Son günlər cəmiyyətdə ən çox müzakirə olunan mövzulardan biri də meyvə-tərəvəzin qiymətinin real dəyərindən baha olmasıdır.

Xüsusilə də mövsüm meyvələrini – alça, gilas, ərik qiymətinin 4-6 manata yaxın və ya daha yüksək olması insanların ciddi narazılığına səbəb olub. Bu barədə sosial şəbəkələrdə xeyli statuslara rast gəlmək mümkündür. Eyni zamanda mövsümü meyvələrin də qiyməti ötən illə müqayisədə bahadır.

Bazarda öyrəndik ki, qiymətlər ötən günlərlə müqayisədə bir qədər də bahalaşıb. Lakin alıcılar bir o qədər də gözə dəymirdi. Söhbət etdiyimiz alıcılar söylədilər ki, qiymətlərdən narazıdırlar. Bahalıq olduğu üçün normal alış-veriş edə bilmirlər.

Bəs görəsən, sənətçilər necə, bazar qiymətlərindən xəbərdardılarmı?

araz.az bildirir ki, mövzu ilə bağlı Yenisabah.az-a danışan aktyor Elməddin Cəfərov qiymətlərdən xəbəri olmadığını deyib:

“Bizdə bazarlığı oğlum edir, xəbərim yoxdur. Amma ilk başlartda çiyələk, alça çox baha idi. Vallah, açığı, mənim qiymətlərdən xəbərim yoxdur, ona görə deyə biləcək bir şeyim yoxdur, aydın məsələdir ki, mövsüm meyvələri çıxdıqda həmişə baha olub, satıcılar qiymətləri qaldırıb. Bu, 100 ildi belədir, 90-cı illərdə də çiyələk, alça çıxanda baha qiymətə satılırdı. Buna fərdi yanaşmaq lazım deyil. Bu, həmişə belə olub. Tənqid etsək də, düzəlmir”.

Əməkdar artist Sənubər İsgəndərli hər zaman bazarlığa özü getdiyini, qiymətlərdən şəxsən xəbərdar olduğunu qeyd edib:

”Həmişə yaz aylarında mövsüm meyvələrinin qiymətlərini qaldırıblar. Bu il isə həmişəkindən daha çox qalxıb. Amma buna baxmayaraq, keyfiyyət qalxmayıb, kaş keyfiyyət də qalxaydı. Bu gün marketlərdən alınan meyvələri alıb yemək olmur, bilinmir mənşəyi haradır, haradan gəlir… Meyvələrin keyfiyyəti mənşəyinə görə deyil. Amma qiymətlər çox qalxıb, əlbəttə ki, bu, büdcəyə uymur. Əvvəlki qiymətlərlə müqayisədə, əvvəl bu pula dolu zənbillərlə evə gəlirdiksə, indi eyni qiymətə heç yarım zənbil də dolmur. Bunu hamı bilir, gizlətməli bir şey yoxdur. Sosial  şəbəkələrdə bəzən yazırlar ki, məşhurların qiymətlərdən xəbəri yoxdur. Amma bu, qətiyyən, doğru deyil, şəxsən marketə də, bazara da mən özüm gedirəm, bu, düzgün deyil. Başqa məşhurların yerinə danışa bilmərəm, onları tanımıram, amma mən aktrisa olsam da evimizin bazarlığını özüm edirəm, köməkçim yoxdur. Mən hər zaman xalqın içindəyəm, niyə bilməməliyəm? Məgər mən bu xalqın içindən çıxmamışam?”.

araz.az  xəbər portalı.

araz.az xəbər portalı.