Ötən il dekabr ayının 3-də Azərbaycan Respublikasının Prezidenti İlham Əliyevin “Azərbaycan Respublikasının “Diaspor fəaliyyətində xidmətə görə” medalının təsis edilməsi ilə əlaqədar “Azərbaycan Respublikasının orden və medallarının təsis edilməsi haqqında” Azərbaycan Respublikasının Qanununda dəyişiklik edilməsi barədə” Qanunu imzalaması, yəqin ki, hamının yadındadır. Qeyd edək ki, Azərbaycan Respublikası Prezidentinin 25.12.2019-cu il tarixli, 899 nömrəli Fərmanı ilə, “Diaspor fəaliyyətində xidmətə görə” medalı ilə təltif etmək səlahiyyəti isə, Diasporla İş üzrə Dövlət Komitəsinə verildi.
Elə, bundan sonra da, bu qurumun təqdimatı ilə, dünyanın bir çox ölkələrində yaşayan və Azərbaycanın diaspor siyasətinə böyük töhfələr verən yüzə yaxın həmyerlimizin “Diaspor fəaliyyətində xidmətə görə” medalı ilə təltif olunması barədə xəbərlər aldıq. Bu günlərdə də, Azərbaycan diasporunun fəaliyyətinə mühüm töhfələr verən bir qrup diaspor təşkilatı üzvlərinin və diaspor fəallarının bu medala layiq görülmələri ilə bağlı araz.az xəbər portalına daha bir məlumat daxil oldu.
Doğrusu, bu xəbər saytımızın bütün kollektivi üçün sevindirici oldu, lakin diqqətimizi bu medala layiq görülənlər arasında bəzi ölkələrdə diasporumuzun liderləri kimi özlərini qələmə verən və reputasiyası təmiz olmayanların adlarının yer aldığı çəkdi və bu, bizi çox təəccübləndirdi. Çünki bu “diaspor fəallarının” yaşadıqları ölkələrin Azərbaycan Respublikası ilə əlaqələrinin möhkəmləndirilməsində, beynəlxalq aləmdə Azərbaycanla bağlı obyektiv informasiyaların yayılmasında, eləcə də doğma dilimizin və mədəniyyətimizin xarici ölkələrdə təbliğində, doğma Vətənimizin beynəlxalq aləmdə ikitərəfli və çoxtərəfli əlaqələrinin inkişafında yaxşı mənada yadda qalası xidmət və rolları barədə, indiyədək, əlimizdə hansısa bir məlumatımız olmayıb.
Onlardan biri də, 15 ildən çoxdur ki, Rusiya Federasiyasının Samara vilayətindəki Azərbaycan diaspor təşkilatını əlindən buraxmayan və indiyədək ona heç bir uğur qazandırmayan Şirvan Kərimovdur. Haqqında çoxsaylı ölkə mətbuatı kimi, eləcə də bütün ölkələrdəki, ələlxüsus Rusiyadakı diasporumuzun işləri ilə daim maraqlanan bir mətbu orqan olaraq, araz.az saytı da nələr yazmayıb?! Bir sözlə, “Şirvan Kərimov kimdir?” sualına ətraflı cavab tapmaq üçün, araz.az-ın onun haqqında dərc etdiyi həmin yazıları oxumağınız kifayətdir. Onun iç üzünü açan əksər yazılarda, o, “sapı özümüzdən olan balta”, yarımədəni bir insan kimi təqdim edilib və xüsusi olaraq o vurğulanıb ki, Azərbaycan diasporu belələrindən yaxa qurtarmalıdır. Əks təqdirdə, heç bir hörmətli azərbaycanlı onun tutub, əlindən buraxmadığı Rusiya Azərbaycanlıları Liqasına gəlməyəcək. Çünki Samarada fəaliyyət göstərdiyi müddət ərzində Şirvan Kərimov yalnız intriqalar yaratmaqla, diasporumuzu parçalayan bir adam kimi yadda qalıb. Bir sözlə, diasporumuzun işinin normal inkişafına əngəl yaradan xaricdəki nüfuz sahibi olan soydaşlarımıza qarşı iyrənc planlar əsasında başladılan qəbuledilməz qarayaxma kampaniyaları, düşünülmüş şəkildə ortaya “səpilən qarşıdurma toxumları”, eləcə də ortadakı saysız-hesabsız intriqa və ədavətlər onun adına yazılıb. Onun bu əməlləri, həm də, düşmən “dəyirmanına su tökməkdən” betər bir biabırçılıq , milli diasporumuzun tarixinə qara ləkə vurmaq kimi qeyd olunub. Özünə, ailəsinə, xalqına sayğı duyan hər kəs, Şirvan Kərimovun belə bəd və murdar əməllərinə qarşı həmişə vaxtında reaksiya göstərib.
