirindən nə qədər zərər görməsi də tədqiqatda göstərilir".

Tibb elmləri doktoru əlavə edib ki, uşaqlar “Delta” variantına görə yoluxma təhlükəsi ilə üz-üzədirlər: “İngiltərədən olan ən son elmi statistik rəqəmlər bizə payızda məktəblərlə bağlı çox ehtiyatlı olmağı göstərir. Belə ki, orada may ayının sonunda 1 həftəlik tətilə, ona qədər isə məktəblərdə aparılan test strategiyalarına və məsafə qaydalarına əməl olunmağa baxmayaraq ”Delta" variantının peyvənd olunmayanlar və ya az doza ilə peyvənd olunanlar arasında kifayət qədər qalxmağının şahidi oluruq.

Artıq elmi aspektdən baxdıqda deyə bilərik ki, dünyanın ən gənc nəsilləri, yəni uşaqlar Delta variantına görə yoluxma təhlükəsi ilə üz-üzədirər. Ciddi təhlükələrdən də biri onların Long COVİD problemləri olacaq. Onlar mütləq qorunmalıdırlar, Azərbaycanda uşaqları qorumaqla bağlı tədbirlər planı artıq hazır olmalıdır.

İsraildə aparılan son epidemioloji təhlillər Biontech/Pfizer-in Delta variantına qarşı effektivliyinin 64%-ə endiyini göstərir. Əgər payız aylarında yoluxma orada çoxalarsa, effektivliyin qeyd edilən formada olması ciddi problemlər yarada bilər.

Biontech/Pfizer peyvəndinin ürək əzələsinin ciddi iltihabına səbəb olması barədə elmi tədqiqatların müəyyən hissəsi yekunlaşır. Ümumiyyətlə, mRNA peyvəndlərinin (Biontech/Pfizer və Moderna) yan təsiri kimi ürək əzələsinin iltihabı məsələsi müzakirə olunur. Qərarı çətinləşdirən odur ki, COVİD-19 virusuna yoluxarkən də ürək əzələsinin iltihabı kimi ağırlaşmaya rast gəlinir. Bu iki halı, yəni peyvənddən sonra və COVİD-19-dan sonra müqayisə edəcək ciddi elmi tədqiqatı aparmaq isə çox çətindir.

Scripps Center La Jolla -dan olan tədqiqat sübut edir ki, COVİD-19-dan sonra ürəyin funksiyası bəzən aylarla pozulur. Dəqiq səbəbləri elmi olaraq hələ də araşdırılır.

Yeni “Novavax” peyvəndi haqqında önümüzdəki aylarda daha çox eşidəcəksiniz, onunla bir çox kasıb ölkələr də vəziyyətdən çıxarılmağa çalışılacaq".

 

araz.az xəbər portalı.

“Beta” şirkəti Lənkəranın Haftoni rayonunda icarəyə götürdüyü meşə ağaclarını məhv edir...

agac 020221 1 1

Son günlər kütləvi informasiya vasitələri və sosial şəbəkələrdə Lənkəran rayonunun Haftoni rayonu ərazisində “Beta” şirkətinə icarəyə verilmiş meşə fondu sahəsində ağacların kəsilməsi ilə bağlı məlumatların araşdırılması və müqavilə şərtlərinin icra vəziyyətinin yoxlanılması məqsədilə Dövlət Ekoloji Təhlükəsizlik Xidmətinin araşdırma Qrupunun ilkin yoxlamaları başa çatıb. Bunu mətbuata Xidmətin rəisi Hikmət Əlizadə bildirib.

O qeyd edib ki, aparılan araşdırmalar zamanı “Beta” şirkəti ilə Lənkəran Regional Meşə Təsərrüfatı Mərkəzi arasında meşə fondu torpağının açıq sahəsində bağ salınması məqsədilə bağlanmış müqavilənin icrası prosesində kənara çıxmalara yol verildiyi və ərazidə kol-kosdan əlavə yaş ağacların da kəsildiyi aşkar olunub.

Maraqlıdır ki, Xidmət rəisi icarəyə götürdüyü meşə fondu sahəsində yaş ağaclara divan tutan “Beta” şirkətinə qarşı hansı tədbirlər görüləcəyi, şirkətin hansı şəkildə cəzalandırılacağı barədə bir söz deməyib.

Ümumiyyətlə, yerli şirkətlərin təbiətə, meşə zolaqlarına və sair divan tutması adi hal alıb. Bir şirkət ağacları kəsir, başqa birisi ağacların diblərini asfaltladır, yaşıllığı məhv edir, başqa birisi çirkab suları dənizə axıdır və sair. Ekspertlər deyir ki, belələrinin dərs götürməsi üçün konkret cəza müəyyən edilməlidir, çünki cərimələr işə yaramır, problemin qarşısını ala bilmir.   

