Olkə mətbuatı Binəqədi Rayon Məhkəməsinin hakimi Fərid Əmirəliyevin məhkəmə sistemindən kənarlaşdırılması barədə artıq məlumat verib. araz.az bildirir ki, gununsesi.info–nun araşdırması zamanı isə, Fərid Əmirəliyevin hakim kimi səlahiyyətlərinə xitam verilməsinin səbəbi bəlli olub.

 

Araşdırma zamanı məlum olub ki, Fərid Əmirəliyev barəsində Baş Prokurorluğun Korrupsiyaya Qarşı Mübarizə Baş İdarəsində fəaliyyətinə dair çoxsaylı epizodları əhatə edən araşdırma aparılıb. Araşdırma nəticəsində Fərid Əmirəliyevin rüşvət almasına dair məlumatlar da təsdqini tapıb. Bundan başqa onun hakim kimi bilə-bilə qanunsuz hökm, qərar və qətnamə çıxarması da öyrənilib.

Ancaq cinayət məsuliyyətinə cəlb edilməyən Fərid Əmirəliyevdən könüllü ərizə yazması istənilib və o, buna dərhal əməl edib. Məhkəmə — Hüquq Şurası isə, Fərid Əmirəliyevin özünün “müraciətini” əsas tutaraq, onun hakim kimi səlahiyyətlərinə xitam verib.

Onu da xatırladaq ki, Fərid Əmirəliyev tanınmış jurnalist Əvəz Zeynallı və məşhur vəkil Elçin Sadıqov barəsində həbs-qətimkan tədbirini seçən hakim kimi tanınıb. 1984-cü il təvəllüdlü olan Fərid Əmirəliyev sabiq DİN rəhbəri Ramil Usubovun məşhur sürücüsü kimi tanınan Saşanın kürəkənidir.

araz.az xəbər portalı.