“Türk Yıldızları” Bakı səmasında uçuşlar keçirəndə hamımız sevincdən ağlayırdıq”

26 iyunda keçiriləcək hərbi paradda türk hərbçilərinin də iştirak edəcəyi ilə bağlı yayılan xəbərlər cəmiyyətdə böyük sevinclə qarşılanmaqdadır.

Moderator.az-a açıqlamasında buna münasibət bildirən BAO başqanının ideoloji məsələlər üzrə müavini, AMEA-nın Tarix İnstitutunun aparıcı elmi işçisi, tanınmış tarixçi-pedaqoq Dilavər Əzimli məlum olayların Cümhuriyyət dövrünü yada saldığını vurğuladı:

“Artıq neçə gündür ki, Silahlı Qüvvələrimizin yaradılmasının 100 illiyi ilə bağlı keçiriləcək parada hazırlıq məsələlərini az da olsa izləyə bilirik. Çalışdığımız AMEA-nın binasından göylərimizdə uçan hərbi uçaqlarımızı fəxrlə izləyirik. Bu hələ parada hazırlıqdır. İnşallah biz ayın 26-da daha dərindən izləyəcəyik.

Şəxsən mən qürur duyuram. Biz, SSRİ dağılanda Azərbaycan əsgərinin milli paltar geyməsini görəndə gözümüz yaşarırdı. İndi necə güclü ordumuz vardır. Əminik ki, bu ordu bir zaman İrəvana qədər ərazilərmizi yenidən qaytaracaq və Bütöv Azərbaycanın yaradılmasında sözünü deyəcəkdir.

Keçiriləcək hərbi paradda qardaş Türkiyə ordusundan bir qrupun iştirakı bizi çox sevindirdi. Sanki 1918-ci il dövrü təkrar olunur. Məhz, o zaman qardaş Türkiyə ordusu Azərbaycan ordusu ilə birlikdə Bakı şəhərini erməni-rus hərbi birliklərindən xilas etdi. Zaman bizim xeyrimizə işləsəydi, biz birlikdə bütün Qafqaza sahib olacaqdıq. İndi təsəvvür edin ki, 100 ildən sonra bu iki ordu birlikdə keçiriləcək paradda iştirak edəcəkdir. Bundan böyük sevinc hissi varmı?

Bu, həm də bu gün ərazimizi özünün havadarları hesabına işğal altında saxlayan erməni daşnaklarına bizim gücümüzü göstərməkdir. Tam əminəm ki, bir gün qardaş Türkiyə və Azərbaycan ordusu Azərbaycanın ərazi bütövlüyünü təmin edəcək və regionda söz sahibinə çevriləcəklər. İnanın ki, qardaş Türkiyədən hərbiçilərin bu paradda iştirakı mənim üçün ən sevincli anlardır. Yadınızdadır, İran İslam Respublikası Xəzərin sularında bizim sərhədlərimizi pozanda və Rusiyanın bizə təhdidləri artanda “Türk Yıldızları” Bakı səmasında uçuşlar keçirdilər. “Azadlıq” meydanı minlərlə insanla dolu idi. Hamı sevincdən ağlayırdı. İndi də bu anları yaşayacağıq. Bizə bu anları yaşadanlara da dərin minnətdarlıq edirik!!!”

Seymur Əliyev

araz.az xəbər portalı.