rus yoxsul“Azərbaycan Mərkəzi Bankının sədrinin I müavini Alim Quliyev bildirib ki, milli valyutanın məzənnəsinin 2022-ci ildə də sabit saxlanılması üçün bütün imkanlar var. Tutalım, 2022-də sabit saxladız, 2023-də də saxlaya bildiz, bəs sonra?! Eyni səhvi 2005-2015-ci illərdə etdiz, sabit məzənnə rejimi ilə 10 il ölkə yaşadı, sonra nə oldu?! Əvvəl sabit məzənnəni qorumaq üçün bir ildə 12 mlrd. dollar xərclədiz, sonra gördüz mümkün deyil, 3 addımlı devalvasiyaya getdiz – manatı dollara qarşı əvvəl 1.05, sonra 1.55, ən son isə 1.70 manat təyin etdiz. İndi də 4 ildən çoxdur ki, sabit məzənnə rejimi ilə gedirsiz, məzənnə dəyişmir, amma manatın alıcılıq qabiliyyəti ölür“. 

araz.az xəbər verir ki, bu fikirlər Respublikaçı Alternativ Partiyasının (REAL) icra katibi, iqtisadçı ekspert Natiq Cəfərliyə məxsusdur.

İqtisadçı ekspert hesab edir ki, bu, ən azı elə devalvasiya qədər təhlükəli prosesdir: “Azərbaycan hökuməti statistikanı da, məzənnəni də siyasiləşdirib, manatın məzənnəsini siyasi sabitlik simvoluna çevirib. Yenə eyni səhvi edirlər. 2005-2015-ci illər dərs olmadı bu hökumətə, amma indiki proses daha təhlükəlidir. Manatın alıcılıq qabiliyyəti düşür, bir müddət sonra da məzənnəsi düşəcək, bu zaman ölkədə yoxsulluq səviyyəsi kəskin artacaq. Anlamırlar ki, məzənnə sadəcə iqtisadi göstəricilərdən biridir, məzənnə siyasəti ölkənin iqtisadi siyasətinin tərkib hissəsində olmalıdır, ayrıca bir simvol kimi dəyərləndirilə bilməz. Mən başa düşürəm ki, indiki primitiv “boru iqtisadiyyatı” modeli üzən məzənnəyə keçmək üçün yararlı deyil, hətta Elman Rüstəmov 2015-2017-ci illərdə, “biz üzən məzənnəyə keçmişik-keçirik-keçəcəyik”, deyirdi, sonra bu termini yadına da salmadı. Çünki üzən məzənnə normal bazar iqtisadiyyatı institutları olan ölkədə mümkündür, gərək valyuta qazanan minlərlə şirkət olsun, bazara onlar qazındıqları valyutanı çıxarıb manata çevirsinlər, həmin manatla maaş-vergi ödəsinlər, məhz bu zaman normal məzənnə siyasətini qurmaq mümkündür”.

Natiq Cəfərli əlavə edib ki, bizdə manat “kağız neftdir”, ancaq bir amildən asılıdır, hökumətin isə iqtisadi modeli yoxdur deyə məzənnəni sabitlik simvoluna çevirib buna sitayiş edirlər: “Sabitlik isə institutsional anlayışdır, qanunun aliliyi ilə ölçülür, iqtisadi instututlarla ayaqda qalır. Bizdəki sabitlik isə “borudan” asılıb sallanır”.

araz.az xəbər portalı.

araz.az xəbər portalı.