“AzerGold” Qapalı Səhmdar Cəmiyyətinin Korporativ Sosial Məsuliyyət Komitəsinin (KSM),

Göygöl rayonunun Tülallar kəndinin sakinləri ilə, növbəti görüşü keçirilib. Bu barədə, Cəmiyyətdən araz.az-a daxil olan məlumata görə,

“AzerGold” QSC-nin cari ildən hasilat işlərinə başladığı “Tülallar” mədəninin yaxınlığında yerləşən eyniadlı kəndin sakinləri ilə görüşdə, sosial ehtiyacların müəyyənləşdirilməsi və gələcəkdə icrası nəzərdə tutulan təşəbbüslərlə bağlı müzakirələr aparılıb. Görüşdə kənd sakinlərinə “Tülallar” qızıl mədəninin istismar planı barədə məlumat verilib. Bildirilib ki, SSRİ dövründə kəşf edilmiş, lakin geniş tədqiq edilməmiş, Səhmdar Cəmiyyətin fəaliyyəti nəticəsində ehtiyatları təsdiqlənərək, dövlət balansına alınmış “Tülallar” qızıl yatağının resurslarının emalı prosesi Daşkəsən rayonunda, Çovdar İnteqrəolunmuş Regional Emal Sahəsində (ÇİRES) həyata keçirilir.

Bu məqsədlə “Tülallar” mədənindən ÇİRES istiqamətində yaşayış məskənlərindən maksimum kənar olmaqla, ən qısa nəqliyyat əlaqəsinin təmin edilməsi üçün, QSC-nin sifarişi əsasında ümumi uzunluğu 23 km olan Tülallar-Zurnabad-Gəncə qəsəbəsi, Kərəmli kəndətrafı, Quşçu kəndətrafı avtomobil yolları inşa edilib. Nəticədə, Göygöl rayonunun Tülallar kəndi ilə, Daşkəsən rayonunun Çovdar kəndi arasında yol məsafəsinin 80 km-dən 50 km-dək qısaldılmasına nail olunub.

Məlumatda o da bildirilir ki, istifadəyə verilən yeni yol təkcə mədən və istehsalat sahəsi arasında nəqliyyat əlaqəsini yox, həm də vətəndaşların daha rahat gediş-gəlişini təmin etməkdədir.
Qeyd olunub ki, “Tülallar” mədəninin istismara verilməsi bölgədə məşğulluğun artırılması, ölkəmizin qeyri-neft sektorunun inkişafı, Göygöl rayonunun əhalisinin rifah halının daha da yaxşılaşdırılması baxımından vmühüm töhfələr vəd edir. Artıq fəaliyyətə cəlb edilən yerli sakinlərin timsalında bunun müsbət təsirlərinin hiss olunduğu diqqətə çatdırılıb.


Daha sonra yerli əhali və icmalarla iş prioritetləri çərçivəsində icra edilməkdə olan layihələr haqqında məlumat verilib. Bildirilib ki, hasilat sahələrinin yaxınlığında yerləşən kəndlərin sakinləri, mütəmadi olaraq, ətraf mühitin mühafizəsi, təhsil, sağlamlıq, məşğulluq, sahibkarlığın təşviqi və s. istiqamətləri üzrə icra edilən layihələrdən faydalanırlar. Bölgədə yaşayanların, xüsusilə də, sosial baxımdan həssas əhali qrupuna aid edilən ailələlərin qayğı ilə əhatələnməsinə xidmət edən bu cür layihələr sosial xarakterli dövlət proqramlarına töhfə vermək məqsədi daşıyır.

Məlumatda o da qeyd olunub ki, görüşdə daha sonra, kənd sakinlərinin müraciətləri dinlənilib, yeni təşəbbüslərlə bağlı fikir mübadiləsi aparılıb. Vətəndaşların qaldırdıqları məsələlərin araşdırılması və mövcud qanunvericilik çərçivəsində həll edilməsi məqsədi ilə, qeydiyyata alınıb.

Məlumatın sonunda bildirilir ki, Cəmiyyət tərəfindən hədəf qruplarına yönəlmiş təşəbbüs və layihələr çərçivəsində, kənd sakinləri ilə, ənənəvi görüş və sorğuların təşkili davam etdiriləcək.

araz.az xəbər portalı.

araz.az xəbər portalı.