“Prezident İlham Əliyev iyulun 11-də cari ilin ilk altı ayı ilə bağlı keçirdiyi müşavirədə bir sıra məsələlər barədə danışdı. Dövlət başçısı həmçinin Ermənistanla münasibətlərə də toxundu. Ölkə rəhbəri qeyd etdi ki, sülh danışıqları ilə bağlı mövqeyimiz aydındır, məntiqlidir, beynəlxalq hüquqa əsaslanır. Prezident son danışıqlar raundları və bir neçə gündən sonra nəzərdə tutulan yüksək səviyyəli təmasların sülh anlaşmasına daha da yaxınlaşmaq məqsədi güddüyünü nəzərə çatdırdı”.

Bu sözləri siyasi şərhçi Kənan Novruzov deyib.

O, Ermənistan Baş naziri Nikol Paşinyanın artıq bir neçə dəfə Azərbaycanın ərazi bütövlüyünü tanıdığını və bunun asan başa gəlmədiyini bildirib:

“Rəsmi Bakının hərbi-siyasi səyləri nəticəsində Ermənistan reallığı anlamalı olub. Rəsmi İrəvanın Azərbaycanın ərazi bütövlüyünü tanıması heç də bu dövlətin humanistliyi kimi başa düşülməməlidir. Unutmaq olmaz ki, Paşinyan hakimiyyətinin ilk illərində “Qarabağ Ermənistandır, nöqtə” kimi sərsəm bəyanat səsləndirmişdi. Ötən illər ərzində Paşinyanın bu ritorikasının dəyişməsinin əsas səbəbi məhz Azərbaycanın sərrast addımları olub”.

K.Novruzov deyib ki, Ermənistan rəsmiləri, o cümlədən Paşinyanın getdikcə daha loyal açıqlamalar vermələri təsadüfi deyil:

“Hərçənd hələ də həllini tapmamış məsələlər var. Bəyanatlar artıq əməli addımlarla, konkret sənədlərlə təsdiqlənməlidir. Daha danışmaq yox, ciddi addım atmaq lazımdır. Vaxt yetişib. İnanmaq olar ki, Azərbaycan uğurlu xarici siyasəti nəticəsində buna da nail olacaq.

Paşinyan 44 günlük müharibənin ağır nəticələrini unutmamalı və necə deyərlər, papağını qarşısına qoyub düşünməlidir. Əgər diplomatiya nəticə verməsə, biz hərbi yolu da tətbiq edə bilərik. Bu isə rəsmi İrəvan üçün yaxşı nəsə vəd etmir”.

araz.az xəbər portalı.

araz.az xəbər portalı.