Əziz həmvətənlər, dəyərli oxucular, gözəl insanlar!  

Bu gözəl Günümüz, sevimli Bayramımız münasibəti ilə, bu dəfə Sizləri başqa bir tərzdə təbrikə hazırlaşırdıq. Təəssüf ki, yenə şeytan əməli buna imkan vermədi — hər iki bayram günlərimizin qapıları astanasına çataçatda bizlərə qanlı səmada baş verən yanğı dolu faciənin ağrısını yaşatdı. Təyyarə qəzasının dəhşəti ağır olsa da, bu faciənin içində olan, qorxub-çəkinmədən amansız ölümün üstünə gedərək, səmada əbədi və diri qalan, bir anın içində ruhları daim şad olacaq qəhrəmanlarımıza çevrilən
həmyerlilərimizin xarakter və iradə xüsusiyyətlərinə xas əməlləri bizim üçün təsəlliyə çevrildi.

Elə, bu təsəlli də, bizə imkan verdi ki, müxtəlif səbəblər ucbatından, planetin 5 qitəsində məskunlaşmış 50 milyondan çox soydaşımızın sarsılmaz birliyinin rəmzinə çevrilən Dünya Azərbaycanlılarının Həmrəylik Günü və Yeni təqvim ili münasibəti ilə, hər birinizi, doğma-yaxınlarınızla bərabər səmimi qəlbdən təbrik edək!

Bu əlamətdar bayram günlərində dövlətimizin və xalqımızın tərəqqisi naminə edəcəyiniz duaların Ulu Tanrı dərgahında qəbulunu, rəhbəri olduğunuz qurumun uğurlar dolu tərəqqisini arzulayır, Böyük Allahdan sülhün, əmin-amanlığın, qələbə sevincinin, müharibəsiz, münaqişəsiz və ədavətsiz günlərin ölkəmizin əbədi nailiyyəti, səadətin, xoşbəxtliyin, firavan həyatın, xeyir-bərəkət və ruzi dolu bol süfrələrin, sevinc dolu günlərin xalqımızın  qazancı olmasını diləyirik!

Dərin hörmət, ehtiram və səmimi duyğularla,

“Araz” Media Qrupunun (araz.az xəbər portalı) kollektivi adından

Hüseyn ƏZİZOĞLU,
təsisçi və Baş redaktor.

araz.az xəbər portalı.