“AzerGold” QSC ötən 2023-cü ildə hasilatla bərabər, satış gəlirlərini də artırıb

“AzerGold” Qapalı Səhmdar Cəmiyyətindən araz.az-a daxil olan məlumata görə, QSC tərəfindən 2023-cü ildə qızıl hasilatı 63.7 min unsiyaya çatdırılıb.

Bu isə, 2022-ci illə müqayisədə, ötən ildə 1.7 min unsiya artım (3%) deməkdir. Bu, həm də fəaliyyət dövrü ərzində ən yüksək illik göstəricidir.2024-cü il üçün qızıl hasilat planı isə, 2023-cü illə müqayisədə 9% artaraq, 70 min unsiya təşkil edir.

Məlumatda o da qeyd olunur ki, “AzerGold” QSC-nin 2023-cü ildə satış gəlirləri də artıb. Belə ki, 2023-cü ildə qızıl və gümüşün yerli və beynəlxalq bazarlarda satışı uğurla davam etdirilib. Bir sözlə, qiymətlilərin satış həcmləri 2023-cü ildə 68.1 min unsiya qızıl və 119.8 min unsiya gümüş olub. Bu, 2022-ci illə müqayisədə, qızıl satışı həcmində 7% artım deməkdir. Ümumiyyətlə, qeyd edilən satış həcmindən qızıl üzrə 62.1 min unsiya, gümüş üzrə isə, 90.8 min unsiyası beynəlxalq bazarlarda realizə edilib. Daxili bazarın tələbatına uyğun olaraq, xammal və hazır məhsul formasında 6 min unsiya qızıl, 29.1 min unsiya gümüşün satışı həyata keçirilib. Beləliklə, 2017 – 2023-cü illər üzrə ümumi satış göstəriciləri 416 min unsiya qızıl, 853 min unsiya gümüş təşkil edib.

Hesabat ilində beynəlxalq və yerli bazarlarda qızıl və gümüş satışı nəticəsində
232.8 milyon manat məbləğində gəlir əldə edilib. 2022-ci illə müqayisədə satış
gəlirlərində 15% artım qeydə alınıb. Bu vəsaitin 210.1 milyon manatını ixrac, 22.7 milyon manatını daxili satış gəlirləri təşkil edir. İxrac gəlirləri 2022-ci illə müqayisədə 11%, yerli bazarda satış gəlirləri isə, 81% artıb. 2023-cü ildə qiymətli məhsulların ümumi satışlarından əldə edilmiş gəlirlərin 97.9%-i məhz qızılın satışı nəticəsində əldə edilib.
Bununla, 2017 – 2023-cü illər üzrə qızıl və gümüşün satışı nəticəsində əldə edilmiş ümumi gəlir 1.19 milyard manat olub.

Səməndər QURBANOV,
araz.az xəbər portalının xüsusi müxbiri.

araz.az xəbər portalı.