Sabiq icra başçısının Saydın Həsənova qarşı etdi(rdi)yi haqsızlıqların kökündə nələr durub? – ŞİKAYƏT

“Elman Allahverdiyev həddən artıq spirtli içki qəbul etdiyindən, tədbirdə çıxış edə bilmədi”

Bu yaxınlarda redaksiyamıza Bakı şəhəri, Nəsimi rayonu, İmran Qasımov küçəsi, ev, 34 ünvanında qeydiyyatsız yaşayan Saydın Əli oğlu Həsənov tərəfindən şikayət xarakterli müraciət daxil olub. Müraciət müəllifi öncə sovetlər dönəmində müxtəlif rəhbər vəzifələrdə işlədiyini, hətta seçkili orqanlarda təmsil olunduğunu da yazır. Bir sözlə, bütün vaxtlarda dövlətimizə və xalqımıza xeyir verən vətəndaşlardan olduğunu qeyd edir: “Hal-hazırda işsizəm və 22 il bundan öncə üz-üzə qaldığım haqsızlığın, ədalətsizliyin bu gün də ağrı-acısını çəkməkdəyəm.

Belə ki, Tərtər rayonunun sabiq icra başçısı Elman Allahverdiyev və adı çəkilən rayonun Mamırlı kənd ərazi vahidliyi üzrə icra nümayəndəsi Şikar Əliyev mənə maddi və mənəvi cəhətdən zərər vurublar. Yəni, 1995-ci ildə Elman Allahverdiyevin tapşırığı əsasında, rayonun Füzuli Qəhrəmanov adına kolxozunun 380 ha sahəsində şəxsi vəsaitim hesabına taxıl səpini həyata keçirdim. Bu günə kimi ona dəfələrlə müraciətlər etsəm də, taxıl səpininə çəkdiyim xərci sabiq icra başçısından heç cür ala bilmirəm. Elə ki, vaxt tamam oldu və taxıl səpini yekunlaşdı, o halda Elman Allahverdiyev müavini Fəxrəddin Haqverdiyevin vasitəsilə işdən çıxmağımla bağlı ərizə yazmağı mənə çatdırdı. Belə bir şərtin qarşılığında təkid edib, taxıl səpininə xərclədiyim vəsaiti ondan tələb etdim və işdən çıxmaq barədə ərizə yazmadım. Belə olan halda o, məni susdurmaq məqsədilə 23 noyabr 1995-ci il tarixdə qanunsuz olaraq kolxoz sədri vəzifəsindən çıxartdı və atdığı addımı ilə ürəyi soyumadı, hətta məni həbs etdirmək qərarına da gəldi. Bu məqsədlə təsərrüfatın üçillik sənədlərini Tərtər rayon Prokurorluğuna təqdim etdirdi ki, haqqımda nələrisə sübuta yetirə bilsin. Aparılan araşdırmalar zamanı prokurorluq əməkdaşları mənimlə bağlı hər hansı qanunsuzluğu aşkar edə bilmədilər.
Onu da bildirim ki, həmin vaxtlarda nə qədər təzyiqlə, nə qədər hədə-qorxu ilə üz-üzə qalsam da, heç bir halda işdən çıxmağımla bağlı ərizə yazmadım. İşdən çıxarılmağım adımdan yazılmış saxta ərizə əsasında mümkün oldu. Bütün bunlardan əlavə, Füzuli Qəhrəmanov adına kolxozun 1995-ci ilə aid sənədləri Elman Allahverdiyevin göstərişi ilə arxivdən yoxa çıxarıldığından, bu gün həmin ilə dair hər hansı sənəd-sübut yoxdur. Həmin ilə dair sənədlər yox edildiyindən, mənə 1995-ci ilə aid pensiya hesablanmayıb. Guya ki, mən həmin il işləməmişəm və hər hansı əmək fəaliyyəti ilə də məşğul olmamışam. Bu günə kimi üz-üzə qaldığım haqsızlıqlarla bağlı aidiyyəti qurumlara dəfələrlə müraciətlər ünvanlasam da, təəssüflər olsun ki, müraciətlərimə qanuna müvafiq qaydada baxan olmayıb. Bu cür yanaşmanın varlığı da, məni olduqca incidən hallardır.
