Şirvan MERO-nun təzə rəisi Anar Cəfərov “köhnə bazara təzə NIRX” qoyur…- Yeni rəis “köhnə makler”ləri “təzələyib” və qiymətləri qaldırıb ?

Məlumdur ki, Daxili İşlər naziri, general-polkovnik Vilayət Eyvazov Baş Dövlət Yol Polis İdarəsinin (BDYPİ) Şirvan şəhərində yerləşən 4 saylı rayonlararası qeydiyyat-imtahan və texniki baxış şöbəsinə (“MERO”) yeni rəis təyin edib. 

Yeni rəis  polis polkovnik-leytenantı Anar Cəfərov bu təyinatadək BDYPİ-nin qeydiyyat-imtahan idarəsində çalışıb.
Belə demək mümkündürsə  Anar Cəfərov  qeydiyyat-imtahan məsələsində “böyük staja” malikdir. 
Öncə  “MERO”  dediyimiz qurumlarda baş  verən problemlərə nəzər salaq. 
Bu qurumda  sürücülük vəsiqəsi almaq istsəyənlər mütləq  “prava maklerləri” ilə sövdələşməlidir…
Düzdür, ölkədə korrupsiyaya qarşı ciddi  mübarizə gedir, amma  MERO-larda bu hiss olunmur. Yəni MERO-lar köhnə qayda ilə işlərinə  davam edirlər. Rüşvət vermədən “prava” almaq müşkül məsələdir. 
“Prava maklerləri”  isə  özlərinin keflərinə  uyğun olaraq qiyməti 1300 manat, bəzən 1400 manat, hətta 1500 manat müəyyən edirlər. Bu məsələdə kənar şəxs ola bilməz. Maklerlər hamısı  “MERO” rəisinin öz inandığı, etibar etdiyi şəxslərdir. Hətta rayonların “MERO” rəisləri dəyişəndə “maklerlər” də dəyişir və “yeni komanda” yaranır.  Bu “bazarlıq” vətəndaşlarda ciddi narazılıq yaradır. 
Hətta konkret şikayətçilər var ki,  sualları cavablandırsa da ona sürücülük vəsiqəsi verilmir. Bu MERO-ların qızıl qaydasıdır. 
Digər bir şikayətçi isə qeyd edir ki, mən pul vermədiyimə görə, suallara cavab vermək üçün  istədiyim kompüteri seçə bilmərəm. Mütləq MERO əməkdaşının dediyi kompüterin arxasında əyləşməliyəm. Və imtahandan kəsilməliyəm. Yəni kompüter-filan boş şeydir, pulunu ver, “prava”nı al. 
Digər şikayətçi  qeyd edir ki, sənədlər yığılır, arasındakı pulla bərabər MERO rəisinin kabinetinə aparılır. 
Bunlardan əlavə MERO-larda maşınların  texniki baxışı üçün rüşvət alınır. Eyni zamanda öz avtomobili üçün nömrə almaq istəyən vətəndaşlardan  dövlət rüsumundan əlavə  rüşvət də alınır. Bahalı nömrələr isə öz yerində. 
Bir sözlə, ölkədə korrupsiyaya qarşı mübarizə gedir, MERO-larda isə  rüşvət və korrupsiya çiçəklənir. 
Şirvan MERO-nun yeni rəisinə gəldikdə isə yuxarıda əbəs yerə qeyd etmədik ki, Anar Cəfərov  qeydiyyat-imtahan məsələsində “böyük staja” malikdir. 
Məlumatlı mənbənin ”Gündəlik Bakı”ya  dediyinə görə, yeni rəisi gələn kimi köhnə  “prava  makler”lərini “təzələyib”, qiymətləri qaldırıb. Yəni KÖHNƏ HAMAM TƏZƏ TAS...
Təzə rəis özü ilə bərabər 4 saylı Şirvan MERO-ya təzə qaydalar gətirib. Atalar demişkən, köhnə bazara təzə NIRX qoyub.

 

 

araz.az xəbər portalı.

araz.az xəbər portalı.