“QadınFest” platformasının təşkilatçılığı ilə, festival ikinci dəfə Bakıda

17, 18 və 19 iyun tarixlərində, QadınFest.az platformasının ikinci dəfə təşkil etdiyi qadın festivalı paytaxt Bakıda keçiriləcək. Bu barədə, təşkilatçı qurumdan araz.az-a daxil olan məlumatda bildirilir ki, tədbirin əsas məqsədi qadınlar üçün müxtəlif sahələr üzrə maraqlı spiker və ekspertlərin faydalı çıxışlarını dinləyə, master klasslarda iştirak edə, idman və rəqslə məşğul ola, yeni dostlar qazana və hər cəhətdən faydalı zaman keçirə biləcəklərinə mühit yaratmaqdır. Elə, buna görə də, bu dəfə festival mövzusu olaraq, təşkilatçılar, “Ailə və qadının ailədə rolu” başlığını seçiblər. Çünki ailə həyatın ən mühüm aspektlərindən biridir və bu və ya digər dərəcədə müasir qadınların həyatını müəyyən edir. Festival spikerlərinin çıxışlarında da, “evlilik münasibətləri”, “ailə və karyera”, “bütün ailə üçün sağlam həyat tərzi”, “nikahda münaqişələr”, “uşaqların doğulması və sonsuzluq” kimi bir çox mövzulara toxunulması nəzərdə tutulur. Məlumata görə, festivalda psixoloqlar, həkimlər, şəxsi inkişaf koçları, qida bloqerləri, stilistlər, biznes qurucuları və başqa sahələr üzrə fəallar iştirak edəcəkdir.
Məlumatda o da bildirilir ki, festival hibrid formatda təşkil olunub. Festivalda şəxsən iştirak edərək birbaşa suallar ünvanlamaq, master klasslarda iştirak etmək, həmçinin #qadinfest teqindən istifadə etməklə sosial şəbəkələrdən məlumatlanmaq mümkün olacaq.

Festival “Park Bulvar” ticarət mərkəzində, üç müxtəlif hissədə keçiriləcək. Birinci mərtəbədə çıxışlar və master klasslar ilə əsas səhnə planlaşdırılıb, dördüncü mərtəbədə yerləşən planetariumda da, müxtəlif sahələrdən spikerlər çıxış edəcək. Bu hissədə yerinizi rezerv etmək üçün, əvvəlcədən qeydiyyatdan keçərək, bu görüşlərə yazıla və istədiyiniz sualları şəxsən soruşa bilərsiniz (qeydiyyat forması: shorturl.at/emnHT) və Sağlamlıq Zonası sizi beşinci mərtəbədə gözləyir!
Məlumatda, keçən il, pandemiya ilə əlaqədar olaraq, festivalın tamamilə onlayn şəkildə keçirildiyi qeyd edilir. O da bildirilir ki, üç gün ərzində platformada Azərbaycan, Türkiyə, Rusiya və ABŞ-dan olan 100-dən çox spiker çıxış edib, 2 milyondan çox izlənmə əldə olunub. “Bu dəfəki festivala isə, bütün ailənizi gətirin! Sağlamlıq zonası üçün, idman formanızı gətirin, uşaqları götürün, çünki onlar üçün də maraqlı seminarlar olacaq. Həm də, shorturl.at/emnHT saytında spiker çıxışları üçün qeydiyyatdan keçin!

Məlumata görə, bu tədbirin tərəfdaşları və sponsorları sayəsində, festivalda iştirak pulsuzdur. Məlumatda bu festival platforması haqqında bunlar da bildirilir: QadınFest.az qadınlar üçün fürsətlər platformasıdır. Çox sadə və rahat formatda hazırlanmış platformada ideya ondan ibarətdir ki, burada qadınlar onlara faydalı resurslara çıxış əldə edə biləcək, onları maraqlandıran suallar vermək imkanı qazanacaq, özlərini yeni rollarda sınayacaq və yeni tanışlıqlar əldə edə biləcəklər. Platforma yaradıcılarının əsas prinsipi isə, qadınların faydalı resurslara bərabər çıxışını təmin etməkdir, buna görə də, platforma tərəfindən təşkil edilən tədbirlərdə qadınlar üçün iştirak həmişə pulsuz olacaq. Bundan əlavə, pandemiyanın başa çatması ilə, qadınlar üçün daha çox oflayn tədbirlərin təşkili planlaşdırılır.

araz.az xəbər portalı.

araz.az xəbər portalı.