Həmin yazılarda o da xüsusi vurğulanıb ki, Şirvan Kərimov rəhbəri olduğu təşkilat adından, heç vaxt ölkəmizin haqlı mövqeyini müdafiə edib, erməni təxribatlarına bütün səviyyələrdə layiqli cavab verməyib. Bu azmış kimi, saxtakar erməni tarixçisinə Istinad etməklə, milli maraqlarımıza ciddi zərbələr vuran çıxışlar edib. Hətta erməni sevgisi hədsiz güclü olan Şirvan Kərimov Samarada buraxdığı “Ocaq” adlı mətbu nəşrdə Azərbaycan dövlətinin atributlarını, rəmzlərini, eləcə də məsul vəzifələrdə çalışan soydaşlarını təhqir etməkdən belə çəkinməyib. Millətimizin qatı düşməni, Ermənistan adlı murdar bir dövlətə bir vaxtlar rəhbərlik edən Serj Sarkisyanla sevinclə badə qaldıran da, elə, o, olub.
Bizim əsas məqsədimiz kimisə ittiham etmək, kimisə qaralamaq, kiminsə fəaliyyətinə kölgə salmaq deyil. Biz, sadəcə, onu demək istəyirik ki, reputasiyası təmiz olmayan bir təşkilat rəhbərinə Diasporla İş üzrə Dövlət Komitəsinin sədri Fuad Muradov niyə dəstək verir?! Maraqlıdır, Fuad Muradov kifayət qədər böyüklükdə olan Rusiyada Şirvan Kərimovdan başqa diaspor lideri tapmadı ki, həmin medalı ona versin?! Axı, bu adamı Samarada olan soydaşlarımızın heç biri lider kimi qəbul etmir. Özü də, o və əlində alətə çevirdiyi təşkilatı Vətən müharibəsi başlayan gündən, Azərbaycan Prezidentinin çağırışına cavab olaraq, dünya azərbaycanlıları ayağa qalxıb, Azərbaycana dəstək məqsədilə yürüş-mitinqlər keçirəndə də, soydaşlarımız tərəfindən müxtəlif beynəlxalq təşkilatlara, səlahiyyətli şəxslərə minlərlə bəyanat ünvanlananda da, dünyanın hər yerində diaspor fəaliyyəti və aksiyalarla bağlı müxtəlif dillərdə məlumatlar yayılanda da susmuşdu. Lakin açıq-aşkar göründüyü kimi, dövlətin ayırdığı vəsaitlər, mükafatlar görülən işə görə deyil, yaxınlığa, dostluğa və başqa şəxsi məqsədlərə yönəldilir.
Axı, diaspor da millətin ordusudur — Qarabağda tarixi zəfər çalan Milli Ordumuzun bir qoludur. Amma millətin və dövlətin xarici ölkələrdəki təmsilçisi olan bu ordu kimlərinsə əlində siyasi alətə çevrilməməlidir.
Özünüz deyin, Azərbaycanın Samara boyda böyük bir vilayətdəki diasporunun taleyi ilə oynayan və Rusiya Azərbaycanlıları Liqası adı altında milli maraqlarımız əleyhinə getməkdən çəkinməyən, diasporumuzun imicinə yalnız böyük ziyanlar vuran bu şəxs medala layiqdir, yoxsa cəzaya?! 
Məhi ELSEVƏR,
araz.az xəbər portalının xüsusi müxbiri
araz.az xəbər portalı.
Rusiya Müsəlmanları İdarəsinin QƏRAR-ı: 4-ə QƏDƏR ARVAD ALMAQ OLAR
Çoxarvadlılığa icazə verilməsinə reaksiyalar: “Heç bir dini qərar və ya sərəncam qanundan yuxarıda dura …
