Səbail Bələdiyyəsindəki özbaşınalıqlar barədə haqlı narazılıqlar durmadan artır

Doğrudan da, belədir: Yarandığı gündən Səbail Bələdiyyəsinin rəhbər sarıdan bəxti gətirmir ki, gətirmir. İndi də, bu bələdiyyə, necə deyərlər, sədr Hacı Əliyevin əlində əsir-yesirə çevrilib. Şəxsi mənafe amili gözləri elə qapadıb ki, heç onun özünün, eləcə də burada işlə təmin etdiyi Şahin, Zaur, Nurel, Fərhad, Pərvin… adlı yaxın və tanışlarının bələdiyyələrin işləriylə bağlı ölkə başçısının tələb və tövsiyələrini həyata keçirmək, həssas təbəqədən olan əhaliyə göstərilən xidməti yaxşı səviyyədə təşkil etmək yadlarına düşmür. Elə, bu səbəbdəndir ki, ölkənin media vasitələrindəki kimi, araz.az-da da, deyilənlər barədə yazılanların sayı, əhali giley-güzarı, haqlı şikayət və iradlar getdikcə daha da çoxalır. Dəhşət ondadır ki, bu da onları narahat etmir, konkret desək, dünya veclərinə deyil.

Məhz bu səbəbdən, araz.az, media vasitəsi olaraq, yazının əsas mövzusunu təşkil edən bu ciddi məsələni daim diqqətdə saxlamağa qərar verib. Bir sözlə, bu barədə yazılarımızı vaxtaşırı dəyərli oxucularımızın diqqətinə çatdırmağı planlaşdırırıq. İndi isə, ölkə mətbuatında, eləcə də, araz.az-da bu ciddi məsələ ilə bağlı xeyli əvvəl dərc olunanan bir yazını təkrar verməklə kifayətlənirik. Bu səbəbdən ki, “YAP-çı bələdiyyə sədrinin müxalifətçi nəvəsi radikalların təbliğatçısı rolunda — FOTO/VİDEOFAKT” sərlövhəli həmin yazıda xüsusi olaraq vurğulananlar, deyilənlərin inkarolunmaz daha ciddi sübutlarıdır.

Barəsində danışdığımız və olduğu kimi dərc etdiyimiz həmin yazı budur:

“Azərbaycanda hazırki iqtidarın hesabına böyük vəzifələr tutan və elə buna görə də, görmədikləri maddi nemətlər əldə edən bəzi şəxslərin və onların yaxın qohumlarının sonradan hakimiyyətə qarşı müxalif mövqedən çıxış etməsi, hətta ölkəmizə düşmən mövqedə dayanan xarici dairələrin əlində alətə çevrilən xaricdəki “söyüş müxalifəti”nə müəyyən kompramatlar sızdırması ilə bağlı xəbərlər yenilik deyil. Bununla bağlı ortaya çıxan bir çox faktlar və iddialar mövcuddur.

Bu xüsusda, ölkə mətbuatının, eləcə də, araz.az-ın redaksiyalarına olduqca ilginc məlumatlar daxil olur. Həmin məlumatların birində isə, Səbayel Bələdiyyəsinin Yeni Azərbaycan Partiyasını təmsil edən sədri Hacı Əliyevin, özünü “ictimai fəal” kimi göstərən nəvəsi Nurel Rövşən oğlu Kərimin dövlətçilik əleyhinə real və virtual fəaliyyətindən bəhs olunur. Nurel Kərimin sosial şəbəkələrdəki hesablarının müşahidəsi göstərir ki, bu gənc adam radikal müxalifətin və onun milli dövlətçilik əleyhinə olan təbliğatının əsas ruporlarından birinə çevrilib.

Məsələn, Nurel Kərim öz Facebook hesabında mütəmadi olaraq, ölkəmizcə ictimai-siyasi sabitliyi pozmağa yönəlik razılaşdırılmamış aksiyalara çağırış edir, özü böyük şövqlə bu aksiyalarda iştirak edir. Üstəlik, öz qanuni vəzifəsini yerinə yetirən Azərbaycan Polisinin fəaliyyətini gözdən salmaq, guya, ölkəmizdə sərbəst toplaşmaq azadlığının pozulması görüntüsünü yaratmaq üçün, sosial şəbəkələrdə çoxsaylı paylaşımlar edir.

Səbail Bələdiyyəsinin sədri Hacı Əliyevin bu “ictimai fəal” nəvəsi və adıçəkilən bələdiyyənin işçisi Nurel Kərim Azərbaycan iqtidarını ən sərt formada tənqid edən, dövlətimizdən ayrı-ayrı beynəlxalq təşkilatlara şikayətlər edən sevdiyi radikal müxalifətçilərlə birlikdə tez-tez bir araya gəlir, onların istək və arzuları naminə dövlətçilik əleyhinə trolluq edir. Azərbaycanda, guya, söz və mətbuat azadlığının boğulduğunu qəti şəkildə iddia edir.

