Berdıməhəmmədov qırıcının sükanı arxasında – Video

Türkmənistan prezidenti, vaxtaşırı olaraq gah xüsusi təyinatlı geyimində döyüş bacarıqları nümayiş etdirən, gah velosipedlə hərəkətdə olarkən hədəfə tapançadan atəş açan, gah özünün layihələndirdiyi yarış maşınında sürət yarışına çıxan Qurbanqulu Berdıməhəmmədov bu dəfə hərbi təyyarə sürüb.

araz.az Virtualaz.org-a istinadən xəbər verir ki, Berdıməhəmmədov Türkmənistan silahlı qüvvələrinin sərəncamına yeni daxil olan döyüş təyyarələri, onların xarakteristikaları ilə tanış olub. Və təyyarələrdən birini idarə edib.

Bu “yeni və müasir” döyüş təyyarələrinin markası haqda məlumat verilmir. Amma kadrlardan görünür ki,söhbət İtaliyanın istehsalı olan M-346FA təlim-döyüş təyyarəsindən gedir.

Berdıməhəmmədov hərbi aerodroma velosipedlə gəlib . Bildirilir ki, Dövlət Təhlükəsizlik Şurasının katibi Ç.Amanov prezidentə müasir texnikanın özəllikləri haqda məlumat verib. Raportu qəbul edən Türkmənistan prezidenti hərbi aviatexnika ilə tanış olub. Berdıməhəmmədova təyyarənin avadanlıqları, onun təyinatı barədə məruzə ediblər. Türkmənistan prezidenti hərbi təyyarələrin texniki xarakteristikası ilə bağlı çertyojlarla tanış olub və görünür bu tamamilə kifayət edib ki, heç bir pilot təhsili olmasa da (Berdıməhəmmədov ixtisasca diş həkimidir) o, təyyarəni idarə etsin.

Berdıməhəmmədov çertyojlarla tanış olduqdan sonra xüsusi kostyum geyinib, tam hərbi pilot təchizatında yeni hərbi təyyarənin şturvalı arxasına keçib və onu sınaqdan keçirməyi qərara alıb. Bildirilir ki, maşını hərəkətə gətirməzdən əvvəl dövlət başçısı belə hallar üçün nəzərdə tutulmuş bütün hərəkətləri diqqətlə yerinə yetirib.

Bir neçə dəqiqə sonra reaktiv mühərriklər işə düşüb və təyyarə Berdıməhəmmədovun idarəetməsində havaya qalxıb. Bildirilir ki, bu təyyarələr ani olaraq kursu dəyişə və nümayişkarənə kəşfiyyat uçuşları keçirə bilər. Səsdən iti sürətlə uçan təyyarədə uçan Berdıməhəmmədov onunla bir neçə viraj da həyata keçirib. Və deyildiyi kimi, təyyarəni rəvan şəkildə yerə endirib.

Əlbətdə, toplaşanlar hamısı, o cümlədən müdafiə naziri B.Gündoğduyev Ali baş komandanı uğurla həyata keçirilmiş sınaq uçuşuna görə təbrik edib alqışlayıblar. Müdafiə naziri xahiş edib ki, Berdıməhəmmədov geydiyi pilot formasını paytaxt Aşqabadda tikilməkdə olan Berdıməhəmməd Annayev adına hərbi muzeyə hədiyyə etsin. Türkmənistan prezidenti bu təklifi bəyənib.

 

[bt_youtube url=”‘https://www.youtube.com/embed/f51lG_SH_kI'” width=”600″ height=”400″ responsive=”yes” autoplay=”no”][/bt_youtube]

 

araz.az xəbər portalı.

araz.az xəbər portalı.