ak 660x330“Abşeron rayon İcra Hakimiyyətinin başçısı İradə Gülməmmədovanın hiyləsi və ssenarisi ilə həbs edilən qardaşım Akifin haqsız tutulmasına dözə bilməyən bacımız bu ilin iyul ayının ortalarında intihar etmişdir…”

Bu xəbər Respublika Baş Prokurorluğu yanında Korrupsiyaya Qarşı Mübarizə İdarəsinin əməkdaşları tərəfindən Abşeron Rayon İcra Hakimiyyətində keçirilən əməliyyatdan sonra həbs edilən Memarlıq və tikinti şöbəsinin müdiri (baş memar) Akif Əliyevin qardaşı Tofiq Calalovun ölkə Prezidenti İlham Əliyevə və Baş Prokurora ünvanladığı müraciətdə yer alıb.

Bir nüsxəsi “AzPolitika.info”-ya göndərilən müraciətdə Tofiq Calalov əvvəlcə ölkə Prezidentinin rəhbərliyilə Azərbaycannda geniş quruculuq işlərinin həyata keçirilməsiindən məmmunluğunu ifadə edir:

“Hörmətli cənab Prezident, Sizin prezidentliyiniz illərində minlərlə məktəblər, məktəbəqədər tərbiyə müəssisələri, səhiyyə ocaqları və xüsusi təyinatlı sosial obyektlər tikilib xalqın istifadəsinə verilmişdir. Son 15 il ərzində təkcə paytaxt Bakı deyil, ucqar bölgələr də öz simasını dəyişmiş, müasirləşmişdir.

Zati-aliləri, bütün xalqımız televiziya məkanında sadəlik nümunəsi göstərərək dəfələrlə özünüzü xalqın xidmətçisi elan etməyinizin canlı şahididir”.

“Lakin təəssüf hissi ilə qeyd edilməlidir ki, bir çox dövlət məmurları siyasətinizə müqavimət göstərir, ölkədə narazıların sayını artırmağa və sosial gərginlik yaratmağa çalışır, vəzifə səlahiyyətlərindən sui-istifadə edərək talançılıqla və rüşvətxorluqla məşğul olurlar”, – deyə qeyd edən Tofiq Calalov daha sonra müraciətində Abşeron rayon İcra Hakimiyyətinin başçısı İradə Gülməmmədovaya qarşı ittihamlara keçir:

“Dediklərimə nümunə olaraq Abşeron Rayon İcra Hakimiyyətinin başçısı İradə Gülməmmədovanı göstərmək olar. Bütün rayon ictimaiyyəti bilir ki, İradə xanım 5 ildən artıqdır ki, doğma qardaşı Rövşəni, bacısı oğlu Babəki, yaxın qohumları Şamili, Cəfəri ətrafına toplayıb onların vasitəsilə rüşvətxorluqla məşğuldur. O, Abşeron rayonuna gəlir gətirən yağlı obyekt kimi baxır, onun fəaliyyəti başçıdan çox makleri xatırladır. Bir sözlə, bu gün Abşeron İcra Hakimiyyəti “vosmoyun bazarı” təsirini bəxş edir.

Bu ilin iyun ayında daxil olmuş çoxsaylı məlumatlar əsasında Respublika Baş Prokuroru yanında Korrupsiyaya Qarşı Mübarizə Baş İdarəsinin əməkdaşları tərəfindən vətəndaşların müraciətləri araşdırılarkən müraciətlərdə göstərilən faktların böyük əksəriyyəti öz təsdiqini tapmışdır. Məlum olmuşdur ki, Abşeron rayonunun İcra Başçısı İradə Gülməmmədovanın qardaşı Rövşən, bacısı oğlu Babək, yaxın qohumları Şamil, Cəfər rayonda baş alıb gedən rüşvətxorluğa, talançılığa rəvac verir, başçının pul yığanları kimi tanınırlar.

