Oqtay Əsədovun eks-kürəkəni London meri olmaq istəyir

Bu gün İngiltərə mediasında azərbaycanlı Kamran Balayevin London meri postuna namizəd olması barədə məlumat yayımlanıb. 39 yaşlı Kamran Balayevin namizədliyinin “Renew” partiyasından irəli sürüldüyü bildirilir.

“Qafqazinfo”nun əldə etdiyi məlumata görə, Kamran Balayev Milli Məclisin keçmiş spikeri, hazırkı deputat Oqtay Əsədovun sabiq kürəkənidir. Oqtay Əsədovun qızı Nərminə Əsədova Kamran Balayevlə 2002-ci ildə rəsmi nikaha girib. Onların evliliyi 10 il sürüb.

K.Balayev və O.Əsədov 2012-ci ildə mülk davalarına görə uzun müddət məhkəmə salonlarında çəkişiblər. Belə ki, Azərbaycanda Ədliyyə Akademiyasının rektor əvəzi və prorektoru olan Kamran Balayev O.Əsədovun qızından boşandıqdan sonra ailəsi ilə mübahisəli vəziyyətə gəlib. Çünki K.Balayev sabiq spikerin bir çox işlərinə nəzarət edib. O, həmçinin 2010-cu ildə parlament seçkiləri öncəsi Oqtay Əsədovun seçki qərargahının rəhbəri olub. 

Bu arada qeyd edək ki, 2012-ci ildə Nərminə Əsədova boşanma üçün müraciət edəndən sonra anası Zemfira Əsədova da Səbail rayon məhkəməsinə müraciət edərək Kamran Balayevə qarşı iddia qaldırmışdı. Əsədovlar ailəsi K.Balayevdən birgə nikah dövründə əldə olunan bütün əmlaklardan imtina etməsini və maddi təzminat ödəməsini tələb edirdi. Qanuna görə isə birgə nikahda əldə edilən, N.Əsədova ilə K.Balayevanın adına olan əmlaklar bölünməli idi. 

Məlumata görə, Oqtay Əsədov o zaman bir çox mülkünü də kürəkəninin adına keçiribmiş.

Daha sonra eks-kürəkənin ölkədən İngiltərəyə qaçdığı haqda məlumatlar da yayılmışdı. K.Balayev Kembric, Harvard Universitetlərində, Beynəlxalq Antikorrupsiya Akademiyasında və London İqtisadiyyat və Siyasi Elmləri Məktəbində təhsil alıb.

K.Balayev hazırda Londonda fəaliyyət göstərən “INTERNATIONAL RISK LTD” şirkətinin direktorudur.

O, 2010-cu ildə Azərbaycan Ədliyyə Nazirliyinin Beynəlxalq Əməkdaşlıq Departamentinin direktor müavini kimi Avropa Şurasında çıxış edib.

2011-ci il yanvarın 4-də K.Balayev və N.Əsədova cütlüyünün adına ofşor zonalarda “Stanway Management Limited” adlı şirkət də yaradılıb. 2013-ci il oktyabrın 31-də, yəni boşanmadan sonra şirkət fəaliyyətini dayandırıb.

araz.az

araz.az xəbər portalı.