“Xalça sənəti – mənaların təkamülü” sərgisində kurator ekskursiyası

Azərbaycan Milli Xalça Muzeyinin mətbuat xidmətindən araz.az-a daxil olan məlumata görə, iyulun 8-də Tatarıstan Respublikasında “Kazan Kremli” Muzey-Qoruğunda “Xalça sənəti – mənaların təkamülü” sərgisi ictimaiyyət üçün açıldı.

Sərginin ilk günündə Azərbaycan Milli Xalça Muzeyinin direktoru Şirin Məlikovanın mühazirəsi və kurator ekskursiyası təşkil olundu. Şirin xanım qonaqlara ilk öncə dünyada ilk xalça muzeyinin yaranması, müasir dövrdə fəaliyyət istiqamətləri, kolleksiyaları haqqında məlumat verdi.

Daha sonra o, sərginin konsepsiyasını, eksponatların seçim prinsiplərini, bununla da nəyi hədəflədiyini nəzərə çatdırdı. Ş.Məlikova təqdim olunan XIX əsrin sonu – XX əsrin əvvəllərində toxunmuş ecazkar klassik xalça nümunələrinin tarixi, ornamentlərin semantikası, rəng tərtibatı və texniki xüsusiyyətlərindən danışdı.

Azərbaycan xalçaçılıq sənətinin davamlı olaraq qədim ənənələri itirmədən inkişaf etdirildiyini, həmçinin yeni yanaşmalarla zənginləşdirildiyini vurğuladı. Müasir rəssamlardan Çingiz Babayevin də məhz qədim sənətkarlığı yeni yollarla inkişaf etdirən əsərlər yaratdığını diqqətə çatdırdı. Onun Azərbaycan xalçaçılıq ənənələrini təhrif etmədən yaratdığı müasir sənət nümunələrindən, onların daşıdığı fəlsəfi mənalardan bəhs etdi.

Qeyd edək ki, 10 və 11 iyul tarixlərində saat 12:00-da sərgi çərçivəsində ailə proqramı da təşkil olunacaq.
“Xalça sənəti – mənaların təkamülü” sərgisi sentyabrın 5-dək davam edəcək.

 

araz.az xəbər portalı.

araz.az xəbər portalı.