“Moskva üçün 200 illik “Ermənistan” layihəsi aktuallığını itirdi” – SABİQ NAZİR

Tofiq Zülfüqarov: “Artıq Ermənistan-Azərbaycan münaqişəsi bölgədə vəziyyəti idarə etmək üçün bir vasitə deyil”

Ermənistandakı seçkilər göstərdi ki, ermənilər Rusiyaya istiqamətlənmiş inkişaf vektorundan beziblər. Bunu AYNA-ya açıqlamasında Azərbaycanın keçmiş xarici işlər naziri, politoloq Tofiq Zülfüqarov deyib.

Onun fikrincə, bu seçkilər bir neçə il əvvəl başlayan, bölgənin yenidən geosiyasi istiqamətləndirilməsində bir mərhələdir: “Paşinyanın hakimiyyətə gəlməsi, erməni cəmiyyətində Rusiyanı tərk edərək, Qərb istiqamətində inkişaf etmək istəyinin formalaşması prosesi başladı və ayrıca, Ermənistanı Rusiya ilə birləşdirən “miatsum” kimi layihələr iflasa uğradı. Bu seçkilər Ermənistanın Qərbə yönəlmə kursunun davam edəcəyini göstərdi”.

Ekspert bölgənin münaqişələr yaratmaqla idarə olunması ənənəsinin dayandırıldığı və yeni bir inkişaf mərhələsinin gəldiyindən əmindir: “Bu vasitənin effektivliyini itirdiyini görmək olur. Üstəlik, keçən ilki kapitulyasiyaya baxmayaraq, erməni cəmiyyətinin Köçəryan və Sarqsyanın şəxsiyyətindəki revanşizm fikrini dəstəkləmədiyini görürük. Buna əsasən, Ermənistandakı seçkilərdən əvvəl Qərbin taktiki gedişləri ilə, yəni diversantların minalanmış ərazilərin xəritələrinə dəyişdirilməsi ilə erməni seçicisinin etimadını qazana bildiyi qənaətinə gələ bilərik. Və bu iş nəticə verdi”.

“Amma yavaş-yavaş bu mövzu da boşa çıxacaq və bunun çərçivəsində qarşıdurmanın arxa plana keçməsi üçün səylər göstəriləcək. Reallıq budur ki, Ermənistan-Azərbaycan münaqişəsi artıq vəziyyəti idarə etmək üçün bir vasitə deyil”, – deyə Zülfüqarov vurğulayıb.

Sabiq nazir hesab edir ki, Ermənistan dövlətinin gələcəyini Qərblə bağlamaqdan başqa alternativi yoxdur: “Cənubi Qafqazdakı Rusiya İmperiyasının iki yüzillik “Ermənistan” layihəsi Rusiya üçün tamamilə aktuallığını itirdi. Bu bahalı layihənin maddi cəhətdən də dəstəklənməsi lazımdır. Moskvanın Ermənistana olan marağının, bazalarla bağlı bütün danışıqların və s. aktuallığını itirdiyini görürük – bunlar qəzet məqalələri üçün yaxşıdır. Əsl mənada Rusiyanın Ermənistanda bir işi yoxdur. 2000-3000 kilometr mənzilli “İsgəndər” raketinin buraxılış qurğusunun harada yerləşməsinin nə fərqi var? Bütün bunlar mənasını itirib”.

“Digər tərəfdən, iqtisadi və sivilizasiya baxımından daha güclü olan Qərb Ermənistanı dövlətləri idarəetmə üçün koordinat sisteminə daxil etməyin əleyhinə deyil. Ermənilər bunun üçün iqtisadi üstünlüklər alacaqlarını başa düşürlər. Bu, dövlətlərini qorumağın, fəlakət həddinə çatan demoqrafik situasiyanın və iqtisadi çöküşün qarşısını almağın yeganə yoludur. Bunun sadəcə alternativi yoxdur. Rusiya müharibə zamanı onlara dəstək vermədi və onlar üçün Moskva olmadan özlərinin Qarabağın ilhaqına nail ola bilməmələri artıq açıq-aydındır. Onlar anlayır ki, Moskva üçün Azərbaycanı itirmək çox bahalı bir zövq olardı. Buna görə də ermənilər fərqli bir inkişaf yolu ilə getməyə qərar verdilər”, – deyə analitik fikrini yekunlaşdırıb.

araz.az xəbər portalı.