Balakəndə DYP-nin əməkdaşı İsmayıl Mehdiyev sürücünü 500 manata görə “çəkçevir”ə salıb- VİDEO/FAKT -FOTOLAR

Məlumdur ki, son illər Daxili İşlər Nazirliyinin tabeli dövlət qurumlarında həyata keçirilən islahatlar geniş ictimaiyyətin diqqətini olduqca cəlb etməkdədir.

Çünki, bu qurum müstəqil Azərbaycan Respublikasının əsas dövlət sütunlarından biri hesab olunur və belə bir səbəbdən də, hər kəs daxili işlər orqanı əməkdaşlarının atdıqları addımlara, ortaya qoyduqları yanaşmalara və s. lazımınca diqqət yetirir. Qeyd edək ki, Azərbaycan Respublikasının Prezidenti İlham Əliyev cənablarının 20 iyun 2019-cu il tarixdə imzaladığı Sərəncam əsasında, cənab Vilayət Eyvazov daxili işlər naziri vəzifəsinə təyin olundu. Belə bir təyinatdan sonra Nazirliyin bütün tabeli qurumlarında fərqli ab-hava formalaşmağa başladı.

araz.az   GundemXeber.Az-a istinadən bildirir ki, ötən 4 il 8 ay ərzində bu yöndə lazımi addımlar atıldı və hal-hazırda da atılmaqda davam edir.

Çox təəssüf hissi ilə qeyd edək ki, bu günə kimi cənab Nazirin rəhbərliyi altında lazımi addımların atılmasına baxmayaraq, hələ də yol polisi əməkdaşlarından bəziləri rəhbərlikdən verilən tapşırıqlara məhəl qoymurlar, necə deyərlər çoxsaylı qanunsuzluqlara imza atmaqda davam edirlər. Bu kimi səbəblər üzündəndir ki, ayrı-ayrı sürücülər bəzi yol polisi əməkdaşlarının müəyyən hoqqaları ilə üz-üzə qalırlar, bəzən də əsassız şəkildə getgələ salınırlar. Belə şəxslərdən biri də Balakən rayonu, Talalar kənd sakini Süleymanov Cavid Şəhmir oğludur.

Adı çəkilən bu şəxs gundemxeber.az xəbər portalının redaksiyasına ünvanladığı video- müraciətində bildirir ki, “Mən 27 yanvar 2024-cü il tarixdə şəxsi avtomobilim ilə Balakən rayonuna getməli oldum. 29 yanvarda, saat təqribən 11:45 radələrində Balakən rayonunun Tülü kəndində və hər kəsin “Tülü kruqu” adı ilə tanıdığı ərazidə 99-YP-593 dövlət nömrə nişanlı avtomobili idarə edən Balakən Rayon Polis Şöbəsinin Dövlət Yol Polisi bölməsinin əməkdaşı Mehdiyev İsmayıl Nadir oğlu arxamca gəldi və o, mənə “saxla” əmri verdi. Qeyd edim ki, həmin vaxt İsmayıl Mehdiyev idarə etdiyi avtomobildən yerə düşmədi, özünü mənə təqdim etmədi və o, əl işarəsi edərək məni idarə etdiyi avtomobilə əyləşməyə vadar etdi. Az sonra o, mənə “Sən avtomobili sərxoş vəziyyətdə idarə edirsən” dedi.

YPX əməkdaşının bu cür yanaşması əsasında ona bildirdim ki, mən içkili deyiləm. Həmin vaxt İsmayıl Mehdiyev mənə “Sən içkili olmadığını sübut edə bilərsənmi?” deyə sual verdi. Cavabımda, bəli mən içkili olmadığımı sübut edə bilərəm dedim. O halda o, avtomobildə olan alkatestr aparatını çıxartdı və mənim içkili olub-olmadığımı yoxlamağa başladı. Yoxlama zamanı o, mənə “sən içkilisən” dedi. Belə olan halda onunla razılaşmadım və mənim içkili olub-olmadığımı dəqiqləşdirmək məqsədilə biz Balakən MRX-na getməli olduq. MRX-da olarkən Əsgər həkim məni özünün istifadə etdiyi alkatestr aparatı ilə deyil, məhz yol polisi əməkdaşı İsmayıl Mehdiyevin istifadə etdiyi alkatestr aparatı ilə yoxlamağa başladı.