Bundan əlavə onu da bildirim ki, 1995-ci ildə hərbi tədbirin keçirilməsi ilə bağlı qabaqçıl kolxoz sədri olaraq mən də Tərtərin Evoğlu kəndinə dəvət olunmuşdum. Tədbirdə rayonun sabiq icra başçısı Elman Allahverdiyev, hərbi hissə komandiri polkovnik Kərim Vəliyev, Gürcüstan Respublikasıdan qonaq gəlmiş tanınmış jurnalist Tatyana Çaladze və digər vəzifəli şəxslər də iştirak edirdilər. Yığıncağın sonuna qədər Elman Allahverdiyev həddən artıq spirtli içki (araq) qəbul etdiyindən, o, tədbirin gedişi zamanı çıxış edə bilmədi. Sabiq icra başçısının belə bir vəziyyətini görən Kərim Vəliyev əsəbləşdi və ona bildirdi: “Bu nə vəziyyətdir, dur ayağa, rayonu təmsil et” desə də, Elman Allahverdiyev oturduğu yerdən ayağa qalxa bilmədi. Çox keçmədi ki, o, üzünü mənə tutaraq: “Həsənov dur ayağa, əvəzimdən rayonu sən təmsil et!” — dedi. Mən ayağa qalxıb ətraflı çıxış etdim və tədbir iştirakçıları tərəfindən alqışlarla qarşılandım. Elə həmin gündən də mənim “qara günlərim” başlandı. Yaramaz hərəkətinə görə ürəyinə işdən çıxarılması haqda qorxu-xofu düşən Elman Aliahverdiyev, çox keçmədi ki, mənə qarşı paxıllıq etməyə başladı. (22 ildə çəkdiyim bütün əzab-əziyyətlərin səbəbi, məhz Elman Allahverdiyevin mənə qarşı etdiyi haqsızlığı və paxıllığı olub) Bu gün ictimaiyyət bilməlidir ki, həmin vaxtlar Elman Allahverdiyev məni özünə rəqib gördüyündən, o, mənə qarşı daim paxıllıq etmiş və barəmdə bir çox haqsızlıqlara qol qoymuşdur. O, məni qanunsuz olaraq işdən azad etdikdən sonra, hətta iş yerimdə əmək kitabçamı da yoxa çıxardılar. Nə qədər çalışsam da, Elman Allahverdiyevin əvəzimə sədr qoyduğu və ixtisasca ədəbiyyat müəllimi olan Baxşeyiş Məmmədovdan və 2018-ci ilin fevral ayında dünyasını dəyişmiş icra nümayəndəsi Şikar Əliyevdən heç cür əmək kitabçamı əldə edə bilmədim.
Üç il işsiz qaldıqdan sonra düçar olduğum çətinliklərə dözə bilməyib iş axtarmaq məqsədiiə Bakı şəhərinə üz tutdum və mərhum icra nümayəndəsinə dedim ki, artıq bu cür haqsızlıqlara dözə bilmirərəm. Ona görə də iş axtarmaq məqsədilə Bakı şəhərinə getmək məcburiyyətindəyəm, yaxşı olar ki, əmək kitabçamı verəsiniz. Belə olan halda mərhum Şikar Əliyev əmək kitabçamın “dubiikat”ını hazırlayıb yazdı və onu mənə verdi. Artıq bu cür haqsızlıqlardan bezdim və 15 sentyabr 1998-ci ildə doğulduğum və yaşadığım Mamırlı kəndini tərk edərək, iş axtarmaq məqsədilə Bakı şəhərinə gəlməyə məcbur oldum. Buna da əsas səbəb, sabiq icra başçısı Elman Allahverdiyevin mənə qarşı dəfələrlə çirkin addımlarını (şərlənmələrini) atması oldu. Onu da bildirim ki, 1998-ci il sentyabr ayının 15-dən 2015-ci mart ayına kimi Bakı şəhərinin bazarlarında, ələlxüsus “Yaşıl Bazar”da xırda alverlə məşğul olaraq övladlarımı birtəhər saxlaya bildim.
