Daha əvvəl effektiv şəkildə pula qənaət etməyin yolları ilə bağlı məsləhətlər paylaşan milyarder və “Berkshire Hathaway” şirkətinin rəhbəri Uorren Baffet bu dəfə xalis sərvətinizi ən azı 50% artırmaq üçün sadə üsulu bölüşüb.

araz.az qaynarinfo-ya istinadən xəbər verir ki, Baffet “LinkedIn”də məsləhətləri olan bir video yayımlayıb. 

“İndi olduğundan ən azı 50% daha dəyərli olmağın sadə bir yolu həm yazılı, həm də şifahi ünsiyyət bacarıqlarınızı təkmilləşdirməkdir”, deyə Baffet bildirib.

Şirkət rəhbəri qeyd edir ki, biliklərinizi effektiv şəkildə paylaşmağı bilmirsinizsə, ən yüksək intellekt belə nəticə verməyəcək. 

“Dünyadakı bütün zehni gücə sahib ola bilərsiniz, amma bunu necə çatdıracağınızı bilmirsinizsə, bu, qaranlıqda bir qıza göz qırpmaq kimi bir şeydir – heç bir şey olmayacaq”, deyə milyarder qeyd edib.

Baffet bildirib ki, o, gənc ikən ictimai danışma qorxusu ilə üzləşib və Kolumbiya Biznes Məktəbini bitirdikdən sonra getdiyi 100 dollarlıq natiqlik kursu olmasaydı, həyatı çox fərqli ola bilərdi.

Bu kursa getməzdən əvvəl o, ictimai çıxışdan qorxurmuş. Başqalarının qarşısında danışmağı düşünəndə sözün əsl mənasında “xəstələnirmiş”. Bununla belə, 12 həftəlik məşqdən sonra onun ünsiyyət bacarıqları əhəmiyyətli dərəcədə yaxşılaşıb və bu, gələcək uğurunun mühüm tərkib hissəsi olub.

“Mən bunu etməyə davam etdim və indi danışdığım zaman məni dayandıra bilməzsiniz”, deyə milyarder qeyd edib.

Baffett maliyyə qabiliyyəti və qənaətcil həyat tərzi ilə tanınan bir insandır. O, pula qənaət etməyin yolları haqqında bəzi məsləhətlər verib. Milyarderin pula qənaət vərdişləri maddi vəziyyətini yaxşılaşdırmaq istəyən hər kəs üçün dəyərli dərslər verir.

 

araz.az xəbər portalı.