Belə olan halda Əsgər həkimə etirazımı bildirdim və ondan xahiş etdim ki, özünün istifadə etdiyin alkatestr aparatı ilə yoxla, daha sonra mənim içkili olub-olmamağımla bağlı analiz nümunələri də götürün dedim. Həkimdən bu yöndə xahiş etsəm də, o, məni YPX-nə məxsus alkatestr aparatı ilə yoxladı və mənə içkili olduğumu da bildirdi. Belə olan halda Əsgər həkimin yazdığı protokola etirazımı bildirdim və ləngimədən Şəki MRX-na gedib içkili olub-olmadığımı aşkara çıxarmaq üçün analiz verdim. Bəli, bu səhiyyə müəssisəsində verdiyim analiz əsasında müəyyən olundu ki, həmin gün içkili olmamışam və mənə bu MRX-dan ayıq olmağımla bağlı təsdiq olunmuş sənəd də verdilər.

Qeyd edim ki, Şəki MRX-dan aldığım həmin sənədi Balakən DYP bölməsinin əməkdaşı Elçin Yolçuyevə təqdim etdim və o, həmin sənəd əsasında duracaqdakı avtomobilimi özümə verdi. Belə bir haqsız olayla üz-üzə qaldığımdan, baş verənlərlə bağlı Baş Prokurorluğa, DİN-nin 102 xidmətinə və bir çox dövlət qurumlarına məlumat da vermişəm.
Onu da bildirim ki, 29 yanvar 2024-cü il tarixdə yol polisi əməkdaşı İsmayıl Mehdiyev məni “Tülü kruqu” adı ilə tanınan ərazidə saxladıqdan sonra, guya ki, həmin vaxtlarda içkili olmuşam və o, bununla bağlı barəmdə əsasız protokol da yazır. Eyni zamanda tərtib olunan protokol və müəyyən sənədlər Balakən DYP bölməsindən Balakən Rayon Məhkəməsinə göndərilir. Qeyd edim ki, Şəki MRX-na getmək istədiyim vaxt İsmayıl Mehdiyev qaynım Vüsal Şendiyevə “Siz hara getsəniz yenə də mənim qapımı döyəcəksiniz, yaxşı olar ki, 500 manat pul verin, mən bu söhbəti birdəfəlik bağlayım” deyir. 13 fevral 2024-cü il tarixdə Balakən Rayon Məhkəməsində keçirilən məhkəmə prosesi zamanı, hakim İXM-nin müvafiq maddəsi ilə, guya ki, təkrar sərxoşluğa yolverdiyimə görə sürücülük vəsiqəmin məhdudlaşdırılması haqda qərar çıxarmaq istədikdə, hakimin çıxaracağı qərara etiraz etdim. Yəni, hakimə bildirdim ki, mən 29 fevralda içkili olmamağımla bağlı Şəki MRX-dan rəsmi sənəd almışam. Belə bir səbəbdən də, hakim həmin gün qərar çıxarmadı və lazımi araşdırmaların aparılması üçün, növbəti məhkəmə prosesinin 21 fevral 2024-cü il tarixdə, saat 15:35-də keçiriləcəyini elan etdi. Mən Balakən DYP bölməsinin əməkdaşı İsmayıl Mehdiyevin bu cür əməllərindən heç cür baş aça bilmirəm. Ümid edirəm ki, heç bir əsas olmadan bu şəxsin bizdən 500 manat pul tələb etməsi gectez bir çox rəhbər şəxslərin, ələlxüsus DİN-i cənab Vilayət Eyvazovun diqqətini cəlb edəcək. Yəqin ki, o halda İsmayıl Mehdiyevin atdığı addımlara lazımi qiyməti vermək mümkün olacaq”.

Qeyd edək ki, möhtərəm Prezident İlham Əliyev cənabları neçə illərdir ki, cəmiyyətimizi eybəcərləşdirən hər cür amillərə, əyintilərə, rüşvətxorluğa və s. qarşı ardıcıl mübarizə tədbirlərini gücləndirir. Buna baxmayaraq, Balakən DYP bölməsinin əməkdaşı İsmayıl Mehdiyev isə, bu yöndə verilmiş tapşırıqları saya salmır. Unutmaq olmaz ki, bir tərəfdən ölkə rəhbəri İlham Əliyev cənabları, digər tərəfdən cənab Vilayət Eyvazov lazımi addımlarını atırlar ki, yol polisi sahəsində lazımi dönüş əldə etmək mümkün olsun. O halda ortaya belə bir sual çıxır ki, bu cür əməl və amal sahibi olan İsmayıl Mehdiyev, görəsən belə bir əməlləri ilə hara gedir, yaxud da hara qədər gedə biləcək?.Yazıda adı çəkilən hər kəsin mövqeyini dinləməyə hazırıq.

Mövzuya qayıdacağıq.

araz.az xəbər portalı.