“Azərbaycan Qarabağ separatçılarına 2 zərbə endirdi” – Rusiya Müdafiə Nazirliyi

Rusiya Federasiyası Müdafiə Nazirliyi Azərbaycanın Qarabağ bölgəsində müvəqqəti yerləşdirilmiş sülhməramlı kontingentinin bugünki fəaliyyəti haqqında məlumat bülleteni yayınlayıb.

araz.az xəbər verir ki, məlumatda ötən gün ərzində atəşkəsin bir dəfə pozulması qeydə olunub. Məlumatda deyilir: “11 avqust 2021-ci ildə, saat 7.29 və 7.58-də, Azərbaycan Silahlı Qüvvələri, EGCAOG-un 2 kilometr şimal-qərbindəki müşahidə məntəqəsi ərazisində, “Dağlıq Qarabağın silahlı birləşmələrinin” (?!) mövqeyinə zərbə tipli kvadrokopterlərdən istifadə edərək iki zərbə endirdi. Xəsarət alan yoxdur”.

Bildirilir ki, Rusiya sülhməramlı kontingenti komandanlığı vəziyyətin daha da gərginləşməsinin qarşısını almaq üçün tədbirlər görüb. Faktla bağlı araşdırma aparılır: “Rusiya sülhməramlı kontingentinin məsuliyyət zonasında baş verə biləcək insidentlərin qarşısını almaq üçün səyləri əlaqələndirmək üçün Azərbaycan və Ermənistan silahlı qüvvələrinin baş qərargahları ilə davamlı qarşılıqlı əlaqə saxlanılır.

Xatırladaq ki, dünən Azərbaycan Respublikası Müdafiə Nazirliyi bəyanatla çıxış etmişdi.

Bəyanat mətnində deyilir: 

10 noyabr 2020-ci ildə Azərbaycan Respublikası Prezidenti, Rusiya Federasiyası Prezidenti və Ermənistan Baş nazirinin imzaladığı üçtərəfli bəyanata uyğun olaraq, Ermənistan silahlı qüvvələrinin qalıqlarının tam şəkildə Rusiya Federasiyası sülhməramlı qüvvələrinin müvəqqəti yerləşdirildiyi Azərbaycan ərazilərindən çıxarılması təmin olunmamışdır.

Son günlər ərzində Ermənistanın üçtərəfli bəyanatı kobud şəkildə pozaraq, öz silahlı qüvvələrinin şəxsi heyətini Rusiya Federasiyası sülhməramlı qüvvələrinin müvəqqəti yerləşdirildiyi Azərbaycan ərazilərinə daşıması, Muxtarkənd, Şuşakənd məntəqələri yaxınlığında, eləcə də Kəlbəcər və Laçın rayonlarının inzibati hüdudlarının şərq istiqamətindəki ərazilərdə yeni erməni postlarını qoyması halları müşahidə olunur.
Azərbaycan Ordusu tərəfindən adekvat tədbirlər görülür və bu kimi hallara imkan verilmir.

Ermənistan tərəfi məqsədyönlü şəkildə vəziyyətin gərginləşdirilməsi üçün bu kimi təxribatlara əl atır.
Bütün bunlar Ermənistanın yeni müdafiə naziri Vaqarşak Arutyunyanın Ermənistan ordusuna bütün vasitələrdən istifadə edərək güc tətbiq etmək barədə verdiyi məsuliyyətsiz və təhrikçi əmrinin fonunda baş verir. Xatırlatmaq istərdik ki, Ermənistanın sabiq müdafiə naziri David Tonayan da “yeni müharibələr, yeni ərazilər” adlandırdığı təxribatçı hərbi doktrina ilə çıxış etmişdi. Onun rüsvayçı aqibəti hər kəsə məlumdur.
Azərbaycan Ordusu tərəfindən bütün adekvat tədbirlərin görülməsi təmin olunacaqdır.

Rusiya Federasiyası sülhməramlı qüvvələri üçtərəfli bəyanatın müddəalarına uyğun olaraq müvəqqəti dislokasiya olunduqları Azərbaycan ərazilərində Ermənistan silahlı qüvvələrinin yerləşdirilməsi hallarına son qoymalıdır.

 

araz.az xəbər portalı.

araz.az xəbər portalı.