  • Telman Zeynalov: “Bu cür şirkətlər, şəxslər cəzalandırılmalıdır və bu barədə ictimaiyyətə məlumat verilməlidir”

Milli Ekoloji Proqnozlaşdırma Mərkəzinin rəhbəri, ekoloq Telman Zeynalov “Bakı-Xəbər”ə bildirdi ki, Ekologiya və Təbii Sərvətlər Nazirliyi əhalinin oksikenlə təmin olunmasını istəyirsə, özünün də elan etdiyi kimi, ölkə ərazisinin 3-də 1 hissəsini meşə örtüyü təşkil etməlidir: “Lakin bizdə bu 8, 6 faizdi, 273 min hektar da Qarabağ ərazisində idi, amma ermənilərin tapdağı altında qaldığı müddətdə nə qədər meşə zolağının qırıldığı hələ məlum deyil. Ölkəmizdə ciddi oksiken çatışmazlığı var. Bu tərəfdən də, “Beta” kimi şirkətlər meşələrə divan tutur. Əgər şirkət çay plantasiyalarını genişləndirmək istəyirsə, nəyə görə meşə sahəsini qırır, meşə ərazilərinə müdaxilə edir? O qədər boş ərazilərimiz var ki, işlərini orada görsünlər. Bütün bunların baş verməsi onunla bağlıdır ki, bu sahəyə nəzarət yoxdur. İqtisadiyyata, pul qazanmağa ekologiyanı qurban verirlər, bu səbəbdən də ekologiya sual altında qalır. Belə çıxır ki, Ekologiya Nazirliyinin o şirkətə gücü çatmır, görünür, arxasında hansısa vəzifəli şəxslər durur. Bu sahədə özbaşınalıq baş alıb gedir. Əslində, bu cür şirkətlər, şəxslər cəzalandırılmalıdır və bu barədə ictimaiyyətə məlumat verilməlidir”.

T.Zeynalov hesab edir ki, meşələrin qırılması qlobal istiləşməyə səbəb olur və bunun da mənfi nəticəsini hiss edirik.

  • Şəmsəddin Əliyev: “Cəzalar sərtləşdirilməlidir”

Məsələnin hüquqi tərəfinə münasibət bildirməsi üçün isə “Polisə dəstək” İctimai Birliyinin rəhbəri, hüquqşünas Şəmsəddin Əliyevin rəyini öyrəndik. Ş.Əliyev bizimlə söhbətində bildirdi ki, belə məsələlərlə bağlı qanunvericilikdə maddələr var və bu cür qanunsuzluğa yol verənlərə qarşı sərt tədbirlər görülməlidir: “Bütün hallarda, ümumi niyyətlərdən kənara çıxanda bu artıq başqa cinayət növlərindən xəbər verir. Ümumiyyətlə, Cinayət Məcəlləsində ekoloji cinayətlərlə bağlı bir fəsil maddə var və 28-ci fəsil sırf ekoloji cinayətlərlə əlaqədardı. Məsələn, hansısa bir işi həyata keçirmək üçün ətraf mühitin qaydalarının, ekoloji cəhətdən təhükəli maddələrin, tullantıların dövriyyəsi qaydalarını, baytarlıq qaydalarının pozulması, meşələrin qırılması, su hövzələrinin çirkləndirilməsi, torpaqların korlanması və s. məsələlərlə bağlı cəzalar burada əks olub. Amma çox təəssüf ki, 28-ci fəsildə göstərilən maddələrin tam əksəriyyəti Cinayət Məcəlləsinin “ölü maddə”ləridir. Yəni faktiki olaraq maddə var, amma işlək deyil. Həmişə Ekologiya və Təbii Sərvətlər Nazirliyinin fəaliyyət istiqamətlərinin qorunmasına, onların icrasına və sair toxunanda tənqidi münasibətlərimi bildirmişəm. Doğrudan da, bu gün Bakı şəhərinin mərkəzində ağaclar qırılır, yerində binalar tikilir. Məsələn, “Skaçka”nın yanında ağaclar qırılıb, yerində 7 mərtəbəli binalar inşa olunub. Eləcə də, Cənub bölgəsində ümumiyyətlə meşələrə, yaşıllıqlara qarşı soyqırım var. Lerik zonasında, Talış dağlarında meşələr qırılır. Bu gün “Beta” şirkəti orada hər hansı bir niyyətlə iş görmək istəyirsə, zərrə qədər də olsun ətraf mühitə və təbiətə zərər gətirməməlidir. Kimlərsə öz səlahiyyətlərindən istifadə edib həmin o şirkətin nizamnamədə göstərilən fəaliyyət istiqamətlərini həyata keçirmək üçün onlara meşə fondunda yer ayırmamalıdır.

Düzdür, ölkə başçısı hər zaman deyir ki, ölkənin sahibkarlarına mane olmaq olmaz, əksinə, onların fəaliyyətinə geniş meydanlar açmaq lazımdır. Amma sahibkarlar da, şirkətlər də bundan sui-istifadə edib ekoloji terrorla məşğul olmamalıdırlar. Bu, bilərəkdən törədilən cinayətlər tərkibinə daxildir. Burada ehtiyatsızlıqdan əsər-əlamət yoxdur. Yəni şəxs, şirkət bilərəkdən bunu edir. Əgər o, meşəni qırırsa və əlində baltası, kəsici alətləri varsa, bilə-bilə meşə zolağını məhv edir. Ona görə də, hesab edirəm ki, cəzalar sərtləşdirilməlidir. Cəzaların bir qədər də sərtləşməsinə ciddi ehtiyac var”-deyə Ş.Əliyev vurğuladı.

Ş.Əliyev onu da əlavə etdi ki, meşələrin qırılması su ehtiyatlarının tükənməsi, su mənbələrinin quruması deməkdir, bu isə böyük ekioloji fəlakətdən xəbər verir.

İradə SARIYEVA

1 -dən səhifə 102

Əlaqəli xəbərlər