Deyilənləri təsdiq etmək üçün onlarla insan iş aparan müstəntiq tərəfindən qəbul edilmiş, onlar icra başçısının adları çəkilən yaxın qohumlarının üzünə dirənməyə hazır olduqlarını bildirsələr də, müstəntiq onlardan izahat alıb rəsmiləşdirməmişdir”.

Daha sonra Tofiq Calalov müraciətində bildirilir ki, icra başçısı İradə Gülməmmədova vəziyyətin özü üçün dramatik hal aldığını, qardaşının və yaxın qohumlarının həbslə üz-üzə qaldığını görərək, rayonun baş memarı Akif Əliyevlə görüşərək, onunla razılaşmaya gedib: “Başçı baş memara bildirir ki, əgər mən həbs edilsəm, sizlər də kütləvi şəkildə həbs olunacaqsınız. Lakin sən mənə qarşı irəli sürülən ittihamları öz üzərinə götürüb, tutulsan, mən səni 10 gün müddətinə azadlığa çıxara bilərəm. İradə Gülməmmədova Akif Əliyevdən təkidlə xahiş edir ki, rayonda baş verən bütün neqativ faktların məsuliyyətini öz üzərinə götürsün. Akif Əliyev də başçının vədlərinə inanaraq, hətta baş memarın səlahiyyətlərinə aid olmayan bir çox qanunazidd əməllərə imza atdığını öz üzərinə götürür. Bunun nəticəsində də iyun ayının 23-də Korrupsiyaya Qarşı Mübarizə Baş İdarəsi tərəfindən həbs edilir”.

Tofiq Calalov qardaşının ittiham olunduğu cinayətlərin heç birini törətmədiyinə əmin olduğunu bildirir: “Hörmətli cənab Prezident, icra başçısı İradə Gülməmmədovanın hiyləsi və ssenarisi ilə həbs edilən Akif Əliyev mənim qardaşımdır. Əgər onun zərrə qədər təqsiri olsaydı mən dəyərli vaxtınızı alıb Sizə zəhmət verməzdim. Sizi səmimiyyətimə inandırmaq istəyirəm ki, onun həbsinin heç bir hüquqi əsası yoxdur. O, İradə Gülməmmədovanın əvəzindən tutulub. Akif Əliyevin memar olaraq neçə illərdir ki, bütün səlahiyyətləri, o cümlədən möhürü, ştampı da əlindən alınmışdı.

Onu da xüsusi vurğulamaq lazım gəlir ki, qardaşım Akifin sifarişlə haqsız tutulmasına dözə bilməyən bacısı bu ilin iyul ayının ortalarında intihar etmişdir”.

Sonda Tofiq Calalov qardaşının işinin ədalətli araşdırılmasını xahiş edir: “Hörmətli cənab Prezident, bu məktubu xüsusi nəzarətə götürməyinizi, Akif Əliyevə qarşı irəli sürülən ittihamların yenidən araşdırılmasına və ədalətli qərar çıxarılmasına göstəriş verməyinizi səmimi qəlbdən xahiş edirəm. Ümidvaram ki, heç kimdən əsirgəmədiyiniz köməkliyinizi bizdən də əsirgəməyəcəksiniz. 

Zati-aliləri, işi aparan müstəntiqin qanunazidd əməllərini cəsarətlə hallandırdığıma görə gələcəkdə mən, övladlarım və doğmalarım müstəntiqin təqiblərinə və təzyiqlərinə məruz qalarıqsa bu zaman bütün məsuliyyət və cavabdehlik müstəntiqin üzərində qalacaqdır.

Hörmətli cənab Prezident, qoy, Ulu Yaradanımız Sizi daim hifz etsin, öz mübarək əlləri ilə həyat yollarınıza, siyasi fəaliyyətinizə çıraq tutsun, Sizə əbədi cansağlığı, dağlar ömrü bəxş etsin – Amin!”

Məktubda yer alan iddialarla bağlı İcra Hakimiyyətinin və şəxsən icra başçısı İradə Gülməmmədovanın da mövqeyini dərc etməyə hazırıq.

AzPolitika.info

araz.az xəbər portalı.