mura5Müsavat Partiyasının və Milli Şuranın Koordinasiya Mərkəzinin həbsdə olan üzvü Tofiq Yaqublunun müdafiəsi üçün Azərbaycan Demokratiya və Rifah (ADR) Hərəkatının təşəbbüsü ilə Azərbaycan Ədalət Partiyasının sədri İlyas İsmayılov, Azərbaycan Xalq Partiyasının sədri Pənah Hüseyn, Azərbaycan Yüksəliş Partiyasının sədri Anar Əsədli, Haqq və Ədalət Partiyasının sədri Əli İnsanov, Milliyyətçi Demokratlar Partiyasının sədri İlyas Abdullayev, Ümid Partiyasının sədri İqbal Ağazadə, Vahid Azərbaycan Milli Birlik Partiyasının sədri Hacıbaba Əzimov, Vətəndaş və İnkişaf Partiyasının sədri Əli Əliyev, politoloqlar Ərəstun Oruclu və Hikmət Hacızadə Prezident İlham Əliyevə müraciət ünvanlayıblar.

Pravda.az-ın xəbərinə görə, müraciətdə deyilir:

Cənab Prezident,

Biz, bu müraciəti imzalayan siyasi partiya və hərəkat rəhbərləri rəhbərləri,  politoloqlar bildirirk ki, 22 mart 2020-ci il tarixində avtomobil qəzası zamanı baş vermiş “mübahisə”yə görə saxlanılaraq, haqqında 3 ay həbs qətimkan tədbiri seçilmiş Qarabağ qazisi,  Müsavat  Partiyasının üzvü Tofiq Yaqublu Bakı şəhəri Nizami Rayon Məhkəməsinin 3 sentyabr 2020-ci il tarixli  qərarı ilə Azərbaycan Respublikası Cinayət Məcəlləsinin 221-ci maddəsi ilə irəli sürülmüş ittiham üzrə təqsirli bilinərək, 4 il 3 ay müddətinə azadlıqdan məhrum edilmişdir.

Məhkəmə qapalı şəraitdə keçirildiyinə görə, vəkillərin verdiyi məlumat əsasında deyə bilərik ki, məhkəmə prosesi zamanı  nə onların,  nə də təqsirləndirilən şəxs olaraq Tofiq Yaqublunun vəsatətləri nəzərə alınmamış, eləcə də  istintaq məhkəməyə əsaslı sübut və dəlillər təqdim edilməmişdir. Buna baxmayaraq,  məhkəmə saxta şahidlərin  ifadələri əsasında  Tofiq Yaqubluya 4 il 3 ay azadlıqdan məhrumetmə cəzası vermişdir. Odur ki, biz bu müraciəti imzalayan siyasi partiyalar və hərəkatlar elan edilmiş məhkəmə hökmünü ədalətli hesab etmir, onun əsaslandırılmadan və qanunsuz qəbul olunduğunu bəyan edirik.

Ədalətsiz məhkəmə prosesinə etiraz edən Tofiq Yaqublu onun barəsində  çıxarılan hökmün ləğv edilməsi  tələbi ilə həbsxanada ölüm aclıq aksiyası keçirir. Aksiya 10 gündən çoxdur ki, davam edir və o, bu müddət ərzində heç bir qida qəbul etmir. Ailə üzvlərinin, vəkillərin və həkimlərin rəyinə görə, Tofiq Yaqublunun səhhətində ciddi problemlər yaranıb, onda halsızlıq, çəki azalması, ümumi zəiflik müşahidə olunur.  Bütün bunlar davam etdikcə Tofiq Yaqublunun həyatına təhlükə və risklər artır. Bunu həyəcanla izləyən ictimaiyyət, eləcə də bizim rəhbərlik etdiyimiz siyasi partiyaların və hərəkatların üzvləri, politoloqlar sizin Tofiq Yaqublunun işinin ədalətlə həll edilməsi üçün  müdaxilənizlə onun azadlığa buraxılmasını zəruri hesab edirik.

Tofiq Yaqublu 1992-93-cü illərdə Qarabağda Azərbaycanın ərazi bütövlüyü uğrunda döyüşlərdə ön cəbhədə vuruşmuş və şücaət göstərmişdir. O həyatının bütün dövrlərində dövlətçiliyə və milli maraqlara sadiqliyi ilə seçilmişdir.

Cənab Prezident,

Hesab edirik ki, vətəndaşların  hüquq və azadlıqlarının  qorunması üçün məhkəmə və ədliyyə  sistemində islahatların aparılmasına ehtiyac getdikcə artır. Biz fürsətdən istifadə edərək, onu da bəyan edirik ki, siyasi partiyalar olaraq bu sahədə  islahatların aparılması  prosesinə töhfə  verməyə hazırıq.

Biz, Tofiq Yaqublunun işini xüsusi nəzarətinizə götürməyə, onun işi ilə bağlı ən qısa zamanda apellyasiya məhkəməsi keçirilərək həbs qətimkan tədbirinin dəyişdirilməsinə çağırırıq.  Çağırışımıza diqqətlə yanaşacağınıza əminliklə əvvəlcədən təşəkkür edirik”.

Bu müraciət müxalifət cameəsində qalmaqala səbəb olub. Müsavat Partiyasının Məclis üzvü Mustafa Hacıbəyli deyib ki, Əli İnsanovun belə bir sənədə imza atacağı gözlənilməz olub.

araz.az

araz.az xəbər portalı.