“Ruhun satıldısa, sən bitdin və tamamilə tükəndin. Bundan sonra, sən hər şeyini satarsan!” — SƏMRA HÜSEYNOVA

““Miss Azerbaijan – 2019” olduqdan sonra, yaşadığım sevgi münasibəti həyatımda çevriliş oldu və bütün bunlar internetə yansıdı. Bu çox dramatik bir sevgiydi. Əslində, bundan nə qədər qaçsam da, yenə içində olurdum. Münasibətimin necə başlayıb, necə bitdiyini bilmirəm, çünki o zaman müalicə alırdım. Çox ağır və toksik bir münasibət idi. Bu gün səni sevirəm deyən insan, sabah səni tanımaq istəmirdi. O, mənimlə olan yerdə başqa xanıma baxırdısa, o eqo məni o qədər əzə bilərdi ki, səhər mən onun gözünün önündə başqa bir bəylə rəqs edə bilərdim. Bu münasibətim bitdiyinə görə, çox xoşbəxtəm. Bir gün səhər oyanıb, anladım ki, bu münasibət sağlamlığıma zərər vurur”.

araz.az yerli mediaya istinadən xəbər verir ki, bu sözləri model Səmra Hüseynova qonaq olduğu “YouTube”da yayımlanan “AStar” layihəsində deyib. Podium ulduzu bildirib ki, keçmiş sevgilisi hətta onun anasını öldürmək istəyib:

“Bu münasibət bir il çəkdi. Sevdiyim şəxs anasını itirmişdi. Onun anasının sağ qalması, yaşaması üçün, sanki mən əlimdə fənərlə sahilə düşmüşdüm, Allaha məktub göndərmək üçün. O isə, mənim anamı öldürmək istədi. Xəstələnmişdim, çəkim 35 kiloqrama düşmüşdü, heç kimi görmək istəmirdim. Bildiyiniz canlı skelet idim. Eqoma görə, onun mənim bu halda olduğumu görməsini istəmirdim. O insan məni görmək istəyəndə anam buna icazə vermədi. O da deyirdi ki, onlar kimdir, mənim atam da, anam da odur. Anam icazə verməyəndə, o anamı vurdu. Elə vurdu ki, anam bundan ölə bilərdi. Bu fiziki zərbə idi. O anama əl qaldırdı. Həyatda mənə bunu başa saldı ki, kimin üçün canından keçərsənsə, sənin canını ilk olaraq, o, alar”.

Proqramın aparıcısı Ülvira Qarayevanın “Bir dəfə jurnalistlər anana zəng vurublar və sual veriblər ki, Səmranın soyunmağına və çılpaq fotolar çəkdirməsinə atası necə reaksiya verir? Anan da cavab vermişdi ki, atası Səmranı dəstəkləyir və onunla fəxr edir” sözlərinə Səmra belə cavab verib:

“Bir gün atamı dənizkənarına apardım. O da gördü ki, hamı orada yarıçılpaqdır. İstər ailəli, istər qardaş-bacı. Kiminin uşağı, kimin arvadı… Nə fərqi var? Bəli, biz dənizə getmişdik. Atam bunu görüb, dedi: “Qızım, sən də, eyni şeyi edirsən… Hansısa sanballı müğənni gəlsə, jurnalistlər ona: “Atan belə geyinməyə icazə verir?” — sualını verə bilməzlər”. Amma mənə o sualı verirlər. Atam tam dəstəkdir, çünki görür ki, çox insanlar dənizdə yarıçılpaqdır”.

O uşaqkən, anasının yüksək məbləğdə faizlə borc götürdüyünü deyən S. Hüseynova bildirib ki, həmin borcu ödəmək üçün, çılpaq fotolarını şirkətlərin birinə satıb:

“Biz sələmlə böyümüşük. Anam bizi sələmlə oxudub. Anamın sələm aldığı məbləğ çox böyük idi. Anamın sələm aldığı insan, hətta ona bıçaq çəkmək istədi. O hadisə mənim yanımda oldu. Mən də, 3 günün içində o pulu tapıb, ödədim. Çılpaq çəkilişlər edərək, o pulu yığdım. Bəzi şirkətlər var ki, onlar sənin çılpaq görüntülərini alır və sənə yüksək məbləğdə pul verirlər. Çılpaq fotolarımın sonra yayılması vecimə deyil (ağlayır — red.). O şəkillərə görə də,.. İstərdiniz görməyə də… “Google”də yoxdur, amma sosial şəbəkədə var. Atla olan çılpaq fotolarım yayılıb. O fotolara görə,  problemim olmayıb.

Mən ona görə ağlayıram ki, o səhnəni unuda bilmirəm. Sizin gözünüzün önündə ananızı öldürmək istəsələr, necə olarsınız?! O, bizə görə, bunu edib. İnsan məcbur qalanda, hər şeyə əl atır. Mən də, etdim. Fotolarımı alan şirkətlər Türkiyə, Fransa, Gürcüstan,.. və Rusiyadan idi. Amma Azərbaycana gəlirlər. Bizdə də,  bununla məşğul olan şirkətlər var, onlar deyirlər ki, bu model bu cür fotolar çəkdirə bilər və bunu sən də edirsən. Azərbaycanda bunu edən, yeganə mənəm”.

Aparıcının: “Modellikdə eskort daha çoxdur, nəinki başqa sahələrdə. O qadınlara hamının tamahı düşür. Bu hallarla özün rastlaşmısan?” — sualına Səmra belə reaksiya verib:

“Mənə eskortluq etmək təklifləri olur, amma mən bunu edə bilmirəm. Etmək istəyim olub, amma etməmişəm. Edə bilmərəm də… Ruhumu sata bilmirəm. Ac kişinin bəlkə yanında köləsi ola bilərəm, çünki sevirəm. Amma sevmədiyim bir kişinin yanında pula görə qala bilmirəm. Bunu nə qədər istəmişəm, amma edə bilməmişəm. İstəmişəm anama ev alım, atamın işini böyüdüm, amma, edə bilməmişəm. Valideynlərim də, həmişə bunu etməyimə icazə verməyiblər. Atam da deyib ki, çılpaq görüntüm, səhvlərim olsun, içmişəm, eybi yox, 40 — 50 yaşında tövbə edərəm. Amma heç zaman ruhumu satmamağı məsləhət görüblər: “Çünki onu Allaha tövbə edə bilməyəcəksən. Ruhun satıldısa, sən bitdin və tamamilə tükəndin. Bundan sonra, sən hər şeyini satarsan. Düşünürəm ki, bu bacarıqdır. Hər qadın bunu edə bilməz”. Bu — həqiqətdir!”.

araz.az xəbər portalı.