Etdikləri hesabına, “göynən getdiyini” düşünən bu “gənc fəal”, həmçinin, Azərbaycanda demokratik abu-havada baş tutduğu bütün yerli və beynəlxalq təşkilatlar tərəfindən bəyan edilən son parlament seçkilərinin belə saxta keçirildiyini və onu tanımaqdan imtina etdiyini də yazır. Maraqlıdır, görəsən, Nurel Kərim ölkənin ən yaşlı bələdiyyə sədrlərindən olan babası Hacı Əliyevin də, xeyli müddət öncə qatıldığı bələdiyyə seçkiləri haqqında belə düşünürmü?!.

Yuxarıda deyilənlər azmış kimi, Nurel Kərim özünün digər çoxsaylı paylaşımlarında, Azərbaycanda həyata keçirilən dərin genişmiqyaslı islahatlar siyasətini gözdən salmağa, bu siyasətin, guya, reallığı əks etdirmədiyini iddia etməyə də çalışır. Ümumiyyətlə, bu “gənc fəalın”, qəti şəkildə demək olar ki, bütün fəaliyyəti sosial şəbəkələrdə və reallıqda götürüldükdə, birbaşa, radikal müxalifətin ideologiya və tesizlərini təbliğ etməyə yönəlib.

Redaksiyamıza vaxtaşırı daxil olan digər çoxsaylı məlumatlara görə də, təhsil aldığı Bakı Dövlət Universitetində 20-yə qədər fəndən kəsiri olan Nurel Kərimi, hansısa gözəgörünməz qüvvə qoruyur. Və sanki onun sayəsində, Bakı Dövlət Universitetində daha çox gəncin radikal qrupların siyasi təsir gücü altına düşməsinə çalışır…

…Yeri gəlmişkən, onu da qeyd edək ki, redaksiyamıza daxil olan daha bir məlumatda isə, Səbail Bələdiyyəsinin sədri Hacı Əliyevin, bələdiyyə seçkilərinə bir-neçə ay qalana qədər, paytaxt Bakının Nizami rayonundakı “Razin” deyilən qəsəbədə yaşadığı, rəsmi olaraq, orada qeydiyyatda olduğu xüsusi olaraq vurğulanır. Ölkə üçün xüsusi bir önəm daşıyan həmin vaxtda, yenə, hansısa gözəgörünməz bir qüvvənin, onu seçkilərə bir-neçə ay qalmış Səbail sakini” edə bilməsi və elə, bu rayondan seçkilərə qatılmasına münbit şərait yaratması da, xüsusi olaraq qeyd olunur.

Yeri gəldi deyə, bu yazının sonunda bir daha onu qeyd etmək istəyirik ki, Hacı Əliyev bələdiyyə sədri olandan, necə deyərlər, bir “ailə ansamblını ətrafına toplayaraq, çoxlarını işsiz qoydu. İndi onu istəyirik, haqq-ədalət öz yerini tapsın. Dövlət səviyyəsində yoxlama təşkil edilsin, işə götürülənlərin hamısının bütün işləri araşdırılsın. Və Hacı Əliyevin özünün, bu rayonda yaşamasa da, bələdiyyə sədri seçilməsinin necə mümkün olmasına da, diqqət ayırılsın.

Sonda, xüsusi narahatlıq doğuran bir sualımızı da, ölkənin əlaqədar dövlət qurumları rəhbərlərinin diqqətinə çatdırır və onların bu suala cavablarını da, xüsusi bir səbirsizliklə gözləyirik: “Maraqlıdır, görəsən, öz doğma nəvəsini dövlətçilik ruhunda tərbiyə edə bilməyən sədr Hacı Əliyev, özünün bələdiyyə rəhbəri fəaliyyətini hansı meyarlar əsasında qura bilir?!.”.

Yazının sonunda, bir daha onu qeyd etmək istəyirik ki, bu yazının əsas mövzusunu təşkil edən məsələ ciddi, ciddi olduğu qədər də, düşündürücü və məyusedici olduğundan, araz.az əməkdaşları olaraq, bu məsələ ətrafında baş verənləri daim diqqətimizdə saxlayacaq, tezliklə, bu barədə dərin araşdırma yazıları hazırlayacağıq. Dəyərli oxucularımıza məsləhət görürük ki, həmin yazıları da oxumaq üçün, araz.az-ı izləməyi unutmasınlar.

Məhi ELSEVƏR,
araz.az xəbər portalının xüsusi müxbiri.