İlqar Kənan oğlu Cəlilov “AzerGold” Qapalı Səhmdar Cəmiyyətinin İdarə Heyətinin üzvü və sədrin müavini vəzifəsinə təyin edilib. araz.az xəbər verir ki, bu barədə Azərbaycan Prezidenti İlham Əliyev sentyabrın 17-də Sərəncam imzalayıb. Bununla da, İdarə Heyəti bir sədr və iki üzvdən ibarət olacaq.

İlqar Cəlilov 1983-cü ilin iyun ayının 8-də Qərbi Azərbaycanın Basarkeçər bölgəsində anadan olub.

2006 — 2011-ci illərdə Azərbaycan Müəllimlər İnstitutununda Riyaziyyat və informatika ixtisası üzrə bakalavr, 2015-2016-cı illərdə isə Azərbaycan Dövlət Aqrar Universitetində Yer quruluşu, torpaq və şəhər kadastrı ixtisası üzrə təhsil alıb.

2003-2004-cü illərdə “Bakı-Tbilisi-Ceyhan əsas ixrac boru kəməri” layihəsinin operatoru olan “McDermott” şirkətində ilməçi-takelajçı vəzifəsində çalışıb.

2008-2010-cu illərdə “İntegris”, 2010-cu illərdə “Azerbaijan Development”, 2011 – 2013-cü illərdə isə ”BM Technologies” şirkətində Coğrafi informasiya sistemləri üzrə mühəndis vəzifəsində çalışıb.

2013-2015-ci illərdə ”Təmiz Şəhər” Açıq Səhmdar Cəmiyyətində Elektron idarəetmə şöbəsinin müdiri, 2015-2016-cı illərdə isə Daxili nəzarət şöbəsinin müdiri vəzifəsində çalışıb.

2016-2017-ci illərdə “AzerGold” Qapalı Səhmdar Cəmiyyətində İnformasiya və kommunikasiya texnologiyaları təminatı, 2017-2021-ci illərdə isə Dağ-mədən və hasilat sahələrinin koordinasiyası şöbəsinin müdiri vəzifəsində çalışıb.

2 aprel 2021-ci il tarixindən etibarən “Daşkəsən Dəmir Filizi” Məhdud Məsuliyyətli Cəmiyyətində Baş direktorun müavini vəzifəsinə təyin edilib.

29 iyun 2022-ci il tarixindən etibarən “AzerGold” Qapalı Səhmdar Cəmiyyətində İdarə Heyəti sədrinin müşaviri vəzifəsində çalışıb.

17 sentyabr 2024-ci ildən “AzerGold” Qapalı Səhmdar Cəmiyyətinin İdarə Heyətinin üzvü – sədrin müavini vəzifəsindədir.

 

araz.az xəbər portalı.