1994-cü ilin dekabr ayının 23-də Prezident Aparatı Təşkilat şöbəsinin dəvəti ilə Respublika Sarayında aqrar islahatların aparılmasına həsr olunmuş Respublika toplantısında iştirak etmişəm. 1995-ci ilin aprel-may aylarında Yerli İslahat Komissiyasının üzvü olmuşam. Amma, Yerli Aqrar İslahat Komissiyasının sədri olmuş və Mamırlı kənd ərazi vahidliyi üzrə icra nümayəndəsi vəzifəsini daşımış mərhum Şikar Əliyev, Elman Allahverdiyevin barəmdə qol qoyduğu haqsızlığa baxaraq heç bir əsas olmadan məni islahat komissiyasının üzvlüyündən kənarlaşdırdı. Beləliklə, Yerli Aqrar İslahat Komissiyasının sədr müavini olaraq islahatda iştirak etməyimə qanunsuz olaraq icazə vermədilər. Buna görə də islahatın yekun sənədlərində mənim imzam yoxdur. Nə qədər çalışsam da, komissiya üzvlüyündən kənarlaşdırılmağım ilə bağlı Şikar Əliyevdən saxta yollarla düzüb-qoşduğu qərarın surətini ala bilmədim.
Sabiq icra başçısının daşıdığı vəzifəsindən sui-istifadə edərək, mənim heç bir əsas olmadan işimdən azad edilməyimə bağlı qanunsuz göstəriş verəndə, həmçinin məni həbs etdirmək məqsədilə kolxozun üçillik sənədlərini rayon Prokurorluğuna təqdim etdirəndə, 380 ha taxıl sahəsində əkin-səpin işlərini şəxsi vəsaitim hesabına həyata keçirəndə, maddi və mənəvi ziyan vuraraq Konstitusiya ilə qorunan hüquqlarımı, o cümlədən təhlükəsiz və sağlam şəraitdə işləmək, təhlükəsiz yaşamaq hüquqlarımı pozanda, ali təhsilli olmağımı, işgüzarlığımı, bacarığımı, təmiz işçi olmağımı, təsərrüfatı ağır vəziyyətdən birincilər sırasına çıxarmağımı, azyaşlı uşaqlarımın ağır vəziyyətini, haqq və ədalət prinsipini, Azərbaycan Respublikasının Konstitusiyasının prinsiplərini, icra başçısı olaraq fəaliyyət prinsipini və bütün bunlara görə daşıdığı məsuliyyəti ən azından dərk etməli, yaxud da anlamalı idi.
İcra başçısı vətəndaşı lazım gəldikdə himayə etməyə, haqsızlıqlar qarşısında müdafıə etməyə, insan həyatını məhv edən hər cür əzab və iztirabları araşdırmağa, haqq və həqiqətin üstünlüyü üçün çalışmağa, insanın bir vətandaş və bir şəxsiyyət olaraq dəyərini, onun azadlığını, xoşbəxtliyini, inkişafını, bacarığını aşkara çıxarmaq hüququnu qəbul etməyə, ölkəmizin qayda-qanunlarına riayət etməyə, Vətənə şərəflə xidmət etməyə borclu olduğu halda, təəssfıilər oisun ki, o, bunların əksini, yəni mənə hədə-qorxu gələrək əzab-əziyyət verməsini, uzun illər zülmə məruz qoymasını və digər haqsızlıqlarını gördüm.
Bütün bunların hamısı həqiqətlərdir və baş verənlər də onu söyləməyə əsas verir ki, mənə paxıllıq edərək işləməyimə mane olanlar, o cümlədən başda Elman Allahverdiyev və digərləri olmaqla, mənə qarşı qanunazidd hərəkətlər edənlər, həmçinin vəzifələrindən sui-istifadə edənlər mənə maddi və mənəvi cəhətdən zərər vurublar. Bu cür haqsızlıqların nəticəsidir ki, düz iyirimi ildən çoxdur ki, işsizəm və mənəvi cəhətdən əzab çəkirəm. Üz-üzə qaldığım qanunsuzluq və haqsızlıqlarla bağlı, aidiyyatı üzrə bir çox instansiyalara silsilə müraciətlər ünvanlasam da, bir kimsə indiyədək pozulmuş hüquqlarımın bərpasına cəhd göstərməyib”.

MİRZƏ

araz.az xəbər portalı.