2023-cü ildə Azərbaycanın ən böyük neft və qaz şirkəti SOCAR-ın cəmi gəlirləri 89 milyard 99 milyon manat, cəmi xərcləri 86 milyard 420 milyon manat təşkil edib. Nəticədə, 2 milyard 679 milyon manat əməliyyat mənfəətindən 606 milyon manat mənfəət vergisi ödənilib. Şirkət 2023-cü ili 2 milyard 73 milyon manat xalis mənfəət ilə başa vurub.

Bu barədə araz.az SOCAR-ın illik hesabatına istinadən xəbər verir.

Müqayisə üçün qeyd edək ki, 2022-ci ildə SOCAR-ın cəmi gəlirləri 123 milyard 763 milyon manat, cəmi xərcləri 112 milyard 900 milyon manat, ödənilən mənfəət vergisi 1 milyard 439 milyon manat, xalis mənfəəti 9 milyard 424 milyon manat təşkil etmişdi.

Şirkətin əsas əməliyyat gəlirləri (neft, qaz və neft məhsulları satışından) 2022-ci ildə 119 milyard 228 milyon manat ikən, 2023-cü ildə 85 milyard 201 milyon manata düşüb (34 milyard 27 milyon manat və ya 28,5% azalıb).

SOCAR 2023-cü ili 2 milyard 73 milyon manat xalis mənfəət ilə başa vurub. Şirkət 2022-ci ili 9 milyard 424 milyon manat xalis mənfəət ilə bağlamışdı. Beləliklə, ötən il Azərbaycanın iri şirkətinin xalis mənfəəti 7 milyard 351 milyon manat və ya 4,5 dəfə azalıb.

ŞİRKƏT KİÇİLİB

Ötən il SOCAR-ın cəmi aktivləri 8 milyard 869 milyon manat və ya 11% azalaraq 71 milyard 966 milyon manata düşüb. Şirkət 2022-ci ilin sonunda 80 milyard 835 milyon manat cəmi aktivlətə malik idi.

araz.az xəbər portalı.